ලංකා මුහුදේ මාළු බෑමට ආ ධීවරයන්ට වෙඩි වැදී ඉන්දියාවෙන් දොස්

ඉන්දු ලංකා ධීවර අර්බුදය මානුෂීය ආකාරයකින් විසඳිය යුතු බවට දෙරටේ රාජ්‍ය නායකයන් එකඟවී දෙමසක් පිරෙන්නටත් මත්තෙන් උතුරු මුහුදේ අනවසරයෙන් මසුන් මරන්නට ආ ඉන්දීය ධීවරයන් දෙදෙනෙක් ශ්‍රී ලංකා නාවික හමුදා වෙඩි පහරින් තුවාල ලැබීම දිල්ලි පාලනය විසින් ශ්‍රී ලංකාවට දොස් පැවරීමට තුඩු දී තිබේ.

එම ඉන්දීය ධීවර යාත්‍රාව ජනවාරි 27 දා රාත්‍රී යාමයේ නාවික හමුදා භාරයට ගැනීමට යාත්‍රාවට ගොඩවූ නාවික හමුදා නිලධාරියකුගේ ගිනි අවිය ධීවරයන් විසින් උදුරා ගන්නට තැත් කළ අවස්ථාවේ ‘ගිනි අවිය ක්‍රියාත්මක වී’ ධීවරයන් දෙනාට තුවාල සිදුවූ බව නාවික හමුදාව පවසයි.

ඉන්දීය ධීවරයන්ට වෙඩි උණ්ඩ දෙකක් වැදී ඇති බව නාවික හමුදා ප්‍රකාශක කොමදෝරු බුද්ධික සම්පත් ප්‍රකාශ කර තිබේ.

ශ්‍රී ලංකා නාවික හමුදාව සිය රටේ ධිවරයන්ට සිදුකළ වෙඩි තැබීම සම්බන්ධයෙන් ඉන්දීය රජය පසුදාම ශ්‍රී ලංකා රජයට විරෝධය පළකර ඇත.

“නව දිල්ලියේ සිටින වැඩ බලන ශ්‍රී ලංකා මහ කොමසාරිස්වරයා අද උදෑසන ඉන්දීය විදේශ කටයුතු අමාත්‍යාංශයට කැඳවා සිදුවීම සම්බන්ධයෙන් දැඩි විරෝධය පල කරන ලදී. කොළඹ අපේ මහ කොමසාරිස් කාර්යාලය විසින් ශ්‍රී ලංකා රජයේ විදේශ කටයුතු අමාත්‍යාංශය හමුවේ මෙම ප්‍රශ්නය මතු කර ඇත,” යි ඉන්දීය විදේශ අමාත්‍යාංශය අඟහරුවාදා (28) ප්‍රසිද්ධියට පත් කළ නිවේදනයක දැක්වේ.

උතුරේ වාර්තාකරුවන් පවසන්නේ තුවාල ලැබු බාහු සහ සෙන්තමිල් යන ඉන්දීය ධිවරයන් දෙදනා යාපනය ශික්ෂණ රෝහල් ප්‍රතිකාර ලබන බවයි.

යාපනයේ පිහිටි ඉන්දියානු මහකොමසාරිස් කාර්යාලයේ නියෝජ්‍ය මහකොමසාරිස් සායි මුරලි මෙන්ම ජාතික ජන බලවේගයේ යාපනය දිස්ත්‍රික් පාර්ලිමේන්තු මන්ත්‍රී කරුණානාදන් ඉලන්කුමරන් ද ජනවාරි 28 වැනිදා එම රෝහලට ගොස් ධීවරයන් දැකබලාගෙන තිබුනි.

තුවාල කරුවන්ගේ සුවදුක් බැලීමට රෝහලට ගිය ජාතික ජන බලවේගයේ පාර්ලිමේන්තු මන්ත්‍රීවරයා ප්‍රතිකාර ලබන ඉන්දීය ධීවරයකුගෙන් ප්‍රශ්න කර තිබුනේ මුහුදේ මසුන් මරන ආකාරය ගැනයි.

