බෙහෙත් ඉල්ලා උද්ඝෝෂණය කළ දෙමළ ක්‍රියාධාරිනියකට ප්‍රශ්න පිට ප්‍රශ්න

දෙවසරකට ඉහතදී රටේ පැවැති ඖෂධ හිඟයට විසදුම් ඉල්ලා විරෝධතා දියත් කළ නැගෙනහිර පළාතේ මානව හිමිකම් ක්‍රියාකාරිනියකගෙන් ත්‍රස්ත මර්දන හා විමර්ශන කොට්ඨාශය (CTID) මේ වසර තුලදී දෙවතාවක්ම ප්‍රශ්න කර තිබේ.

පළාත් බද වාර්තාකරුවන් පවසන්නේ දෙසැම්බර් 4 වැනිදා පෙරවරු 10.00 සිට පස්වරු 12.30 තෙක් ත්‍රස්ත මර්දන හා විමර්ශන කොට්ඨාශයේ ත්‍රිකුණාමලය ඒකකය විසින් ත්‍රිකුණාමලය, නාරායණපුරම් ප්‍රදේශයේ පදිංචි හැට හැවිරිදි නවරත්තිනරාජා අංජලිදේවිගෙන් ප්‍රශ්න කර ඇති බවයි.

‪නිශ්චිත හේතුවක් සඳහන් නොකරමින් සිදු කර තිබු කැදවීමට අනුව ත්‍රස්ත මර්දන හා විමර්ශන කොට්ඨාශයේ ත්‍රිකුණාමලය ඒකකයට ගිය ඇයට එහි නිලධාරීන් දැනුම් දී ඇත්තේ රටේ ඖෂධ හිගයක් පැවැති 2022 වසරේදී ඊට විසදුම් ඉල්ලා ත්‍රිකුණාමලයේදී ආණ්ඩුවට එරෙහිව විරෝධතාවයක් දියත් කිරීම සම්බන්ධයෙන් ප්‍රකාශ සටහන් කර ගැනීමට ඇය කැඳවන ලද බවයි.

රනිල් වික්‍රමසිංහ පාලනය පැවති 2024 වසරේ පෙබරවාරි 7 වැනිදාත් ඇයගෙන් ඒ සම්බන්ධයෙන්ම ත්‍රස්ත මර්දන හා විමර්ශන කොට්ඨාශය ප්‍රකාශ සටහන් කරගෙන තිබු බවයි පළාත් බද වාර්තාකරුවන් පවසන්නේ.

එවැනි විරෝධතාවයක් දියත් කිරීමට හේතු කවරේදැයි ත්‍රස්ත මර්දන හා විමර්ශන කොට්ඨාශයේ නිලධාරීන් සිදු කළ ප්‍රශ්න කිරීම් හමුවේ නවරත්තිනරාජා අංජලිදේවි සදහන් කර ඇත්තේ ගොවීන් සිය ගැටළු වලට විසදුම් ඉල්ලා විරෝධතා දියත් කරන අතර, අනිකුත් පිරිස්ද තමන් මුහුණ දී සිටින ගැටළු වලට විසදුම් ඉල්ලා විරෝධතා දියත් කරන අයුරින්ම තමන්ද ඖෂධ හිගයට විසදුම් ඉල්ලා විරෝධතා දියත් කළ බවයි.

නවරත්තිනරාජා අංජලිදේවිගේ විදේශ ගමන් බලපත්‍ර අංකය ඇතුළු ඇයගේ පුද්ගලික විස්තර අතිතැව සිටි ත්‍රස්ත මර්දන හා විමර්ශන කොට්ඨාශයේ ත්‍රිකුණාමලය ඒකකයේ නිලධාරීන් ඇය ස්විට්සර්ලන්තය ඇතුළු විදෙස් රටවල සංචාර වල නිරත වීම සම්බන්ධයෙන්ද ප්‍රශ්න කර තිබේ.

ප්‍රකාශයක් සටහන් කර ගැනීම වෙනුවෙන් ත්‍රස්ත මර්දන හා විමර්ශන කොට්ඨාශයේ ත්‍රිකුණාමලය ඒකකයට දෙසැම්බර් 4 වැනිදා පැමිණෙන ලෙස දන්වමින් පොලිස් 256 පෝරමයෙන් ත්‍රස්ත මර්දන හා විමර්ශන කොට්ඨාශයේ ත්‍රිකුණාමලය ඒකකයේ ස්ථානාධිපතිවරයාගේ අත්සනින් යුතුව දෙසැම්බර් 2 වැනිදා නිකුත් කළ පනිවුඩය සමාජ මාධ්‍ය ඔස්සේ ප්‍රචාරය වී තිබීම සම්බන්ධයෙන්ද ඇයගෙන් ප්‍රශ්න කර තිබේ.

තමාට සිදු කර ඇති කැදවීම සම්බන්ධයෙන් නීති උපදෙස් ගැනීම සදහා තම නීතිඥයාට පමණක් එම නිවේදනය යොමු කළ බව පවසා ඇති නවරත්තිනරාජා අංජලිදේවි ත්‍රස්ත මර්දන හා විමර්ශන කොට්ඨාශයේ නිලධාරීන්ට වැඩි දුරටත් අවධාරණය කර ඇත්තේ එය සමාජ මාධ්‍ය වලට නිකුත් වු ආකාරය සම්බන්ධයෙන් තමන් දැනුවත් නොමැති බවයි.

ත්‍රස්ත මර්දන හා විමර්ශන කොට්ඨාශයේ ත්‍රිකුණාමලය ඒකකය විසින් මේ වන විට සිදු කරනු ලබන විමර්ශනයට අදාලව තව දුරටත් ප්‍රකාශ ලබා දීම සදහා ඉදිරි දිනකදීද ඇයට යළි එම ඒකකය වෙත පැමිණිමට සිදු වනු ඇති බවටත් එම නිලධාරීන් ඇයට දැනුම් දී තිබේ.

රාජ්‍ය නොවන සංවිධානයක හිටපු ක්‍රියාකාරිනියක වන නවරත්තිනරාජා අංජලිදේවි මේ වන විටත් ප්‍රදේශයේ කාන්තා අයිතිවාසිකම් වෙනුවෙන් වැඩ කටයුතු කරමින් සිටින බව පළාත් බද වාර්තාකරුවෝ පවසති.