ආගම්වාදී භේදබින්න වීම් හෝ ඒ ආශ්‍රිත ප්‍රචණ්ඩ ක්‍රියා ඇති විම වැළැක්වීමට පියවර ගන්නා ලෙස ශ්‍රී ලංකා මානාව හිමිකම් කොමිසම පොලිස් ප්‍රධානියාගෙන් ඉල්ලීමක් කර තිබේ.
පාස්කු ඉරිදා ප්‍රහාර වලින් පසුව රටේ උද්ගත වී ඇති වතාවරණය තුල පලිගැනිමේ අරමුණින් හෝ පටු දේශපාලන අරමුණු සාක්ෂාත් කර ගැනීමේ ප්‍රකෝපකාරී සිද්ධීන් විය හැකි බවට එම කොමිසම සභාපතිනිය පොලිස්පතිවරයාට ලිපියක් යොමු කරමින් අනතුරු අඟවා ඇත.
“රටේ උද්ගත වී ඇති වාතාවරණය තුල පලිගැනිමේ චේතනාවෙන් හෝ පටු දේශපාලන අරමුණු සාක්ෂාත් කර ගැනීම සඳහා ප්‍රකෝපකාරී ක්‍රියා වල යෙදෙන සමාජ විරෝධි පිරිස් හේතුවෙන් ඇති විය හැකි ප්‍රචණ්ඩත්වය රටට දරා ගැනීමට නොහැකි වන බැව් අප කවුරුත් පිළිගන්නා කරුණකි.” යනුවෙන් සභාපතිනි දිපිකා උඩුගමගේ අත්සනින් යුතුව යැවු ලිපියේ සඳහන් කර තිබේ.
පාස්කු ඉරිදා ප්‍රහාරයේ සැකකරුවන් පිළිබඳව විමර්ශන වලට මෙන්ම ආගම් විරෝධි ක්‍රියා ඇති වීම වළක්වා ගැනීමට අවධානය යොමු කරන ලෙසයි මානව හිමිකම් කොමිසම පොලිස්පති පුජිත් ජයසුන්දරගෙන් ඉල්ලා සිටින්නේ.
ආගම්වාදී පදනම මත නොසන්සුතා ඇති වු ප්‍රදේශ ඇත්නම් එවැනි ප්‍රදේශ වල ප්‍රජාවන් හා සාකච්ඡාවෙන් ගැටුම් විසඳා ගැනීමට තම කොමිසම ද මැදිහත් වන බවයි සභාපතිනි දිපිකා උඩුගම සිය ලිපියෙන් අවධාරණය කරන්නේ.
පාස්කු ඉරිදා ප්‍රහාරය පිළිබඳව ඉමහත් කම්පාවට පත්ව ඇති මානව හිමිකම් කොමිසම ප්‍රහාරයෙන් මිය ගිය පිරිස් වලට සහ ආරක්ෂක කටයුතු වලදී මිය ගිය නිලධාරින් හට සිය ශෝකය පළ කර සිටී.
Facebook Comments
