ගෝඨාභය ශ්‍රී ලාංකික දැයි තීන්දු කිරීම උසාවියට බාර කෙරේ

0
ඡායා -රොෂාන් චතුරංග

ශ්‍රී ලංකා පොදු ජන පෙරමුණේ ජනාධිපති අපේක්ෂක, ගෝඨාභය රාජපක්ෂ ශ්‍රී ලාංකික පුරවැසිභාවයේ වලංගුතාව අභියෝගයට ලක්කරමින් අභියාචනාධිකරණය වෙත ගොනුකර ඇති රිට් පෙත්සම විභාගයට ගැනීමට අධිකරණය තීන්දු කර තිබේ.

අදාළ පෙත්සම ඔක්තෝබර් මස 2, 3, 4 යන දින වල ත්‍රිපුද්ගල විනිසුරු මඩුල්ලක් ඉදිරියේ සලකා බැලීමට අභියාචනාධිකරණය 30 සඳුදා නියම කළේය.

ගෝඨාභය රාජපක්ෂ 2005 වසරේදී ද්විත්ව පුරවැසි භාවය ලබා ගෙන ඇත්තේ ක්‍රමවත් පිළිවෙළකට නොවන බැවින් ඔහු තවමත් අමෙරිකානු පුරවැසියකු වන බව සඳහන් කරමින්, ‘සිවිල් සංවිධාන එකමුතුව’ වෙනුවෙන් මහාචාර්ය චන්ද්‍රගුප්ත තේනුවර සහ ප්‍රවීන සාහිත්‍යවේදී ගාමිණී වියන්ගොඩ විසින් අභියාචනාධිකරණය හමුවේ පෙත්සමක් ගොනු කර තිබේ.

පුරවැසි පණතේ 19 වන වගන්තිය ප්‍රකාරව ගෝඨාභය රාජපක්ෂ ද්විත්ව පුරවැසිභාවය සදහා නිසි අයදුම්පතක් ඉදිරිපත් කර නොමැති බවට චෝදනා කරන පෙත්සම්කරුවන් එබැවින් ඔහුට ඇතැයි කියන ඊනියා ද්විත්ව පුරවැසි සහතිකය වංචනික හෝ අවලංගු සහ බලශුන්‍ය වන බැවින් එම සහතිකයේ නීත්‍යානුකූල වලංගුභාවයක් හෝ බලපෑමක් නොමැති බව ද සිය පෙත්සමින් කියා සිටී.

ඉදිරිපත් වු කරුණු සලකා බැලු අභියාචනාධිකරණය ගෝඨාභය රාජපක්ෂගේ විදේශ ගමන් බලපත්‍රය සහ ජාතික හැඳුනුම්පත්ට අදාළ තොරතුරු හා ලේඛන තිබේ නම් ඒවා මීළඟ දින අධිකරණය හමුවේ ඉදිරිපත් කිරීමට පියවර ගන්නා ලෙස ආරක්ෂක අමාත්‍යාංශයේ ලේකම්වරයා, ආගමන හා විගමන දෙපාර්තමේන්තුවේ පාලකවරයා, පුද්ගලයින් ලියාපදිංචි දෙපාර්තමේන්තුවේ කොමසාරිස්වරයා සහ රාජ්‍ය පරිපාලන හා ස්වදේශ කටයුතු ඇමති වජිර අබේවර්ධන හට නියෝග කර ඇත.

Facebook Comments