ශ්‍රී ලංකාවේ ශ්‍රමිකයන් 500කට ඊශ්‍රායලයේ රැකියා අවස්ථා ලැබී ඇති බව කම්කරු අමාත්‍යවරයා පවසයි.
අමාත්‍ය නිමල් සිරිපාලද සිල්වා අගෝස්තු 06 සිකුරාදා පාර්ලිමේන්තුවේ දී ඒ බව සදහන් කළේ පාර්ලිමේන්තු මන්ත්‍රී චමින්ද විජේසිරි යොමු කළ වාචික ප්‍රශ්නයකට පිළිතුරු දෙමිනි.
රැකියා සම්බන්ධයෙන් පුවත්පත් දැන්වීමක් පළ කර ඇති අතර සුදුසුකම් ලබා ඇති ශ්‍රමිකයන්ට මේ සඳහා ඉල්ලුම් කළ හැකි බව කම්කරු අමාත්‍යවරයා එහිදී වැඩි දුරටත් සදහන් කළේය.
ශ්‍රී ලංකාව සඳහා කොරියානු රජයේ විදේශ රැකියා අවස්ථා 4500ක් ලැබී ඇතත් පවතින කොවිඩ් වසංගතය හේතුවෙන් කොරියානු රජය ශ්‍රී ලංකාව, විදේශිකයන් ගෙන්වාගැනීමේ රතු ලැයිස්තුවට ඇතුළත් කර ඇති බැවින් එම රතු ලැයිස්තුවෙන් ශ්‍රී ලංකාව බැහැර වූ විගස මෙරට ශ්‍රමිකයන් කොරියාවේ රැකියා සඳහා යැවිය හැකි බව විදේශ රැකියා අමාත්‍යවරයා සඳහන් කරයි.
ජපානයේද මේ දිනවල පැවැත්වෙන ඔලිම්පික් ක්‍රීඩා තරගාවලිය හේතුවෙන් විදේශ ශ්‍රමිකයන් ගෙන්වා නොගන්නා බවද ඔහු වැඩි දුරටත් පවසා තිබේ.
වැඩිම විදේශීය ආදායම “රට විරුවන්ගෙන්”
ශ්‍රී ලංකාවට විදේශ මුදල් උපයා දෙන ප්‍රධානතම මාර්ගය “රට විරුවන් ලෙසින් ” විරුදාවලි ලත් විදේශ සේවා නියුක්තිකයන් බව අගනුවර පර්යේෂණ ආයතනයකින් 2020 වසරේ එළිදක්වන ලද වාර්තාවකින් හෙළි වී තිබුනි.
ශ්‍රී ලංකා මහ බැංකුවේ 2019 වසරේ සංඛ්‍යාලේඛන ඇසුරින් වෙරිටේ පර්යේෂණ ආයතනය 2020 වසරේ ජුනි මාසයේදී හෙළිදරව්ව කර තිබුනේ එම වසරේ විදෙස් ගත ශ්‍රමිකයන් මෙරටට උපයා දී ඇති මුදල ඇමරිකානු ඩොලර් කෝටි හැට හතක් බවයි. ආසන්න වශයෙන් රුපියල් කෝටි එක්ලක්ෂ විසි පන්දහසකට ආසන්න මුදලක් වන එය රටට ගලා ආ විදේශගත ධනයෙන් අඩකටත් වැඩිය.
එම වාර්තාවේ දැක්වෙන පරිදි විදේශගතව රැකියාවල නිරත වන ශ්‍රී ලාංකිකයන්ගෙන් සියයට හැත්තෑ පහකට වඩා සේවය කරන්නේ මැදපෙරදිග රටවලයි.
එහි වැඩිම ප්‍රතිශතයක් පෙන්නුම් කරන්නේ කුවේට් රාජ්‍යයි. එය සීයට විසි එකයි දශම දෙකකි.
ලොව පුරා ව්‍යාප්තව ඇති කොරෝනා වසංගත තත්වය හමුවේ විදෙස් ගත ශ්‍රී ලාංකිකයන් විශාල පිරිසක් වසංගත අවදානමට මුහුණ දී සිටිමත්, තවත් පිරිසක් ආපිට මව් රටට පැමිණ සිටීමත් නිසා මේ වන විට විදේශ සේවා නියුක්තිකයන් ශ්‍රී ලංකාවට උපයා දෙන විදේශ මුදල් ප්‍රමාණය සැලකිය යුතු මට්ටමකින් පහළ බැස තිබේ.
Facebook Comments
