ඉන්දියාවට නීති හැදීමට ලංකාවේ පාර්ලිමේන්තුව සැරසෙයි

ශ්‍රී ලාංකික ශ්‍රමිකයන් සඳහා ඉන්දියාවේ කම්කරු නීතියේ වෙනස්කම් සිදුකිරීම පිණිස මෙරට පාර්ලිමේන්තුවේ පනත් සංශෝධනයක් ගෙනඒමට ආණ්ඩුව සැලසුම් කර තිබේ.

ඉන්දියාවේ සේවයේ නියුතු ශ්‍රී ලාංකිකයන්ට සෙත සැලසීම අරමුණු කොටගෙන සේවක අර්ථසාධක අරමුදල් (සංශෝධන) පනත් කෙටුම්පත දෙවැනිවර කියැවීම සඳහා ඉදිරිපත් කිරීමට කම්කරු කටයුතු පිළිබඳ අමාත්‍යාංශයීය උපදේශක කාරක සභාවේ එකඟ වූ බව පාර්ලිමේන්තුව පවසයි.

ඒ අනුව ඉන්දියාවේ රැකියා කරන ශ්‍රමිකයන් එරට සමාජ ආරක්ෂණ පනතට දරන දායකත්වය සම්බන්ධයෙන් ශ්‍රී ලාංකිකයන්ට විශේෂ සහනයක් ලබාගැනීමට අපේක්ෂා කෙරේ.

එසේම සේවක අර්ථසාධක අරමුදල් පනත යටතේ නියෝගයක් ද පාර්ලිමේන්තුවට ඉදිරිපත් කිරීමට එහිදී එකඟතාවය පළ වු බවයි ශ්‍රී ලංකා පාර්ලිමේන්තුවේ සන්නිවේදන දෙපාර්තමේන්තුව පවසන්නේ.

මෙම එකඟතාව පළ වී ඇත්තේ කම්කරු කටයුතු පිළිබඳ අමාත්‍යාංශයීය උපදේශක කාරක සභාව කම්කරු අමාත්‍ය නිමල් සිරිපාල ද සිල්වාගේ ප්‍රධානත්වයෙන් ඔක්තෝබර් 4 වැනි සදුදා පාර්ලිමේන්තුවේදී රැස් වූ අවස්ථාවේදී ය.

රජය පවසන පරිදි ඉන්දියාවෙහි සේවයේ නියුක්ත ශ්‍රී ලාංකිකයන් එරට නීතිමය ප්‍රතිපාදන අනුව අනිවාර්යයෙන්ම ඉන්දියානු සමාජ ආරක්ෂණ අරමුදලට දායකත්වය දැක්විය යුතුය.

එසේ වුවත් ඔවුන් එරට සේවය නිමවා ආපසු පැමිණීමේදී සමාජ ආරක්ෂණ අරමුදලට දක්වන ලද දායක මුදල් ලබා ගැනීමට නම් වයස අවුරුදු 58ක් සම්පූර්ණ වන තෙක් සිටිය යුතුය.

එහෙත් ලංකාවේ සේවය කරන ඉන්දියානු සේවකයන්ට ඔවුන් නැවත තම මව් රටට යන විට සමාජ ආරක්ෂණ අරමුදල යටතේ ඇති මුදල් ගැනීමේ හැකියාව පවතියි.

ඒ සඳහා වයස් සීමාව අදාළ නොවේ.

මේ අනුව ඉන්දියාවේ සේවය කරන ශ්‍රී ලාංකේය ශ්‍රමිකයන්ට වයස අවුරුදු 58 ඉක්මවීමට පෙර සමාජ ආරක්ෂණ අරමුදලට දායකත්වය දැක්වූ මුදල් ලබාගැනීමට හැකිවන පරිදි අවශ්‍ය සංශෝධන සිදුකරමින් මෙසේ සේවක අර්ථසාධක අරමුදල් (සංශෝධන) පනත පාර්ලිමේන්තුවට එළඹෙන 07 වැනි දින ඉදිරිපත් කිරීමට නියමිතව තිබේ.

ඉන්දීය නීති ප්‍රතිපාදන වෙනස් කිරීමට ශ්‍රී ලංකාවේ පාර්ලිමේන්තු පනතකට හැකියාවක් ලැබෙන්නේ කෙසේද යන්න ශ්‍රී ලංකා පාර්ලිමේන්තුවේ සන්නිවේදන දෙපාර්තමේන්තුව විසින් පැහැදිලි කර නැත.

සේවක අර්ථසාධක අරමුදලට ලියාපදිංචි කිරීමේ කටයුතු නවීන තාක්ෂණය භාවිතයෙන් සිදු කිරීමට සහ සේවක අර්ථසාධක අරමුදලේ සාමාජිකයින්ට තම මාසික දායක මුදල් ගිණුම්ගත වීම ජංගම දුරකථන කෙටි පණිවිඩ සේවාව ඔස්සේ (SMS) ලබා දීමට හැකිවන පරිදි සකස් කෙරෙන සේවක අර්ථසාධක අරමුදල් පනත යටතේ නියෝගයක් එදිනම පාර්ලිමේන්තුවට ඉදිරිපත්කිරීමටද කාරක සභාවේ එකඟතාවය පළ වී තිබේ.

“තවද 1956 අංක 47 දරන ස්ත්‍රීන්, තරුණ අය සහ ළමයින් සේවයේ යෙදවීමේ පනත යටතේ ගැසට් කර ඇති උපද්‍රවකාරී රැකියා ලැයිස්තු නියෝග සංශෝධනය පාර්ලිමේන්තුවට ඉදිරිපත්කිරීම පිළිබඳ කාරක සභාව දැනුවත් කිරීමද මෙහිදී සිදුවිය,” යයි ශ්‍රී ලංකා පාර්ලිමේන්තුවේ සන්නිවේදන දෙපාර්තමේන්තුව වැඩි දුරටත් නිවේදනය කර ඇත.

මෙම කාරක සභාවට රාජ්‍ය අමාත්‍ය ප්‍රියංකර ජයරත්න, පාර්ලිමේන්තු මන්ත්‍රීවරුන් වන ජෝන් සෙනෙවිරත්න, ගෙවිඳු කුමාරතුංග සහභාගී වී ඇත.