අරුණ දමිත් උදයංග පතිරණ හෙවත් සමයං නැමැති පාතාල සාමාජිකයා ඇතුලු 07 කට මරු කැඳවමින් බන්ධනාගාර බස් රථයට එල්ල වු ප්‍රහාරයේ සම්බන්ධව යහපාලන රජයේ ඇමතිවරු දෙදෙනෙක් අතර මත ගැටුම් ඇති වී තිබේ.
ප්‍රහාරය එල්ලවු දිනයේ ඒ සම්බන්ධව නිවේදනයක් නිකුත් කරමින් බන්ධනාගාර කටයුතු පිළිබඳ අමාත්‍ය ඩී එම් ස්වාමිනාදන් කියා සිටියේ සිරකරුවන් පිරිස ප්‍රවාහනය කිරීමේදී පොලිස් ආරක්ෂාව ලබා දී තිබුණේ නම් බන්ධනාගාර රථයට එල්ල වූ ප්‍රහාරය වළක්වාගත හැකිව තිබූ බවට තමන් විශ්වාස කරන බවයි.
මෙවැනි බරපත චෝදනා ලද සිරකරුවන් ප්‍රවාහනයේදී පොලිස් ආරක්ෂාව ලබා ගන්නා බවත් මෙම සිරකරුවන් ප්‍රවාහනයට පොලිස් ආරක්ෂාව ඉල්ලා සිටි නමුත් පොලිස් නිලධාරීන්ගේ හිඟකම නිසාවෙන් ආරක්ෂාව ලබාදිය නොහැකි බවට පොලිසිය විසින් දැනුම් දී තිබු බවටයි ඇමතිවරයා සිය නිවේදනය මඟින් පෙන්වා දී තිබුණේ.
සැකකරුවන්ගේ වගකීම බන්ධනාගාරයට
කෙසේ වෙතත් බන්ධනාගාර කටයුතු පිළිබඳ අමාත්‍ය ඩී එම් ස්වාමිනාදන් පොලිසිය වෙත එල්ල කරන චෝදනා සම්බන්ධයෙන් නිවේදනයක් නිකුත් කරමින් නීතිය හා සාමය සහ දක්ෂිණ සංවර්ධන අමාත්‍ය සාගල රත්නායක පෙන්වා දෙන්නේ සිදුවීමේ වගකීම ශ්‍රී ලංකා පොලීසිය වෙත පවරා බන්ධනාගාර දෙපාර්තමේන්තුව වගකීම විතැන් කිරීමට කටයුතු කිරීම වෙනුවට ආයතනයන්හි වගකීම, කාර්යභාරය සහ අඩුපාඩු හඳුනාගෙන එවැනි අවස්ථාවන්ට සාර්ථකව මුහුණදීමට කටයුතු කළ යුත් බවයි.
රැඳවියන් පස්දෙනෙකු සහ බන්ධනාගාර නිලධාරීන් දෙදෙනෙකු ජිවිතක්ෂයට පත්වූ අවාසනාවන්ත සහ බරපතල සිදුවීම පිළිබඳව කණගාටුව පළ කරන ඇමති සාගල ව්‍යවස්ථාපිත නීතිමය රාමුව යටතේ බන්ධනාගාර ගත සැකකරුවන්ගේ භාරය සහ ආරක්ෂාවේ සම්පුර්ණ වගකීම බන්ධනාගාර දෙපාර්තමේන්තුව වෙත පැවරෙන බවටද සිය නිවේදනය මඟින් අවාධරය කර තිබේ.
මෙවැනි අවස්ථාවකදී පිළිපැදිය යුතු ආරක්ෂක ක්‍රම විධිවිධානයන් පිළිබඳවද පොලිස් නිලධාරීන් සහ බන්ධනාගාර නිලධාරීන් වෙත අවශ්‍ය පුහුණුව මෙන්ම ස්වයංක්‍රිය ගිනි අවි ලබාදී තිබියදී මෙවැනි අවාසනාවන්ත සිද්ධීන් පිළිබඳව පොලීසියට සහ බන්ධනාගාර දෙපාර්තමේන්තුවට තම සාමුහික වගකීමෙන් මිදිය නොහැකි බව පවසන ඇමතිවරයා ප්‍රහාරයට සාර්ථකව මුහුණදීමට හෝ එය වැලක්වීමට අවශ්‍ය කටයුතු නොකිරීම සම්බන්ධයෙන් අදාළ බන්ධනාගාර හා පොලිස් නිලධාරින්ට එරෙහිව පියවර ගත යුතු බවටද තම නිවේදනයේ සඳහන් කර ඇත.
Facebook Comments
