බයිබලය මත දිවුරා ඇමරිකන් පුරවැසි භාවය ලබා ගත් පුද්ගලයන් බුද්ධ ධර්මය සුනු විසුනු කිරීමට ශ්‍රී ලංකාවේ ජන්ද බලය ඉල්ලීමට ඉදිරිපත් වී සිටින බවට වාමාංශික නායකයකුගේ දැඩි දෝෂ දර්ශනයට ලක්ව තිබේ.
තමන් ද උර දී බිහිකරන ලද රජය විසින් ඇති කරන ලද නීති ගරුක රට ඔවුන් විසින් විනාශ කිරිමට උත්සාහ දරන බවටයි නව සම සමාජ පක්ෂ නායක ආචාර්ය වික්‍රමබාහු කරුණාරත්න චෝදනා කරන්නේ.
ජනාධිපතිවරණයට ඉදිරිපත් වී සිටින ගෝඨාභය රාජපක්ෂ ඇමරිකානු පුරවැසි භාවය අත්හැර ඇති බවට කෙරෙන ප්‍රකාශ මේ වනවිට දැඩි මතබේදයට තුඩුදී තිබේ.
“ඇමරිකාවේ ගිහිල්ලා දිවුරුම් දීලා තියෙනවා බයිබලේ අතට අරගෙන. ආගම සුනු විසුනු කරලා දාලා. ඒ විදියෙ මිනිස්සු ඇවිල්ලා තමයි දැන් ජන්ද බලය ඉල්ලන්නේ,” යැයි නසසප නායකයා කියා සිටියේ රාජපක්ෂ පාලන සමයේ වැලිකඩ බන්ධනාගාරයේ සිරකරුවන් 27 දෙනෙකු මරා දැමීමට වසර හතක් සපිරිම නිමිත්තෙන් පැවති විරෝධතාවයකට එක්වෙමිනි.
ගෝඨාභය රාජපක්ෂ ආරක්ෂක ලේකම් ධුරය දරන සමයේ එසේ වැලිකඩ බන්ධනාගාරයට කඩා වැදී සිරකරුවන් මරා දමන ලද්දේ ඔවුන්ගේ වැරදි වසා ගැනිමේ අරමුණ ඇතිව බවට ආචාර්ය වික්‍රමබාහු චෝදනා කළේය.
සජිත් ප්‍රේමදාසට එරෙහිව ජනාධිපතිවරණයට ඉදිරිපත්වී ඇති ගෝඨාභය රාජපක්ෂ මිනීමරුවකු බවට චෝදනා කළ නසසප නායකයා “මේ රට පාලනය කිරිමට මිනිමරුවකුට දෙනවා දැ,” යි ප්‍රශ්න කර සිටියේය.
බෞද්ධයන්ගේ දේශයක් ලෙස නම්දරා ඇති ශ්‍රී ලංකාව මිනිමරුවන්ගේ දේශයක් නොකරන ලෙසද ආචාර්ය වික්‍රමබාහු කරුණාරත්න ඉල්ලීමක් කරන ලදී.
තමන් ජනපති වු පසුව අපරාධ සම්බන්ධව සැක පිට සිරගත වී සිටින හමුදා බටයන් නිදොස් කොට නිදහස් කරන බවට ගෝඨාභය රාජපක්ෂ කරන ලද ප්‍රකාශය සිහිපත් කළ සිරකරු අයිතීන් සුරැකිමේ කමිටුවේ සභාපතිවරයා යම් හෙයකින් ඔවුන්ගේ පාලනයක් පැමිණයහොත් මරා දැමු සිරකරුවන්ට යුක්තිය ඉටු නොවෙතැයි බිය පළ කළේය.
Facebook Comments