“ශ්‍රී ලංකා බෝඩර් එකට ටීම් එකක් විදිහට කී දෙනෙක් ආවද?, ඔයාලාව විතරක් දාලා ගියේ නේද?, බය වෙන්න එපා. ප්‍රශ්නයක් නැහැ. ටාගට් එකට වැඩියෙන් ඇල්ලුවොත් පඩිය වැඩිවෙනවානේ? ඒකටනේ මෙහෙට එන්නේ? මේ දැල ඉන්දියාවේ තහනම් නේද? බොටම් ට්‍රෝලර් ඉන්දියාවේ තහනම් කරලා. නමුත් දැකලා නැ වගේ ඉන්නවා නේ? අපේ ධීවරයෝ කියනවා ඔයලා දැල් කපාගෙන යනවා කියලා ඒක ඇත්තනේ.”යනාදී ප්‍රශ්න මාලාවක් කරුණානාදන් ඉලන්කුමරන් මන්ත්‍රීවරයා නගද්දී ඉන්දීය ධීවරයා අසරණව සිටින ආකාරය පළාත්බද මාධ්‍යවේදීන් රූගත කළ දර්ශනවල දැකගත හැකිය.

ධීවරයන් 13ක් නාවික හමුදා භාරයට

ශ්‍රී ලංකා නාවික හමුදාව පවසන්නේ 2025 ජනවාරි 27 වැනිදා යාපනය වැල්වැටිතුරෙයි ප්‍රදේශයට ඔබ්බෙන් වු ශ්‍රී ලංකාවට අයත් මුහුදු සීමාව තුළට ඇතුළු වී නීතිවිරෝධී ධීවර කටයුතු මෙහෙයවමින් මත්ස්‍ය තොග රැස් කරමින් සිටි එක් ඉන්දීය ධීවර යාත්‍රාවක් සමඟ ඉන්දීය ධීවරයන් දහතුන් දෙනකු නාවික හමුදා භාරයට ගත් බවයි.

අත් අඩංගුවට ගැනීමට යාමේදී හමුදා ගිනි අවියකින් ඉන්දීය ධිවරයන් දෙදෙනෙකු තුවාල ලැබු ආකාරය නාවික හමුදාවේ පැහැදිලි කර ඇත්තේ පහත අයුරිනි.

“එහිදි නාවික හමුදාව එම යාත්‍රාව වෙත ගොඩවීම වැළැක්වීම සඳහා ඊට අවනත නොවි, නිත්‍යණූකූල රාජකාරීයට බාධා පමුණූවා, ඊට විශාල ප්‍රථිරෝධයක් දක්වමින් ආක්‍රමණශීලි ලෙස එම ධීවර යාත්‍රාව හසුරවමින් ඉන්දීය ධීවරයින් කලහාකාරීව හැසුරුණු අතර, නාවික හමුදාව වෙත පැවරී ඇති බලතල අනුව එම යාත්‍රාවට ගොඩවීමේදී, එම ධීවරයින් පිරිස සමූහයක් ලෙස ආක්‍රමණශිලීව පහරදීමට තැත්කර, නාවික හමුදා නිලධාරීන්ගේ ජීවිතයට අවධානමක් ඇති කරමින්, නාවික හමුදා නිලධාරියෙකු සතුව තිබු ගිනි අවියක් උදුරාගැනීමට උත්සහ කිරීමේදී, එම ගිනි අවිය ක්‍රියාත්මක වීමෙන් ධීවරයින් දෙදෙනෙකු හට සුළු තුවාල සිදු විය.”

නාවික හමුදාව විසින් එම ධීවරයන් දෙදෙනා වෙත මූලික ප්‍රථමාධාර ලබා දීමෙන් පසු, වැඩිදුර ප්‍රතිකාර සඳහා කඩිනමින් යාපනය ශික්‍ෂණ රෝහල‍ වෙත ඇතුලත් කිරීමට කටයුතු කළ අතර නාවික හමුදාව විසින් සිද්ධිය සම්බන්ධයෙන් කන්කසන්තුරය පොලීසිය වෙත පැමිණිල්ලක් ද සිදු කළ බව එහි වැඩි දුරටත් සදහන්ව තිබේ.

