හමුදා බුද්ධි අංශ සාමාජිකයින් දෙදෙනකුගේ වෙඩි පහරින් බොරැල්ලේ කාන්තාවක් මිය යාම සැලසුම් සහගත ඝාතනයක් දැයි සිරකරු අයිතිවාසිකම් සුරැකීමේ කමිටුව සැක පළ කර තිබේ.
ආරක්ෂ අංශවල වෙඩි තැබිම්වලින් සිවිල් වැසියන් මිය ගිය පලමු අවස්ථාව මෙය නොවන බව පෙන්වා දෙන එම කමිටුවේ සුදේශ් නන්දිමාල් මෙම ඝාතනය මේ ආකාරයෙන් සිදුකිරීමට ඔවුන්ට ඇති උවමනාව කුමක් දැයි මිය ගිය කාන්තාවගේ ඥාතීන් ද සමග පෙබරවාරි 17 වැනිදා මානව හිමිකම් කොමිසමට පැමිණිල්ලි කිරිමෙන් පසුව මාධ්‍ය වෙත කියා සිටියේය.
“අපි අහලා තියෙනවා මේ වගේ සිදුවිම් අපි දැකලා තියෙනවා යම් යම් නිලධාරින්, කාකි ඇඳුම් ඇදගත්ත පුද්ගලයෝ ඔවුන්ගේ බලය අවභාවිතා කරමින් කොන්ත්‍රාත් එකට මිනි මරන්න පුරුදු වෙලා තියෙනවා. මේකත් එවැනි සිදුවීමක්ද කියලා අපිට සැකයක් තියෙනවා.” ඔහු සඳහන් කළේය.
මෙම සිදුවීමට සම්බන්ධ හමුදා සෙබලුන් බොරැල්ල පොලිසිය විසින් අත්අඩංගුවට ගත්ත ද ඒ සම්බන්ධ විමර්ශණ හරියාකාරව සිදුවේදැයි සැක සහිත බව සිරකරු අයිතිවාසිකම් සුරැකීමේ කමිටුවේ සුදේශ් නන්දිමාල් මාධ්‍ය වෙත කියා සිටියේය.
පෙබරවාරි 13 වැනිදා බොරැල්ල වනාතමුල්ල හල්ගහකුඹුර ප්‍රදේශයේ ක්‍රියාත්මක මත්කුඩු ජාවාරමක් ගැන තොරතුරු සොයා බැලීම සඳහා ගිය යුද හමුදා බුද්ධි නිලධාරීන් දෙදෙනකු අනීතික ලෙස කටයුතු කිරීමට යෑම හේතුවෙන් කාන්තාවක වෙඩි වැදීමකට ලක්ව මිය ගිය බව පොලිසිය කියා සිටියේය.
පොලිස් මාධ්‍ය ප්‍රකාශක නිහාල් තල්දූව සඳහන් කළේ වැටලීම සිදුකරන අතරතුරදී ඇතිවූ පොරබැදීමක දී බුද්ධි අංශ සාමාජිකයකුගේ ගිනිඅවියක් එක්වර ක්‍රියාත්මක වීමෙන් එම වෙඩිවැදීම සිදුව ඇති බවය.
වෙඩි වැදුණු කාන්තාව රෝහල් ගතකිරීමෙන් අනතුරුව මිය ගිය අතර ඇය බොරැල්ල, හල්ගහකුඹුර ප්‍රදේශයේ පදිංචි මෙලනි කාංචනා නැමැති 25 හැවිරිදි දෙදරු මවකි.
සිද්ධියට සම්බන්ධ යුද හමුදා මුලස්ථානයට අනියුක්ත බුද්ධි අංශ සාමාජිකයන් දෙදෙනා බොරැල්ල පොලිසිය විසින් අත්අඩංගුවට ගෙන අධිකරණයට ඉදිරිපත් කිරිමෙන් පසුව පෙබරවාරි 21 වනදා දක්වා රක්ෂිත බන්ධනාගාරගත කර ඇත.
Facebook Comments
