ඔස්ලෝ සම්මුතිය ලෙසින් හැඳින්වෙන පොකුරු වෙඩි තහනම් කිරීම සඳහා වන ජාත්‍යන්තර සම්මුතියට යුද්ධයෙන් අවුරුදු නමයකට පසු ශ්‍රී ලංකාව එකඟතාව පල කර තිබේ.
ශ්‍රී ලංකාව විසින් 2018 මාර්තු 01 වනදා ඔස්ලෝ සම්මුතියට අත්සන් කල බව විදේශ කටයුතු අමාත්‍යංශය 02 සිකුරාදා නිවේදනය කළේය.
ඒ අනුව පොකුරු බෝම්බ සම්බන්ධ ජාත්‍යන්තර සම්මුතියට අත්සන් තැබූ 103 වෙනි රට බවට ශ්‍රී ලංකාව පත්වන බව ශ්‍රී ලංකා රජය පවසයි.
“සන්නද්ධ ගැටුම් පැවති අවධියේදී ශ්‍රී ලංකාව විසින් පොකුරු බෝම්බ භාවිත කළ බවට ඇතැම් පාර්ශ්ව විසින් විවිධ චෝදනා එල්ල කළද, ශ්‍රී ලංකා ආරක්ෂක අංශ විසින් පොකුරු බෝම්බ භාවිත කළ බවට කිසිදු සාක්ෂියක් නොමැති” වග ඔස්ලෝ සම්මුතියට එකඟතාව පල කිරීම සඳහා ජනාධිපති මෛත්‍රීපාල සිරිසේන ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලද බව රජයේ නිල වෙබි අඩවිය පවසයි.
යුද සමයේදී රජය විසින් “යුද මුක්ත කලාපය” ලෙස ප්‍රකාශයට පත් කරන ලද භූමියෙන් රුසියානු පොකුරු බෝම්බ ශේෂ සහ පුපුරා නොගිය පොකුරු උණ්ඩ හමුවු බවට බිම් බෝම්බ නිෂ්ක්‍රිය කිරීමේ ජාත්‍යන්තර ආයතනයක් වන හේලෝ ට්‍රස්ට් කියා තිබුණි.
කෙසේ වෙතත් එම චෝදනා සම්බන්ධයෙන් රජය කළ පරීක්ෂණයක් පිළිබඳ කිසිදු තොරතුරක් මේ දක්වා හෙළිවී නොමැත.
Facebook Comments
