ළමුන්ට සැලකීම සම්බන්ධයෙන් ආණ්ඩු වලින් ප්‍රශ්න කරන එක්සත් ජාතීන්ගේ සැසි වාරයකදී පිළිගත් කාර්ය පටිපාටිය ඉක්මවා ගොස් තමන්ට විශේෂ සැලකිල්ලක් දක්වන ලෙස ශ්‍රී ලංකාවේ විදේශ අමාත්‍යාංශයේ ජ්‍යෙෂ්ඨ රාජදුතයකු විසින් ඉල්ලා සිටීම නිසා ශ්‍රී ලංකාව හෑල්ලුවට පත්ව තිබේ.
ළමා අයිතිවාසිකම් පිළිබඳ එක්සත් ජාතීන්ගේ කමිටුවේදී ළමා අයිතිවාසිකම් රැකීම සඳහා ශ්‍රී ලංකාව විසින් ගෙන ඇති පියවර සම්බන්ධයෙන් අසන ලද වාචික ප්‍රශ්න ඊමේල් කර එවන ලෙසට වසර ගණනක් තිස්සේ එක්සත් ජාතීන්ගේ සංවිධානයේ ශ්‍රී ලංකාව නියෝජනය කරන ජිනීවාහි ශ්‍රී ලංකා නිත්‍ය නියෝජිත රවිනාථ ආරියසිංහ කරන ලද ඉල්ලීම කමිටුව විසින් එක හෙලා ප්‍රතික්ෂේප කර ඇත්තේ එය සාමාන්‍ය පිළිවෙත නොවන බව සිහිපත් කර දෙමිනි.
කිසිදු රාජ්‍යයකට එවැනි විශේෂ සැලකිල්ලක් දැක්වීමේ පුරුද්දක් නැති බව අවධාරණය කර ඇති නියෝජිතවරියක් වාචික පිළිතුරු හොඳින් අසා ඒවාට පිළිතුරු දීම රාජ්‍යයේ වගකීම බව නිත්‍ය නියෝජිත රවිනාථ හට සිහි පත් කර දී තිබේ.
ශ්‍රී ලංකාව ළමා අයිතිවාසිකම් රැකීම සඳහා විවිධ අණ පනත් ගෙන එන බව දැනුම් දී තිබුනත් ඒවා කවරාකාරයෙන් ක්‍රියාවේ යොදවන්නේද යන්න පිළිබඳව ප්‍රශ්න මාලාවක් එක්සත් ජාතීන්ගේ විශේෂ නියෝජිතයන් විසින් ළමා හා කාන්තා කටයුතු අමාත්‍යංශයේ ලේකම්වරිය චන්ද්‍රානි සේනාරත්න සහ ළමාරක්ෂක අධිකාරියේ සභාපතිනි මරිනි ද ලිවේරා ප්‍රමුඛ නියෝජිත මණ්ඩලයට වාචිකව ඉදිරිපත් කරමින් ඒ සම්බන්ධයෙන් පිළිතුරු ඊළඟ රැස්වීමේදී ලබා දෙන ලෙස ඉල්ලන ලදී.
එම ප්‍රශ්න ඊ මේල් මගින් ලිඛිතව ලබා දෙන ලෙස ශ්‍රී ලංකාවේ නිත්‍ය නියෝජිතයා කළ ඉල්ලීම එවෙලේම ප්‍රතික්ෂේප කරන ආකාරය එක්සත් ජාතීන්ගේ අන්තර්ඡාල රුපවාහිනී විකාශය ඔස්සේ ලෝකය පුරාම සජිවි ලෙස දැකගත හැකි විය.
රාජපක්ෂ පාලන සමයේ සිටම ජිනිවා නුවර දී ශ්‍රී ලංකාව නියෝජනය කරමින් මානව හිමිකම් මණ්ඩල යෝජනාව සම්පාදනයේදී ද මැදිහත් වූ නිත්‍ය නියෝජිත රවිනාථ ආරියසිංහ එක්සත් ජාතීන්ගේ සැසි වාර හා කාර්ය පටිපාටිය පිළිබඳව මනා අවබෝධයක් ඇත්තෙකි යන්න විදේශ අමාත්‍යංශයේ විශ්වාසයයි.
Facebook Comments
