දෙමළ විමුක්ති කොටි සංවිධානයේ හිටපු සාමාජිකයන් පිරිසකට පහර දී ඔවුන්ගේ නිවාස වලට අලාබහානි සිදු කළ බවට වන සංරක්ෂණ දෙපාර්තමේන්තුවේ නිලධාරීන් පිරිසකට චෝදනා එල්ල වී තිබේ.
වන සංරක්ෂණ දෙපාර්තමේන්තුවේ නිලධාරීන් සිදු කළ පහර දීම හමුවේ තුවාල ලැබු මුලතිව්, ප්‍රාදේශිය ලේකම් කොට්ඨාසයේ කයිවේල් පදිංචි කරුවන් දෙදෙනෙකු පුදුකුඩිඉරිප්පු රෝහලට ඇතුලත් කර ඇති බවයි පළාත් බද වාර්තාකරුවන් පවසන්නේ.
එල්.ටී.ටී.ඊ සංවිධානය විසින් 2000 වසරේදී සිය සංවිදානයේ සාමාජික පවුල් 45 ක් වෙනුවෙන් කයිවේල් ප්‍රදේශයේ නිවාස සංකීර්ණයක් ඉදිකර දී තිබෙන අතර ඇවිලී ගිය දැඩි යුද වාතාවරණය යටතේ 2000-2009 අතර කාලය තුලදී එම පවුල් එම නිවාස වලින් ඉවත්ව වෙනත් ප්‍රදේශ කරා ගොස් තිබේ.
යුද්ධය නිමා වීමෙන් පසුව ඔවුන් යළි සිය නිවාස තිබු ස්ථාන වල පදිංචි වීමට අවස්ථා කිහිපයකදී දැරු උත්සාහයන් අසාර්ථක වු බව පවසන පළාත් බද වාර්තාකරුවන් පවසන්නේ 2012 වසරේදී වන සංරක්ෂණ දෙපාර්තමේන්තුව විසින් එම ප්‍රදේශයද ඇතුලත් වන ලෙස මායිම් ගල් යොදා එම භුමිය වන සංරක්ෂණ දෙපාර්තමේන්තුව යටතට ගත් බවයි.
2000 වසරේදී කයිවේල් නිවාස 45 ට උරුමකම් කියු පවුල් අතුරින්, පවුල් කිහිපයක් වෙනත් ප්‍රදේශ වල නිවාස ඉදිකරගෙන තිබෙන අතර තවත් පවුල් කිහිපයක සාමාජිකයන් මිය ගොස් තිබේ.
ඉතිරි පවුල් 20 ක පමණ පිරිස මේ සතිය මුලදී තාවකාලිකව නිවාස ඉදිකරගනිමින් යළි එම භුමියේ පදිංචි වීමට අවශ්‍ය කටයුතු සකස් කරමින් සිටි බවයි පළාත් බද වාර්තාකරුවන් පවසන්නේ.
ජුලි 12 වැනිදා දහවල් කාලයේ එම ස්ථානයට තුවක්කු, පිහි, කැති, පොළු, සහිතව පැමිණි වන සංරක්ෂණ දෙපාර්තමේන්තුවේ නිළධාරීන් සිය නිවාස විනාශ කරමින් තමන්ට පහර දුන් බවට හිටපු එල්.ටී.ටී.ඊ සාමාජිකයන් චෝදනා කරයි.
ඔවුන් වැඩි දුරටත් චෝදනා කරන්නේ වන සංරක්ෂණ දෙපාර්තමේන්තුවේ නිලධාරීන් සිය නිවාස ගිනී තැබීම සදහා භුමිතෙල්ද රැගෙන ආ බවයි.
12 වැනිදා හවස පුදුකුඩිඉරිප්පු පොලිස් ස්ථානාධිපතිවරයා ඇතුළු කණ්ඩායමක් එම ස්ථානයට පැමිණ ඇති වී තිබෙන ගැටළුව සම්බන්ධයෙන් දුරකථන මාර්ගයෙන් ප්‍රාදේශිය ලේකම්වරයා දැනුවත් කර ඇත.
ඉඩම් ගැටළුව සම්බන්ධයෙන් ග්‍රාම නිලධාරීවරයාද දැනුවත් කළ පොලිස් ස්ථානාධිපතිවරයා ජනතාවට පොරොන්දු වී ඇත්තේ ග්‍රාම නිලධාරිවරයා සමග වැඩි දුරටත් සාකච්ඡා කර විසදුමක් ලබා දෙන බවයි.
Facebook Comments
