රජය විසින් මේ වන විට පනවා ඇති බදු ප්‍රතිශතයන් හැකි ඉක්මනින් ඉවත් කිරීමට කටයුතු කරන බව මුදල් අමාත්‍ය රවි කරුණානායක මහතා පවසයි.
මුදල් අමාත්‍යංශයේ දී 15 බ්‍රහස්පතින්දා පැවැති ප්‍රවෘත්ති සාකච්ඡාවකට එක්වෙමින් ඔහු ඒ බව සදහන් කර තිබේ.
වත්මන් රජය විසින් රජයේ දේපළ විකිණීමක් සිදු නොකරන බවත් ඉදිරියේ දී එළැඹීමට නියමිත ගිවිසුම් ප්‍රකාරව සිදු කිරීමට යන්නේ පාඩු ලබන තත්ත්වයේ පවතින රජය සතු ආයතන පෞද්ගලික අංශය හා ඒකාබද්ධ වෙමින් ක්‍රියාත්මක කිරීමේ ක්‍රමවේදයක් පමණක් බවත් ඔහු එහිදී සදහන් කර ඇත.
මේ වන විට එසේ සිදු කොට ඇති ශ්‍රී ලංකා ටෙලිකොම් වැනි ආයතනයන් පාඩු ලබන තත්ත්වයෙන් මඟහරවාගෙන ඉතා සාර්ථකව පවත්වාගෙන යන බවත් අමාත්‍යවරයා තව දුරටත් පෙන්වා දී තිබේ.
මෙම ක්‍රියාව හරහා රජයට යම් මුදල් ප්‍රමාණයක් ලැබෙන බවත් එම මුදල්වලින් විදේශ ණය පියවීම ප්‍රධාන අරමුණ බවත් සදහන් කර ඇති අමාත්‍යවරයා ණය ගෙවා ඉතිරිවන යම් මුදල් ප්‍රමාණයක් යොදවා සංවර්ධන වැඩසටහන් ක්‍රියාත්මක කිරීම සිදු කළ හැකි බවත් පවසා ඇත.
එමෙන් ම මේ වන විට විරෝධතා ව්‍යාපාරයන් අසල රුපියල් 5000 නෝට්ටු සංසරණයවීමක් වාර්තා වී ඇති බවත් පසුගිය ජනාධිපතිවරණයට පෙර ශ්‍රී ලංකා මහ බැංකුවෙන් නීති විරෝධී ලෙස බැහැර ගෙන ආ කෝටි 1300ක මුදල් ඇති බවත් මේ සියලු සිද්ධීන් සම්බන්ධයෙන් පුළුල් පරීක්ෂණ සිදු කරන බවත් වැඩි දුරටත් සදහන් කර ඇත.
පසුගිය දින කිහිපයක මුද්‍රිත මාධ්‍ය ඔස්සේ රටේ යම් යම් කරුණු සම්බන්ධයෙන් වැරදි වාර්තා සිදු කොට ඇති බව පෙන්වා දී ඇති අමාත්‍යවරයා ඕනෑම අවස්ථාවක තම අමාත්‍යංශයේ කරුණු දැනගැනීමක් සම්බන්ධයෙන් තමන් තොරතුරු ලබාදීමට කටයුතු කරන බවත් ජාති විරෝධී මෙන් ම රටේ තත්ත්වයන් පිළිබඳ ව වාර්තා කිරීමේ දී වගකීමෙන් යුතු ව වාර්තාකරණ කටයුතු සිදු කරන් ලෙසත් මාධ්‍යවේදීන්ගෙන් ඉල්ලා තිබේ.
වත්මන් රජයේ අස්ථාවර භාවයක් ඇතැයි මාධ්‍ය මගින් පෙන්වීමට උත්සාහ කරන අතර ඕනෑම මාධ්‍යවේදියෙකුට දේශපාලන කැමැත්තක් හා ඒ පිළිබඳ ව කටයුතු කිරීමේ අයිතියක් ඇති නමුත් පුවත් වාර්තා කිරීමේ දී සියලු දෙනා එක සේ සලකන ලෙසත් ඔහු වැඩි දුරටත් ඉල්ලා ඇත.
Facebook Comments
