නීති විරෝධී ලෙස මුහුදු මාර්ග ඔස්සේ මෙරටින් විදෙස් රටකට සංක්‍රමණය වීමට උත්සහ කළ බවට සැකකෙරෙන පුද්ගලයන් 78 දෙනෙකු නාවික හමුදා භාරයට ගෙන තිබේ.
නාවික හමුදාව මඩකලපුවට ඔබ්බෙන් වූ මුහුදු ප්‍රදේශයේ සහ මඩකලපුව කළුවන්කේනි වෙරළ ප්‍රදේශයේ ඊයේ (10) රාත්‍රියේ සිදුකළ විශේෂ සෝදිසි මෙහෙයුම් මඟින් මෙම පිරිස අත්අඩංගුවට ගෙන ඇත.
එහි දී ජාවාරමට සම්බන්ධ පුද්ගලයන් හය දෙනෙකු ඇතුළුව පිරිමි පුද්ගලයන් 43 ක්, කාත්තාවන් 07 ක්, ළමුන් 11 ක් සමඟ පුද්ගලයන් 61 දෙනෙකු එම බහුදින ධීවර යාත්‍රාව සමඟ තම භාරයට ගත් බව නාවික හමුදාව නිවේදනය කරයි.
ඒ අනුව, නාවික හමුදාව භාරයට ගත් එම පිරිසෙන් 21 දෙනෙකු අද(11) උදෑසන නාවික හමුදා වේග ප්‍රහාරක යාත්‍රාවක් මඟින් ත්‍රිකුණාමලය වරාය වෙත රැගෙන ආ අතර, අනෙක් පුද්ගලයින් 40 දෙනා සමග බහුදින ධීවර යාත්‍රාව මේ වන විට ත්‍රිකුණාමලය වරාය වෙත රැගෙන එමින් පවතී.
නාවික හමුදා භාරයට ගත් මෙම පිරිස ඉදිරි නීතිමය කටයුතු සඳහා ත්‍රීකුණාමලය වරාය පොලිසිය වෙත භාරදීමට නියමිතය.
මීට අමතරව, ඉහත බහුදින ධීවර යාත්‍රාව මඟින් විදෙස් රටකට සංක්‍රමණය වීමට සූදානමින් මඩකලපුව කළුවන්කේනි වෙරළ ප්‍රදේශයේ රැඳී සිටි බවට සැකකෙරෙන පිරිමි පුද්ගලයන් 16 ක් සහ එක් කාන්තාවක් ඇතුළුව වයස අවුරුදු 22 ත් 50 ත් අතර වයසේ පසුවන පුද්ගලයන් 17 දෙනෙකු සමඟ වෑන් රථයක් නැගෙනහිර නාවික විධානයට අනුයුක්ත ශ්‍රී ලංකා නාවික නෞකා කාෂ්‍යප ආයතනය හා මඩකලපුව කලවංචිකුඩි විශේෂ කාර්යය බලකාය එක්ව ඊයේ රාත්‍රී කාලයේ කළුවන්කේනි වෙරළ ප්‍රදේශයේ සිදුකළ තවත් සෝදිසි මෙහෙයමුකදී අත්අඩංගුවට ගෙන ඇත.
Facebook Comments
