ශ්‍රී ලංකාවේ සිවිල් කටයුතු සඳහා ආරක්ෂක අංශ මෙන්ම විශ්‍රාමික හමුදා නිලධාරීන් යෙදවීම ගැන එක්සත් ජාතීන්ගේ මානව හිමිකම් කොමසාරිස්වරිය සිය කනස්සල්ල පළ කර තිබේ.
මෙරට තුල සංහිඳියාව ඇති කිරිමේ අරමුණින් එක්සත් ජාතීන්ගේ මානව හිමිකම් කොමිසම යහපාලන රජය සමඟ ඇති කර ගත් ගිවිසුමෙන් ශ්‍රී ලංකාව ඉවත් වීම සම්බන්ධයෙන් සිය කණගාටුව පළ කල මහ කොමසාරිස් මිචෙල් බැචලේ නව ප්‍රවේශය මගින් ශ්‍රී ලංකාවේ ප්‍රතිසන්ධානය, වගවීම සහ මානව හිමිකම් සම්බන්ධයෙන් ඉදිරියට ගමන් කිරීමේ ප්‍රයත්නයන් වලක්වාලීමේ අවදානමක් පවතින බවට අනතුරු ඇඟවූවාය.
“ආරක්ෂක අමාත්‍යාංශය හෝ විශ්‍රාමික හමුදා නිලධාරීන් යටතේ සිවිල් කටයුතු ගෙනයාමේ මෑත කාලීන ප්‍රවණතාව සහ මානව හිමිකම් ආරක්ෂකයින්, මාධ්‍යවේදීන් සහ වින්දිතයින්ට සෝදිසි කිරීම් සහ හිරිහැර කිරීම් පිළිබඳ වාර්තා වන නව කරුණු ගැන මම කනස්සල්ලට පත්ව සිටිමි. දෙමළ හා මුස්ලිම් යන සුළු ජාතීන්ට එරෙහිව වෙනස් කොට සැලකීම්, ආරක්ෂක ප්‍රතිපත්ති, වෛරී ප්‍රකාශ වැඩිවෙමින් පවතී,” යි ජිනිවා නුවර මුළු දෙන 43 වන මානව හිමිකම් සැසිවාරය අමතමින් ඇය පැවසුවාය.
එක්සත් ජාතීන් සමඟ ගිවිසගත් දෑ වලින් ඉවත් වී සංහිඳියාව ඇති කිරීමට දේශිය වශයෙන් පියවර ගන්නා බවට අමාත්‍ය දිනේෂ් ගුණවර්ධන සිදු කරන ලද ප්‍රකාශයට පිළිතුරු දෙමින් ඇය කියා සිටියේ මීට පෙරද ශ්‍රී ලංකාව දේශීය ක්‍රියාදාමයන් ක්‍රියාත්මක කළද ඒවා ගැටලු සඳහා පිළිතුරු ලබාදීමට අපොහොසත් වු බවයි.
තවත් කොමිසම් පලක් නෑ
තවදුරටත් කොමිසන් සභා ඇති කිරීම මගින් ගැටලු සඳහා විසඳුමක් ලැබෙනු ඇතැයි විශ්වාස නොකන බව ද එක්සත් ජාතීන්ගේ මානව හිමිකම් කොමසාරිස්වරිය අවධාරණය කළාය.
අතුරුදහන් වූවන් පිළිබඳ කාර්යාලය සහ වන්දි ගෙවීමේ කාර්යාලයට දේශපාලන සහාය හා සම්පත් ලබා දෙන ලෙස රජයෙන් ඉල්ලා සිටි මහ කොමසාරිස්වරිය අතුරුදහන් වූවන්ගේ පවුල්වලට යුක්තිය හා විසඳුම් ලැබිය යුතු බව ද සිහිපත් කර දී ඇත.
“රජය සිය සියලු ජනතාව වෙනුවෙන් කටයුතු කළ යුතු අතර සියලු ජන කොටස්වල, විශේෂයෙන් සුළු ජාතීන්ගේ අවශ්‍යතා පිළිගෙන ඒවාට පිළියම් යෙදිය යුතුයි. පසුගිය වසර කිහිපය තුළ ලබා ඇති ධනාත්මක කරුණු සුරැකීමට හා ඒවා ඉදිරියට ගෙන යන ලෙස ට මම රජයෙන් ඉල්ලා සිටිමි. විශේෂයෙන්, අතුරුදහන් වූවන් පිළිබඳ කාර්යාලය සහ වන්දි ගෙවීමේ කාර්යාලයට දේශපාලන හා සම්පත් සහාය ලබා දෙන බවට සහතික වන ලෙස මම රජය දිරිගන්වමි. සියලු ජන කොටස්වලින් අතුරුදහන් වූවන්ගේ පවුල්වලට යුක්තිය හා විසඳුම් ලැබිය යුතුයි.”
සිවිල් සමාජයට සහ ස්වාධීන මාධ්‍යයට ඇති ඉඩ ආරක්ෂා කළ යුතු පෙන්වා දුන් ඇය 19 වන ආණ්ඩුක්‍රම ව්‍යවස්ථා සංශෝධනය යටතේ ශක්තිමත් කරන ලද ශ්‍රී ලංකාවේ ස්වාධීන ආයතන එහි ප්‍රජාතන්ත්‍රවාදී ව්‍යුහයේ ප්‍රධාන කුළුණක් බව පැවසීය.
ශ්‍රී ලංකාව තවමත් අතීතයේ සිදු වූ ගැටුම් සම්බන්ධයෙන් දුර්විපාක නොලබා සිටීම මෙන්ම මේ සම්බන්ධයෙන් කටයුතු කිරීමට ආරක්ෂක අංශයේ ප්‍රතිසංස්කරණයන්ද සිදුකර නොමැති බව හා පරාධ යුක්ති විනිශ්චය පද්ධතිය තුළ අඛණ්ඩව පවතින පද්ධතිමය බාධක සැබෑ යුක්තියට බාධාවක් වී ඇති බවයි එක්සත් ජාතීන්ගේ මානව හිමිකම් කොමසාරිස්වරිය පෙන්වා දෙන්නේ.
වින්දිතයින්ට තවමත් යුක්තිය අහිමි වී ඇති බව පෙන්වා දුන් මහකොමසාරිස් මිචෙල් බැෂලේ, මානව හිමිකම් උල්ලංඝනය කිරීම් පිළිබඳ අතීත රටාවන් නැවත ඇති නොවන බවට සියලු ප්‍රජාවන්ට අයත් ශ්‍රී ලාංකිකයන්ට සහතිකයක් නොමැති බවයි එක්සත් ජාතීන්ගේ මානව හිමිකම් කොමසාරිස් මිචෙල් බැචලේ වැඩි දුරටත් පවසා ඇත්තේ.
Facebook Comments
