කොටදෙනියාව සේයා සදෙව්මි දැරිය පැහැරගෙන ගොස් මරාදැමීමේ සිද්ධියට සැකපිට අත්අඩංගුවට ගත් පාසල් සිසුවාට හිරිහැර කළ බවට ඉදිරිපත් කර ඇති ඡායාරූපවල සිටින පොලිස් නිලධාරීන් සිව්දෙනා කවුරුන්ද යන්න හඳුනාගෙන ඔවුන් පිළිබඳ තොරතුරු මාස දෙකකදී අධිකරණයට දැනුම් දෙන ලෙස ශ්‍රේෂ්ඨාධිකරණය නියෝග කර ඇත.
එම පාසල් සිසුවා විසින් ගොනු කරන ලද මූලික අයිතිවාසිකම් පෙත්සම විභාගයට ගනිමින් ඊයේ (30) පොලිස්පතිවරයා වෙත ශ්‍රේෂ්ඨාධිකරණය නියෝග කළේය.
අසාධාරණ ලෙස තමන් අත්අඩංගුවට ගෙන අමානුෂික ලෙස පහරදීමෙන් මූලික අයිතිවාසිකම් උල්ලංඝනය කර ඇති බවට පවසමින් එම බඩල්ගමුව ප්‍රදේශයේ පදිංචි ඩබ්ලිව්. එස්. ප්‍රදීප් සෙනෙවිරත්න නමැති පාසල් සිසුවා විසින් මේ පෙත්සම ගොනු කර තිබුණි.
කොටදෙනියාව පොලිස් ස්ථානාධිපති සුජිත් උදය කුමාර, මීගමුව සහකාර පොලිස් අධිකාරී ජයන්ත අතුකෝරල, අපරාධ පරීක්ෂණ දෙපාර්තමේන්තුවේ ප්‍රධාන පොලිස් පරීක්ෂක ඩී.යු. ලසන්ත රත්නායක, එහි අධ්‍යක්ෂ ජ්‍යෙෂ්ඨ පොලිස් අධිකාරී සුදත් නාගහමුල්ල, පොලිස්පතිවරයා, නීතිපතිවරයා මෙහි වගඋත්තරකරුවෝ වෙති.
කොටදෙනියාව ප්‍රදේශයේ විසූ පස් හැවිරිදි දැරියක සිය නිවසේ සිටියදී ඉකුත් වසරේ සැප්තැම්බර් මස 15 වැනිදා රාත්‍රියේදී පැහැරගෙන දූෂණය කර මරාදමා ඇති බව පෙත්සමෙහි සඳහන් විය.
පසුදින සිය නිවසට පැමිණි පොලිස් නිලධාරීන් කිහිප දෙනකු තමා අත්අඩංගුවට ගෙන පොලිසියට රැගෙන ගොස් දැරිය මරා දැමීමට සම්බන්ධ බවට වරද පිළිගන්නා ලෙස තර්ජනය කරමින් හෝස් බටයකින් පහරදුන් බවත් එසේ නොකළ හොත් එල්ලා මරාදමන බවට තර්ජනය කළ බවත් පෙත්සම්කරු කියයි.
පසුව කරන ලද ඩී.එන්.ඒ. පරීක්ෂණයෙන් පසුව ඉකුත් ඔක්තෝබර් මස 01 වැනිදා අධිකරණය විසින් මුදා හළ බව ද පෙත්සමෙහි සඳහන් විය.
මෙකී අත්අඩංගුවට ගැනීමේ, පහරදීමේ, රඳවා ගැනීමේ සිද්ධිය මඟින් සිය මූලික අයිතීන් උල්ලංඝනය කර ඇතැයි ප්‍රකාශ කරන ලෙස පෙත්සම්කරු අධිකරණයෙන් ඉල්ලා සිටී.
කරුණු සලකා බැලූ අධිකරණය දෙසැම්බර් මස 08 වැනිදා පෙත්සම නැවත කැඳවීමට තීරණය විය.
නීතිඥ සාලිය පීරිස් මහතා පෙත්සම්කරු වෙනුවෙන් පෙනී සිටියේය.
Facebook Comments
