ශ්‍රී ලංකාවේ යුද අපරාධ වලට බ්‍රිතාන්‍ය දායකත්වය ගැන චිත්‍රපටයක් නොමිලේ

ශ්‍රී ලංකාවේ ආරක්ෂක අංශ වලට චෝදනා එල්ලවන යුද අපරාධ වලට බ්‍රිතාන්‍යය සෘජුව දායක වූ අයුරු ගවේෂණය කරන වාර්තා චිත්‍රපටියක් අද රාත්‍රියේ ප්‍රදර්ශනය කිරීමට කටයුතු සුදානම් කර තිබේ.

ෆිල් මිලර් සහ ලූ මැක්නමාරා විසින් අධ්‍යක්ෂණය කරන ලද “කීනි මීනි” KEENIE MEENIE ශ්‍රී ලංකාවේ වේලාවෙන් රාත්‍රී 11.30 ට පහත දැක්වෙන දිගුව ඔස්සේ නොමිලේ නරඹන්නට පුළුවන.

https://www.youtube.com/watch?v=7ZokBJZyVqk

“වැදගත් සහ බියජනක මේ චිත්‍රපටිය අනිවාර්යයෙන් තිරගත කළ යුත්තකි,” යි සම්මානලාභයෙන් ලෝකයේ වඩාත් සාර්ථකම සිනමාකරු ලෙස සැලකෙන කෙන් ලෝච් ඒ සම්බන්ධයෙන් පවසා තිබේ.

“එය කතා කරන්නේ යුද අපරාධ චුදිතයන් ගැනයි. ඔවුහු අප අතරම සිටින්නෝ වෙති”

අවුරුදු හතරක් වෙහෙසවී නිමවා ඇති චිත්‍රපටිය ගවේෂණය කරන්නේ බ්‍රිතාන්‍ය ත්‍රස්ත විරෝධී ප්‍රහාරක බලකායක් වන SAS විශේෂ ගුවන් සේවයේ හිටපු නිලධාරීන් විසින් පිහිටුවන ලද KMS හෙවත් කීනි මීනි සර්විස් කුලී භට බලකාය ගැනයි.

පොලිස් විශේෂ කාර්ය සාධක බලකාය (STF) ට ආරම්භක පුහුණුව දෙන ලද්දේ KMS විසිනි.

පුහුණු කිරීමෙන් නොනැවතුණු KMS කුලී හේවායෝ නැගෙනහිර පළාතේ ගුවන් ප්‍රහාරක මෙහෙයුම් වල යෙදුනු බවද චිත්‍රපටිය හෙළිකරයි.

එහිදී බිම ඉන්නා සාමාන්‍ය වැසියන් ඝාතනය කිරීම සඳහා වයින් වීදුරු තුල දැමූ ග්‍රෙනේඩ් යොදාගත් ආකාරය ශ්‍රී ලංකාවේ හිටපු බ්‍රිතාන්‍ය ආරක්ෂක උපදේශක ලුතිනන් කර්නල් හොල්වර්දි අධ්‍යක්ෂ වරුන්ට විස්තර කර තිබේ.

පසුගිය තිස්පස් අවුරුද්දක කාලය තුල ශ්‍රී ලංකාවේ සිංහල, දෙමල, මුස්ලිම් තුන් ජන කොට්ඨාශයටම එරෙහිව රාජ්‍ය ප්‍රචණ්ඩත්වය යෙදවීම සඳහා බ්‍රිතාන්‍යය දැරූ දායකත්වය වටහා ගැනීමට KEENIE MEENIE උපකාරී වනු ඇතැයි ෆිල් මිලර් විශ්වාසය පල කරයි.

සංරක්ෂිත දර්ශන, බ්‍රිතාන්‍ය ඔත්තු සේවා ලිපිගොනු, විශ්‍රාමික තානාපති නිලධාරීන්, හිටපු KMS කුලී හේවායන් සහ STF නිලධාරීන්ද චිත්‍රපටයේ ගවේෂණය සඳහා යොදාගෙන තිබේ.

ෆිල් මිලර්ගේ හෙළිදරව්වෙන් නැගෙන චෝදනා සම්බන්ධයෙන් බ්‍රිතාන්‍ය පොලිසිය යුද අපරාධ විභාගයක් ආරම්භ කර ඇති අතර කීනි මීනි ආයතනයේ ක්‍රියාකාරකම් ගැන එක්සත් ජාතීන්ගේ සංවිධානය විසින් බ්‍රිතාන්‍ය ආණ්ඩුවෙන් ප්‍රශ්න කර තිබේ.