රැකියා සඳහා විදේශගත වන සියලුම අය වෙනුවෙන් කොවිඩ් මර්ධන එන්නත් පහසුකම් ලබාදීමට රජය තීරණය කර ඇති බව ශ්‍රී ලංකා විදේශ සේවා නියුක්ති කාර්යාංශය නිවේදනය කර තිබේ.
රැකියා සඳහා විදේශගත වන ශ්‍රමිකයින්ට කොවිඩ් මර්දන එන්නත ලබා ගැනීමේ අවශ්‍යතාවය පිළිබඳව, ජනාධිපතිතුමාගේ අවධානය යොමු කිරීමෙන් අනතුරුව, ජාතික කොවිඩ් මර්ධන මධ්‍යස්ථානයේ ප්‍රධානී, යුධ හමුදාපති ජනරාල් ශවේන්ද්‍ර සිල්වා මහතා දැනුවත් කිරීමෙන් අනතුරුව මේ සඳහා ජාතික කොවිඩ් මර්ධන කමිටුවේ අනුමැතිය හිමිවී ඇත.
ජාතික ආර්ථිකය වෙනුවෙන් විශාල මෙහෙවරක නිරත වී සිටින විගමණික ශ්‍රමිකයන්ට කොවිඩ් මර්ධන එන්නත ලබාදීම ජාතික අවශ්‍යතාවයක් බව, සෞඛ්‍ය සේවා අධ්‍යක්ෂ ජනරාල් විසින් පිළිගත් බව පවසන විදේශ සේවා නියුක්ති කාර්යාංශය සෞඛ්‍ය මාර්ග මාර්ගෝපදේශ වලට අනුගතව ඉදිරි කටයුතු සිදු කරන බව නිවේදනය කරයි.
රැකියා සඳහා විදේශගත වීමට අවශ්‍ය, රැකියා ගිවිසුම, වීසා බලපත්‍රය හා රැකියා ප්‍රදානය කිරීමේ පත්වීම් ලිපිය යන ලේඛන ලැබූ අය මෙම එන්නත ලබාදීම සඳහා සුදුසුකම් ලබයි.
බලපත්‍රලාභී විදේශ රැකියා නියෝජිත ආයතනයක් මගින් විදේශගත වන අය එම රැකියා ඒජන්සිය හරහා ද, ස්වයං මාර්ගයෙන් විදේශගතවන්නන් කාර්යාංශයට දුරකථන ඇමතුමක් ලබාදී අදාල තොරතුරු ඉදිරිපත් කර ලියාපදිංචිය ලබාගත යුතු බවයි විදේශ සේවා නියුක්ති කාර්යාංශය පවසන්නේ.
මීට අදාළ වැඩි දුර විස්තර පැය 24 පුරා ක්‍රියාත්මක 1989 අංකය ඇමතීමෙන් ලබා ගත හැක.
විදේශ රැකියා ප්‍රවර්ධන හා වෙළඳපල විවිධාංගීකරණ රාජ්‍ය අමාත්‍ය පියංකර ජයරත්නගේ උපදෙස් මත කාර්යාංශයේ සභාපති කමල් රත්වත්තේ විසින් මෙය ක්‍රියාත්මක කීරිමට අදාළ පියවර ගෙන ඇති අතර අදාල එන්නත් කිරීම් ඉදිරි සතිය ආරම්භ කිරීමට කටයුතු යොදා ඇති බව කාර්යාංශය වැඩිදුරටත් නිවේදනය කර සිටී.
Facebook Comments
