පසුගිය මැදින් පොහොය දිනයේ දී බෞද්ධ පිළිවෙතකට අනුව රාමඤ්ඤ දේශයෙන් මුහුදට පුද කරන ලද බවට විශ්වාස කෙරෙන යාත්‍රාවක් මේ වසරේ දුරුතු පෝයට දෙදිනකට පසු උතුරු වෙරළට ගොඩ ගසා තිබේ.
සෑම වසරකට මැදින් පොහොය දිනයේ මියන්මාර බෞද්ධයන් විසින් වෙසක් උත්සවයට පමණක් දෙවැනි කොට සලකන ටබෝං මහා පුණ්‍යෝත්සවයේ අංගයක් ලෙසින් මෙම පාරුව මුහුදට පා කර ඇත්තේ 2024 වර්ෂයේ මාර්තු 24 වැනි දිනයි.
බුදුන් වහන්සේ ශ්‍රී ලංකාවට පළමු වරට වැඩිය දිනය ලෙස ශ්‍රී ලාංකික බෞද්ධයන් සලකන දුරුතු පොහොයදාට දෙදිනකට පසුව යාපනයේ වඩමාරච්චි නැගෙනහිර නාගර් කොවිල් වෙරළ තීරයට ගොඩගසා ඇති මෙම යාත්‍රාවේ බුදු පිළිම කිහිපයක්ම දැකගත හැකිය.
මියන්මාර වර්ෂයෙන් 1385 ටබෝං පෝදා මෙම පාරුව මහ සයුරට පුද කර ඇත්තේ උඔලාන් ග්‍රාමයේ බෞද්ධ පවුලක් විසින් බව බුරුම බසින් ලියැවුණු පුවරුවල සඳහන් වේ.
මීට සමාන යාත්‍රා දෙකක් පසුගිය දෙසැම්බර් 31 වැනිදා වාලච්චේන සහ ත්‍රිකුණාමලය වෙරළට ගොඩගසා තිබුනි.
අද මියන්මාරය නමින් හැඳින්වෙන රට අතීතයේ හදුන්වනු ලැබුවේ රාමඤ්ඤ දේශය ලෙසයි. එකොලොස් වැනි සියවසේ පොලොන්නරුව පාලනය කළ පළමු විජයබාහු රජු විසින් ඉමහත් පිරිහීමට ලක්ව තිබු බෞද්ධ ශාසනය නැවත නගා සිටුවීම සඳහා කළේ එරටින් භික්ෂුන් පිරිසක් ගෙන්වා උපසම්පදාව පිහිටුවීමයි.
ලක්ෂයක පමණ අනවසර සංක්‍රමණිකයන් පිරිසක් ඉදිරි දිනවලදී මියන්මාරයෙන් මෙරටට පැමිණිමට නියමිතව ඇති බවට ආනන්ද විජේපාල අමාත්‍යවරයා පසුගියදා පාර්ලිමේන්තුවේදී සදහන් කළත් එකදු සරණාගතයකු හෝ නාගර් කෝවිල් වෙරළ තීරයට ගොඩ ගැසු මෙම යාත්‍රාවෙන් මෙරටට පැමිණි බවක් දැන ගන්නට නැති බව එහි ගිය ප්‍රදේශවාසීහු පවසති.
Facebook Comments
