ව්‍යවස්ථාව වෙනස් කිරීමට ගෝඨාභය රාජපක්ෂ සැරසේ

රටේ සුරක්ෂිතතාවය, ස්වෛරීභාවය, ස්ථාවරභාවය හා ඒකීයභාවය ආරක්ෂා කර ගැනීමට නම් දැනට පවතින ආණ්ඩුක‍්‍රම ව්‍යවස්ථාවේ යම් වෙනස්කම් සිදුවිය යුතු බවට ජනාධිපතිවරයා අවධාරණය කර තිබේ.

වත්මන් ආණ්ඩුක්‍රම ව්‍යවස්ථාව තුළ ඇති අවිනිශ්චිතභාවය හා ව්‍යාකුලත්වය නිසා වර්තමානයේ ගැටලූ රැසක් නිර්මාණය වී තිබෙන බව 03 සිකුරාදා පාර්ලිමේන්තුවේ රාජාසන කතාව පවත්වමින් ජනාධිපති ගෝඨාභය රාජපක්ෂ කියා සිටියේය.

“ප‍්‍රජාතන්ත‍්‍රවාදී රාජ්‍යයක සාර්ථකත්වය රඳා පවතින පදනම වන්නේ ආණ්ඩුක‍්‍රම ව්‍යවස්ථාවයි. 1978 සිට 19 වතාවක් සංශෝධනය වී ඇති අපේ ආණ්ඩුක‍්‍රම ව්‍යවස්ථාව තුළ ඇති අවිනිශ්චිතභාවය හා ව්‍යාකුලත්වය නිසා වර්තමානයේ ගැටලූ රැසක් නිර්මාණය වී තිබෙනවා. අපේ රටේ සුරක්ෂිතතාවය, ස්වෛරීභාවය, ස්ථාවරභාවය හා ඒකීයභාවය ආරක්ෂා කර ගැනීමට නම් දැනට පවතින ආණ්ඩුක‍්‍රම ව්‍යවස්ථාවේ යම් වෙනස්කම් සිදුවිය යුතුමයි.”

පසුගිය ආණ්ඩු පාලන සමයේ සම්මත කරගන්නා ලද 19 වැනි ව්‍යවස්ථා සංශෝධනයෙන් ජනාධිපතිගේ විධායක බලතල සීමා කිරීම දැඩි ලෙස දෝෂ දර්ශනයට ලක් කළ පොහොට්ටුවේ ආධාරකරුවකු වන එක්සත් ජාතික මන්ත්‍රී විජයදාස රාජපක්ෂ විසින් එය ආපසු හැරවීම සඳහා ගෙනා 22 වැනි ව්‍යවස්ථා සංශෝධනයක් දැනටමත් පාර්ලිමේන්තුව හමුවේ තිබේ.

සමානුපාතික ඡන්ද ක‍්‍රමය තුළ ඇති සාධනීය ලක්ෂණ රැකගන්නා අතරම පාර්ලිමේන්තුවේ ස්ථාවරභාවයද, ජනතාවගේ ඍජු නියෝජනයද තහවුරු කිරීම සඳහා වර්තමාන මැතිවරණ ක‍්‍රමයේ වෙනස් කිරිමේ අව්ශ්‍යතාවයද ජනපති පෙන්වා දී ඇත.

ඉලක්කම්වලින් මැතිවරණ ජයග‍්‍රහණ වාර්තා කළහැකි වුවද, පැහැදිලි තීන්දු තීරණ ගත නොහැකි, අන්තවාදයේ බලපෑමට නිරන්තරයෙන් යටපත් වන, අස්ථාවර පාර්ලිමේන්තුවක් රටකට සුදුසු නොවන බවද ජනාධිපතිවරයා ප්‍රකාශ කළේය.

කෙසේ වෙතත්, අන්තවාදය යනුවෙන් අදහස් කරන්නේ කුමක් දැයි ඔහු පැහැදිලි කළේ නැත.

ජනතා පරමාධිපත්‍යය තහවුරු වන ප‍්‍රබල විධායකයක්, ව්‍යවස්ථාදායකයක් සහ ස්වාධීන අධිකරණයක් ස්ථාපිත කිරීම ව්‍යවස්ථා වෙනසක් තුළින්ම විසඳා ගත යුතු බව ද ජනාධිපති ගෝඨාභය රාජපක්ෂ සිය ධුරයට පත්විමෙන් පසු සිදු කරන ලද පලමු පාර්ලිමේන්තු රාජාසන කතාව සිදු කරමින් වැඩි දුරටත් පැවසීය.

ඉතිහාසයේ ප්‍රථම වතාවට ජනාධිපතිවරයකු බටහිර ඇඳුම් හැඳ පැවැත්වු මෙවර රාජාසන කතාවේදී තමන් රාජපක්ෂ පරම්පරාවේ දේශපාලන සලකුන වන කුරහන් සාටකය පළඳන්නේ නැති බවද ගෝඨාභය රාජපක්ෂ විසින් ප්‍රකාශයට පත් කරන ලදී.

1989 න් පසු ප්‍රථම වතාවට රනිල් වික්‍රමසිංහ හට විපක්ෂයේ මන්ත්‍රී අසුනක් පැනවී තිබුනේ විපක්ෂ නායක ධුරය සජිත් ප්‍රේමදාස හට ලබා දී තිබු නිසාවෙනි.

දෙවැනි රාජපක්ෂ පාලනයේ පළමු ප්‍රතිපත්ති ප්‍රකාශනය සම්බන්ධයෙන් ජනවාරි 7 සහ 8 යන දෙදින තුළ පාර්ලිමේන්තු විවාදයක් පැවැත්වීමට පක්ෂ නායක රැස්වීමේදී තීරණය වී තිබේ.