‘මානුෂීය ආකාරයකින්’ විසඳිම

ශ්‍රී ලංකාවේ ජනාධිපතිවරයාගේ පළමු ඉන්දීය නිල සංචාරය පැවැති 2024 දෙසැම්බර් මස මැදදි ඉන්දීය අගමැතිවරයා සමග නව දිල්ලියේදී පැවැත්වුණු සාකච්ඡාව අතරතුරදී දෙරට නායකයන් ධීවර ගැටලුව ‘වැදගත්’ ලෙස හඳුනාගෙන තිබුණි.

“ධීවරයන්ගේ ගැටලුව මානුෂීය ආකාරයකින් විසඳිය යුතු බව අපි සාකච්ඡා කළා,” යැයි ඉන්දීය අගමැතිවරයා පවසා තිබුනේ ශ්‍රී ලංකා ජනාධිපතිවරයා සමග පැවැත්වූ මාධ්‍ය හමුවකදීය.

කෙසේවෙතත්, ධීවර, ජලජ සහ සාගර සම්පත් අමාත්‍ය රාමලිංගම් චන්ද්‍රසේකර් 2024 දෙසැම්බර් 27 වැනි සිකුරාදා යාපනයේ මාධ්‍යවේදීන් හමුවේ පවසා තිබුනේ මානුෂීය ආධාර ලබා දීමක් හෝ ලබාගැනීමක් සම්බන්ධයෙන් මින් ඉදිරියට සාකච්ඡා සිදු නොකරන බවයි.

“කොහොම උනත්, අපි මානුෂීය ආධාර දෙන්න හරි ලබාගන්න හරි සාකච්ඡා පවත්වන්න යන්නේ නැහැ.”

ධීවර අමාත්‍යාංශයේ නිලධාරීන් සහ ඉන්දීය නිලධාරීන් අතර සාකච්ඡා නතර නොවන නමුත් ඒ සාකච්ඡා දිගටම සිදු කෙරෙන්නේ තාක්ෂණික, වෘත්තීය ඇතුලු වෙනත් කාරණා සම්බන්ධයෙන් පමණක් බවත් අමාත්‍යවරයා එහිදි තව දුරටත් පවසා තිබුනි.

2025 ජනවාරි 28 වැනි අගහරුවාදා අමාත්‍ය මණ්ඩල තීරණ මාධ්‍යවේදීන්ට දැනුම් දෙමින් කැබිනට් මාධ්‍ය ප්‍රකාශක අමාත්‍ය වෛද්‍ය නලින්ද ජයතිස්ස පවසා සිටියේ ඉන්දු ශ්‍රී ලංකා ධීවර ගැටළුව විසදීම රාජ්‍ය තාන්ත්‍රික මට්ටමේ පමණක් තිබෙන ප්‍රශ්නයක් නොවන බවයි.

“රාජ තාන්ත්‍රිකව කොතරම් සාකච්ඡා කරත් අපිට මේකෙදී අර ප්‍රශ්නය මම හිතන්නේ නෑ නිට්ටාවටම සුව කරගන්න පුළුවන් කම ලැබෙයි කියලා. නමුත් අපේ මුහුදු සම්පත සහ ධීවරයා ආරක්ෂා කරන්න හැම තිස්සෙම අපි මේ ගැන මැදිහත් වෙමින් තමයි ඉන්නේ. ”

ධීවර, ජලජ සහ සාගර සම්පත් අමාත්‍ය රාමලිංගම් චන්ද්‍රසේකර් ඉන්දීය ධීවරයන් උතුරු මුහුදේ මාලුබෑම දකින්නේ සාපරාධී ආක්‍රමණයක් ලෙසිනි.