ශ්‍රී ලංකාවේ අලුත් ත්‍රස්ත නීති වලට බලවත් ඉස්ලාම් රටවලින් ප්‍රහාරයක්

මානව හිමිකම් උල්ලංඝන සම්බන්ධයෙන් එක්සත් ජාතීන්ගේ සංවිධානය විසින් යෝජනාවක් සම්මත කරගෙන මාසයක් ගතවීමටත් පෙර පුද්ගල අයිතිය අහෝසි කරන පීඩාකාරී නීති සම්මත කරගනිමින් ඉන්නා ශ්‍රී ලංකාව දිගටම ජාත්‍යන්තර හෙලා දැකීමට ලක්වෙමින් සිටී.

අලුතින්ම ශ්‍රී ලංකාවට එරෙහිව අවි ඔසවා ඇත්තේ රටවල් පනහකට අධික සංඛ්‍යාවකින් සැදුම්ලත් තෙල් අපනයනය කරන රටවල් ඇතුළු ලෝකයේ සියලුම ඉස්ලාමීය රාජ්‍ය පාහේ එක්ව ඉන්නා බලවත් සංවිධානයකි.

හිතුමතේ අත්අඩංගුවට ගැනීම සහ නඩු නැතිව වසර ගණනක් රඳවා තැබීම නීතිගත කිරීම සඳහා “දැඩි අන්තවාදී ආගමික මතවාද දැරීමෙන් මුදවා ගැනීමේ” නාමයෙන් ත්‍රස්තවාදය වැළක්වීමේ පනත යටතේ අලුතින් පනවා ඇති නියෝග ඉස්ලාමීය සහයෝගිතා සංවිධානයේ (OIC) දැඩි විරෝධයට ලක් වී තිබේ.

මාසයකට ඉහතදී ජිනීවා මානව හිමිකම් සමුළුවේදී සහාය දුන් බව ශ්‍රී ලංකාවේ රජය විසින් ප්‍රකාශ කරන ලද රටවල් අතරින් අඩකට වැඩි සංඛ්‍යාවක්ද ඒ අතර වෙයි.

මාර්තු මස 12 වැනිදා ගැසට්ගත කරන ලද එම නියෝග යොදාගෙන “මුස්ලිම්වරුන් අත්තනෝමතික ආකාරයෙන් රඳවා ගෙන ඔවුන් වධහිංසා සහ මානව හිමිකම් උල්ලංඝනවලට ගොදුරු කිරීමට ඉඩ සලසා දෙන, කිසිදු නීතිමය සෝදිසියකින් තොරව දණ්ඩමුක්තිය භුක්ති විඳින ‘ඒකාබද්ධතා මධ්‍යස්ථාන’ නිර්මාණය කිරීම” OIC සංවිධානයේ ස්වාධීන නිත්‍ය මානව හිමිකම් කොමිසම (IPHRC) විසින් නිකුත් කරන ලද නිවේදනයක් මගින් හෙලා දැක තිබේ.

ශ්‍රී ලංකාවේ මානව හිමිකම් උල්ලංඝන සම්බන්ධයෙන් ජාත්‍යන්තර මැදිහත්වීමක් අවධාරණය කරමින් එක්සත් ජාතීන්ගේ මානව හිමිකම් මණ්ඩලය විසින් සම්මත කරගන්න ලද යෝජනාවද තම බරපතල අවධානයට ගන්නා ලද බව මුස්ලිම් රටවල් සමුහය කියා සිටී.

එම යෝජනාව ජිනීවා නුවරදී සම්මත වීමෙන් අනතුරුව විදේශ අමාත්‍ය දිනේෂ් ගුණවර්ධන ප්‍රකාශ කර සිටියේ මානව හිමිකම් මණ්ඩලයේ සාමාජික රටවල් 47 අතරින් 25ක්ම ශ්‍රී ලංකාවට සහාය දැක්වූ බවයි. යෝජනාවට විරුද්ධව ඡන්දය දුන් රටවල් මෙන්ම ඡන්දයෙන් වැළකී සිටි රටවල්ද අමාත්‍යවරයාගේ ගණනය කිරීමට එකතු කොට තිබුණි.

එකී රටවල් 25න් 14ක්ම ශ්‍රී ලංකාවේ ත්‍රස්ත නීති හෙලා දකින සවුදි අරාබිය මුලස්ථාන කොටගත් OIC සංවිධානයේ සාමාජිකත්වය දරයි.

බංග්ලාදේශය, පකිස්තානය, සෝමාලියාව හා උස්බෙකිස්තානය මානව හිමිකම් මණ්ඩලයේදී ශ්‍රී ලංකාව සම්බන්ධ යෝජනාවට විරුද්ධව ඡන්දය දුන් රටවල්ය. බහරේනය, බුර්කිනා ෆාසෝ, කැමරූන්, ගැබොන්, ඉන්දුනීසියාව, ලිබියාව, මොරිටානියාව, සෙනෙගාලය, සුඩානය සහ ටෝගෝ ඡන්දය දීමෙන් වැළකී සිටියේය.

ත්‍රස්ත විරෝධී අණපනත් යොදාගෙන මුස්ලිම් කාන්තාවන් පළඳින බුර්කාව තහනම් කිරීමට ආණ්ඩුව පියවර ගැනීමද මුස්ලිම් රටවල දැඩි දෝෂ දර්ශනයට ලක්වී ඇත. එම තහංචිය ශ්‍රී ලංකාවද අත්සන් තබා ඇති ජාත්‍යන්තර සම්මුතියක් උල්ලංඝනය කිරීමක් බව ඔව්හු අවධාරණය කරති.

එමගින් මුස්ලිම් කාන්තාවන් සියලුදෙනා එකම නිශේධනීය අච්චුවකට දමා, සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුතියේ විකල්ප කෙටුම්පත (ICCPR) යටතේ සුළුජාතීන්ට සහතික කර ඇති ආගම ඇදහීමේ හා සංස්කෘතිය අනුගමනය කිරීමේ අයිතිය උල්ලංඝනය කර “ඔවුන් අඳින ඇඳුම නිසා අනවශ්‍ය එදිරිවාදිකම් හා ශාරීරික ප්‍රචණ්ඩතා අවුළුවා ලන්නට කටයුතු කිරීමක්” බව OIC නිවේදනයේ සඳහන් වෙයි.

ත්‍රස්තවාදය වැළක්වීමේ භයංකර පනත වහාම අහෝසි කරන ලෙස රජයට බලකර සිටින මුස්ලිම් රාජ්‍ය සමූහය එම නීති අහෝසි කරවා ගැනීම සඳහා අධිකරණය ඇතුළු සියලුම දේශීය යාන්ත්‍රණ යොදා ගන්නා ලෙස මුස්ලිම් ප්‍රජාවගෙන්ද, මානව හිමිකම් සංවිධානවලින්ද ඉල්ලා සිටී.

ශ්‍රී ලංකාව තුල යුක්තිය ඉටුවීමේ ඇති ඉඩකඩ පිළිබඳව බලවත් අවිශ්වාසය පල කරන එජා මානව හිමිකම් පිළිබඳ එජා මහකොමසාරිස් වරිය, මානව හිමිකම් උල්ලංඝන සම්බන්ධයෙන් වගකිව යුත්තන්ට එරෙහිව රටින් පිටතදී නඩු පැවරීමට පියවර ගන්නා ලෙස කරන ලද ඉල්ලීම මාර්තු මාසයේ ජිනීවාහිදී අනුමත කෙරිණි.