උතුරු හා නැගෙනහිර ප්‍රදේශවල පෙරසවි තහඩු නිවාස යෝජනා ව්‍යාපෘතිය අත්හිටුවන නියෝගයක් නිකුත් කරන ලෙස ඉල්ලා දෙමළ ජාතික සන්ධානයේ පාර්ලිමේන්තු මන්ත්‍රී නීතීඥ එම් ඒ සුමන්තිරන් 13 බ්‍රහස්පතින්දා ශ්‍රේෂ්ඨාධිකරණයට මූලික අයිතිවාසිකම් පෙත්සමක් ගොනු කර තිබේ.
මෙවැනි නිවාස සෑදීමේදී වැයවෙන වියදම ,නාස්තිය මෙන්ම එහි ඇති අඩුපාඩුකම් එම ප්‍රදේශවල සිවිල් නියෝජිත සහ ප්‍රජාව විසින් පෙන්වා දී ඇති අතර ඒ පිළිබඳව තමන් පාර්ලිමේන්තුව ද දැනුම්වත් කළ බව සුමන්තිරන් මන්ත්‍රීවරයා සිය පෙත්සමේ සඳහන් කර ඇත.
මෙම ව්‍යාපෘතියට යන වියදමින් ගඩොල් සහ සිමෙන්ති යොදාගනිමින් සාදන නිවාස මීට වඩා වැඩි ප්‍රමාණයක් සෑදිය හැකි බවයි පෙත්සම්කාර මන්ත්‍රීවරයා පෙන්වා දෙන්නේ.
බන්ධනාගාර ප්‍රතිසංස්කරණ හා නැවත පදිංචි කිරීමේ අමාත්‍ය ඩී.එම්.ස්වාමිනාදන්, ලක්සම්බර්ග් හි ආසලර් මිත්තල් කන්ස්ට්‍රක්ෂන් ෆ්‍රාන්ස් නැමැති ඉදිකිරීම් සමාගම සහ නීතිපතිවරයා මෙම පෙත්සමෙන් වගඋත්තරකරුවෝ කරනු ලැබ සිටිති.
ජනපතිගේ විරෝධය
යුද්ධයෙන් නිවාස අහිමි වු යාපනයේ ජනතාව වෙනුවෙන් රජය විසින් ඉදි කරමින් පවතින පෙරසවි තහඩු නිවාස යෝජනා ක්‍රමය තාවකාලීකව අත් හිටුවන ලෙස ජනාධිපතිවරයාද මීට පෙර උපදෙස් දී තිබුණි.
එම නිවාස යෝජනා ක්‍රමය වාසයට නුසුදුසු බව මෙන්ම උතුරේ කාලගුණික තත්වයට හා සංස්කෘතියට නොගැලපෙන බව මහ ඇමැති විග්නේෂ්වරන් ජනාධිපතිවරයාගේ අවධානයට යොමු කිරිමෙන් පසු මෙම යෝජනාව තාවකාලික අත්හිටුවන ලදී.
එහිදි යෝජිත වානේ තහඩු පූට්ටු නිවාස තුළ සාම්ප්‍රදායික ක්‍රමයට ආහාර පිසගැනීමට පවා නොහැකි වන පදිංචිකරුවන්ට ගෑස් මිලදී ගැනීම සදහා ඔවුන්ගේ පුද්ගලික මුදල් වැය කිරීමට සිදුවන බවද මහ ඇමතිවරයා ජනපතිගේ අවධානයට යොමු කළේය.
තම ජීවන සංස්කෘතියට නුහුරු එම තහඩු නිවාස ඉදි කිරීම අත් හිටුවා තමන්ට ගැලපෙන ආකාරයේ නිවාස ගොඩනගා දෙන ලෙස එම ප්‍රදේශයේ ජනතාව ඉල්ලා සිටි.
Facebook Comments
