නඩු නැතිව එකොලොස් දහසක් හිරේ – එක්සත් ජාතීන්

ශ්‍රී ලංකාවේ බන්ධනාගාර තුල එකොලොස් දහසකට වැඩි පිරිසක් නඩු නැතිව අතිශය දීර්ඝ කාලයක් සිරගතකොට තබා සිටින්නන් බව රජයේ ආරාධනයෙන් කරණ ලද දස දින නිල සංචාරයක් හමාරකරමින් අත්තනෝමතික රඳවා තබා ගැනීම පිළිබඳ එක්සත් ජාතීන්ගේ ක්‍රියාකාරී කමිටුවේ විශේෂඥයන් කොළඹ දී කියා සිටියේය.

ශ්‍රී ලංකාවේ බන්ධනාගාරගත සමස්ත ජනගහනය වන 20,598 න් අඩකට වැඩි පිරිසක් වන 11,009 නඩු නොමැතිව සිරකර තැබීම කමිටුවේ ප්‍රධානී ආචාර්ය හොසේ අන්තෝනියෝ ගෙවාරා බර්මියුඩේස් ගේ නායකත්වයෙන් යුත් ත්‍රිපුද්ගල මණ්ඩලයේ විවේචනයට ලක්වී තිබුනි.

නඩු පැවරීමට පෙර අවුරුදු 3-4 ක් රඳවා තබා ගැනීම පොදුවේ සිදු වන අතර ඇතැම් අවස්ථාවල එය අවුරුදු දහයක් දක්වා කාලයක් තරම් දික් වන බවට එක්සත් ජාතීන්ගේ විශේෂඥයෝ චෝදනා කරති.

“ඉන් අනතුරුව ඇත්තේ දීර්ඝ නඩු විභාගයකි. නඩු පැවරීමට පෙර රඳවා තබාගත් කාලය අවසාන සිර දඬුවම නියම කිරීමේදී සැමවිටම සැලකිල්ලට නොගන්නා අතර එය විනිසුරු ගේ අභිමතය පරිදි වේ.” යි විශේෂඥයෝ පවසති.

දෙමළාට එරෙහි නීතිය

ත්‍රස්තවාදය වැළක්වීමේ පනත යටතේ අත් අඩංගුවට ගනු ලබන පුද්ගලයන් සම්බන්ධයෙන් ගත් කල සාමාන්‍ය තත්වයටත් වඩා දීර්ඝ කාලයක් නඩු නැතිව සිරගත කර තබාගන්නා බව නිරීක්ෂණය කර ඇති ක්‍රියාකාරී කමිටුව, ඒ පනත යොදාගෙන අවුරුදු 10 සිට අවුරුදු 22ක් තරම් කල් රඳවා තබා සිටි පුද්ගලයන් පිළිබඳව වාර්තා කර තිබේ.

ත්‍රස්වාදය වැළැක්විමේ පනත දෙමළ ජනතාවට වෙනස්කම් පෑමට යොදාගන්නා බවට එක්සත් ජාතීන්ගේ ක්‍රියාකාරී කමිටුවේ විශේෂඥයෝ චෝදනා කරයි.

ශ්‍රී ලංකාවේ බලධාරීන් විසින් සපයා ඇති සංඛ්‍යාලේඛන අනුව ත්‍රස්ත පනත යොදාගෙන රිමාන්ඩ් ගතකර ඇති සංඛ්‍යාව 69 කි. එයින් 59ක්ම දෙමළය. නඩු නැතිව රඳවාගෙන සිටින 17න් 10ක්ම දෙමළය.