ඩෙල්ටා ප්‍රභේදයේ පොකුරු බිහිවීමේ අවදානමක් – එන්නත් දෙකම ගන්න

භායනක කොවිඩ් ප්‍රභේදයක් වන ඩෙල්ටා ප්‍රභේදයේ පොකුරු දිවයින පුරා බිහිවීමේ අවදානමක් පවතින බවට නියෝජ්‍ය සෞඛ්‍ය සේවා අධ්‍යක්ෂවරයා අනතුරු අඟවා තිබේ.

“ඩෙල්ටා වෛරස් ප්‍රභේදයේ ආසාදිත පොකුරු දිවයින පුරා බිහිවීමේ හැකියාවක් තිබෙනවා ද?” යි මාධ්‍යවේදීන් කළ ප්‍රශ්න කිරීමකට පිළිතුරු දෙමින් විශේෂඥ වෛද්‍ය හේමන්ත හේරත් 03 සෙනසුරාදා පැවති මාධ්‍ය හමුවකදී මේ බව කියා සිටියේය.

“මේ ප්‍රභේදය ලංකාවේ තිබෙන බව දැන් අපි දන්නවා. මේක තියෙන රෝගියාව අපිට ඇහැට පේන්නේ නෑ. ඒ නිසා මේ වෛරස ප්‍රභේදය ශරීරගත වූ අය අනන්තවත් ඉන්න පුළුවන්. ඒ අය මෙන්ම ඒ අයව ආශ්‍රය කරන අය සෞඛ්‍ය පුරුදු පිළිනොපැද්දොත් මේ වෛරස ප්‍රභේදය බෝ කිරීම සිදුවෙයි. මේ ප්‍රභේදය යම් යම් ස්ථානවලදී හමුවුණා කියලා මතයක් ගොඩ නැගිලා තියෙන්නේ සැහැල්ලුවෙන් කරන ප්‍රකාශ නිසා. එහෙම නැතුව සෞඛ්‍ය අංශයේ කිසිම කෙනෙක් පරීක්ෂණවලදී හෝ සාක්ෂි සහිතව මෙවැනි දෙයක් ප්‍රකාශ කරලා නෑ. සාමාන්‍ය PCR පරීක්ෂණයකට වඩා මේ වෛරසය හඳුනා ගැනීමට සෑහෙන්න කාලයක් ගත වෙනවා. දින කිහිපයක් ගතවනවා. මේක සංකීර්ණ ක්‍රියාවලියක්.” හෙතෙම පැවසීය.

ඩෙල්ටා ප්‍රභේදය පිළිබඳව ශ්‍රී ජයවර්ධනපුර විශ්වවිද්‍යාලයෙන් කරන ලද පරීක්ෂණ වල වාර්තාව සෞඛ්‍ය අමාත්‍යාංශයට ලැබී ඇති දැයි මාධ්‍යවේදී තව දුරටත් මෙහිදී ප්‍රශ්න කළේය.

“ඒ ඒ සාම්පල ලැබෙන පරිදි තමයි ඒ කටයුතු කෙරෙන්නේ. මේ දක්වා තහවුරු කරපු 5 දෙනෙක් ගැන අපිට තොරතුරු ලබාදීලා තියෙනවා. ඉදිරියේදී ආයේ තහවුරු වුණොත් අපිට දැනුම් දෙයි.” විශේෂඥ වෛද්‍ය හේමන්ත හේරත් කියා සිටියේය.

මේ අතර සීඝ්‍ර ව්‍යාප්තියක් සහිත ඩෙල්ටා කොවිඩ් ප්‍රභේදය ආසාදනය වූ තවත් පුද්ගලයින් 13 දෙනෙකු හඳුනාගෙන ඇති බව නියෝජ්‍ය සෞඛ්‍ය සේවා අධ්‍යක්ෂ විශේෂඥ වෛද්‍ය හේමන්ත හේරත් අද සවස මාධ්‍ය වෙත කියා තිබුනි.

කොළඹ, ත්‍රිකුණාමලය, ගාල්ල සහ මාතර යන දිස්ත්‍රික්ක 04 න් එම ආසාදිතයින් හදුනාගෙන ඇති බව ශ්‍රී ජයවර්ධනපුර විශ්වවිද්‍යාලයේ ආසාත්මිකතා හා ප්‍රතිශක්ති විද්‍යා සහ සෛල ජෛව විද්‍යායතනයේ එළිදක්වා ඇති නවතම වාර්තාවේ සඳහන් කර ඇත.

එමෙන්ම බී 1 යි 1 යි 7 ලෙස හැදින්වෙන ඇල්ෆා ප්‍රභේදය දිවයිනේ ප්‍රදේශ රැසකින් තවදුරටත් වාර්තා වන බවද අදාල වාර්තාවේ සඳහන් වේ.

එන්නත් දෙකම ගන්න

කොවිඩ් මර්දන එන්නත් ලබා නොගත් හෝ එක් මාත්‍රාවක් ලබාගත් පුද්ගලයින් අතර ඩෙල්ටා ප්‍රභේදය පැතිරීමේ වැඩි සම්භාවිතාවයක් ඇති බව වෛද්‍ය ආචාර්ය චන්දිම ජීවන්දර පවසනවා.

එන්නත් මාත්‍රා දෙකම අනිවාර්යෙන් ලබා ගත යුතු බව මෙන්ම එසේ ලබා ගත් පසුවද සෞඛ්‍ය මාර්ගෝපදේශ අකුරුටම පිලිපැදිය යුතු බවද ඔහු පවසා තිබේ.

බහුතර ජනතාවක් එන්නත්කරණයට ලක්කරන තුරු සෞඛ්‍ය ආරක්ෂිතව කටයුතු කිරීම අත්‍යව්‍යශ බවයි ශ්‍රී ජයවර්ධනපුර විශ්වවිද්‍යාලයේ ආසාත්මිකතා හා ප්‍රතිශක්ති විද්‍යා සහ සෛල ජෛව විද්‍යායතනයේ අධ්‍යක්ෂවරයා අවධාරණය කරන්නේ.