යෝජිත නව ව්‍යවස්ථාව සකස් කිරීමට විරෝධය පෑ සංඝ සභා දෙකෙන් එක් සංඝ සභාවක් තම විරෝධය හකුලා ගන්නා බවට දැනුම් දී තිබේ.
බලය බෙදා හරින ව්‍යවස්ථාව වහාම අත්හිටුවන ලෙස කල නිවේදනය ඊට පසුදාම හකුළා ගනිමින් මල්වතු පාර්ශවයේ දිඹුල්කුඹුරේ විමලධම්ම අනුනාහිමියන් වදාළේ එය මල්වතු පාර්ශවයේ මහනාහිමියන් ප්‍රමුඛ කාරක සංඝ සභාවේ ඒකමතික තීන්දුවක් නොවන බවයි.
තමන් කල ප්‍රකාශය නැවත හකුළා ගනිමින් “භික්ෂුන් වහන්සේ කිහිප නමක් රැස්වී කළ සාකච්ඡාවක් සම්බන්ධයෙන් තමන් වහන්සේ විසින් පල කරන ලද්දේ පුද්ගලික අදහසක්” බව මාධ්‍ය වෙත කියා සිටියේය.
සියම් නිකායේ මල්වතු සහ අස්ගිරි පාර්ශව දෙකේ කාරක සංඝ සභා 18 බදාදා මහනුවර දළදා මාලිගාවට රැස්වී නව ව්‍යවස්ථා සම්පාදනයට එරෙහි වීමට තීන්දුවක් සම්මත කළ බව දිඹුල්කුඹුරේ විමලධම්ම සහ මැදගම ධම්මානන්ද අනුනාහිමි දෙනම විසින් නිවේදනය කරන ලදී.
මල්වතු හා අස්ගිරි මහනාහිමිවරුන් දෙනම එම රැස්වීමට සහභාගී නොවු බව තහවුරු කරන අනුනා හිමි තමන් වහන්සේට අමතරව මල්වතු පාර්ශවයෙන් සහභාගි වූයේ ශ්‍රී දළදා මාලිගාවේ තේවාව භාර තිබ්බටුවාවේ මේධංකර හිමියන් පමණක් බව කියා සිටියේය.
අගමැතිගෙන් මාධ්‍යට දොස්
සියම් නිකායේ මල්වතු සහ අස්ගිරි විහාර දෙකේ කාරක සංඝ සභා විසින් ව්‍යවස්ථා සම්පාදනයට එරෙහිව 18 බදාදා සම්මත කර ගත් යෝජනාව ජාතික පුවත්පත් කිහිපයක් මල්වතු අස්ගිරි මහා නායක හිමිවරුන්ගේ ඡායාරූප සහිතව පල කර ජනයා නොමඟ යාව ඇති බවට අගමැති රනිල් වික්‍රමසිංහ 19 බ්‍රහස්පතින්දා මාධ්‍යයට දොස් කියා තිබුණි.
ලංකාදීප,ඩේලි මිරර් සහ දිවයින වැනි ජාතික පුවත්පත් කිහිපයක් මාධ්‍ය වෙත ප්‍රදර්ශනය කරමින් “මෙතන දාලා තියෙනවා මල්වත්තයි අස්ගිරියයි මහ නායක ස්වාමින් වහන්සේලා දෙනමම ගියෙ නැහැ මල්වත්තේ ස්වාමින් වහන්සේ ලංකාවෙත් නැහැ” යි අගමැතිවරයා කියා සිටියේය.
නව ව්‍යවස්ථාව සම්බන්ධව මහනාහිමියන්ගේ අදහස දැන ගත හැකි වන්නේ උන්වහන්සේ මෙරටට වැඩම කිරීමෙන් පසුව බව පවසන මල්වතු පාර්ශවයේ දිඹුල්කුඹුරේ විමලධම්ම අනුනාහිමියන් මහනාහිමියන් අනුමත කරන තුරු එය සියම් නිකායේ මල්වතු පාර්ශවය අලුත් ව්‍යවස්ථාවක් සම්පාදනය කිරීමට එරෙහිව ගත් තීන්දුවක් ලෙස පිළිගැනීම වැරදි බව වැඩිදුරටත් ප්‍රකාශ කර තිබේ.
Facebook Comments
