එක්සත් ජාතීන්ගේ සංවිධානයේ 71 වැනි සැසිවාරයට ඇමරිකාවට ගිය එක්සත් ජාතික පක්ෂ මන්ත්රීවරුන් නිසි අවසර ගත් ආකාරය පිළිබඳව වහාම වාර්තාවක් ලබාදෙන ලෙස අගමැති රනිල් වික්රමසිංහ පාර්ලිමේන්තුවේ සභානායක කාර්යාලය වෙත උපදෙස් දී ඇත.
තමාට හෝ සභානායක, අමාත්ය ලක්ෂ්මන් කිරිඇල්ල හෝ එජාප මහ ලේකම් ඇමති කබීර් හෂීම් හට පූර්ව දැනුම්දීමක් සිදු නොකොට ජනාධිපතිවරයා සමග ඇමරිකාවේ සංචාරයක නිරතව සිටින එක්සත් ජාතික පක්ෂයේ මැති ඇමතිවරුන් සම්බන්ධයෙන් දැඩි තීරණයක් ගැනීමට අගමැතිවරයා තීරණය කර ඇතැයි දේශපාලන ආරංචිමාර්ග සඳහන් කරයි.
එම සංචාරයට එක්වූ එජාප මන්ත්රීවරුන්ගේ ලේඛනයක් අවශ්ය බවත් ඇමරිකාවට ගිය එම මන්ත්රීවරුන් සිදුකර ඇති රාජ්ය තාන්ත්රික කටයුතු පිළිබඳ කරුණුද මෙම වාර්තාවට ඇතුළත් කරන ලෙසත් අගමැතිවරයා දන්වා තිබේ.
මෙම සංචාරයට එක්වීම සම්බන්ධව මෙන්ම ඊට අවසර ලබාගත් ආකාරය ඇතුළු සියලු කරුණු ඇතුළත් වාර්තාවක් අගමැති වෙත සභානායක කාර්යාලය විසින් ලබා දීමට නියමිත බවට වාර්තා වේ.
මේ දිනවල නොකඩවා පාර්ලිමේන්තුව තුල රැඳී සිටින්නැයි සභානායක කාර්යාලය විසින් එජාප මන්ත්රීවරුන් දැනුවත් කිරීමට කටයුතු කල අවස්ථාවේදී මෙසේ එජාප මැති ඇමතිවරුන් 10 දෙනෙකු පමණ විදේශගතව ඇති බව දැනගන්නට ලැබී ඇත.