බලහත්කාරයෙන් අතුරුදහන් කර සිටින දහස් සංඛ්‍යාත සිය සමීපතමයන් වෙනුවෙන් ජාත්‍යන්තර යුක්තිය ඉටුවන තෙක් සිය අරගලය අත්නොහරින බව උතුරු නැගෙනහිර දෙපළාතේ බලහත්කාරයෙන් අතුරුදහන් කිරීමට ලක් වූවන්ගේ ඥාතීන් ජාත්‍යන්තර දූත මණ්ඩලයක් හමුවේ අවධාරණය කර තිබේ.
ශ්‍රී ලාංකික සම්හවයක් සහිත දෙමළ පාර්ලිමේන්තු මන්ත්‍රීවරයකු කැනඩාවේ අමාත්‍යවරයකු වී සතියක් ගතවීමට මත්තෙන් කොළඹ කැනඩා තානාපති කාර්යාලයේදී ඉහල පෙලේ විදේශීය නියෝජිතයන් සමග අගෝස්තු 1 වැනිදා පැවැත්වු සාකච්ඡා නිමාවිමෙන් පසු මාධ්‍ය වෙත අදහස් දක්වමින් යුද පීඩිත මාතාවන් ඒ බව සඳහන් කර ඇත.
උතුරු නැගෙනහිර බලහත්කාරයෙන් අතුරුදහන් කරනු ලැබූවන්ගේ ඉරණම හෙළිකර වගකිවයුත්තන් නීතිය හමුවට පමුණුවන ලෙස බලකරමින් දෙමළ අම්මාවරුන් ගෙනයන ලංකාවේ දීර්ඝතම අරගලයට දින 2354 ක් සපිරෙන දිනයේ අම්පාර දිස්ත්‍රික්කයේ අතුරුදහන් කළවුන්ගේ ඥාතීන්ගේ සංගමයේ සභාපතිනි තම්බිරාසා සෙල්වරානි මාතාව කියා සිටියේ සිය අරගලයේ ඉල්ලීම් සම්බන්ධයෙන් ජාත්‍යන්තර අධිකරණයේ මැදිහත් වීමක් විදේශිය නියෝජිතයන්ගෙගෙන් ඉල්ලා සිටි බවයි.
“අපේ අරගලය දිගට ඇදගෙන යන්නේ නැතුව අපිට විසඳුමක් ඕනෙ කියලා ඉල්ලීම් කළා. අපේ අරගලය ජාත්‍යන්තර අධිකරණයට ඉදිරිපත් කරලා විසඳුමක් ලබාදෙන්න කියලා ඉල්ලීම් කළා.”
සිය අරගලය සමග සහයෝගයෙන් කටයුතු කරන බවට විදේශිය නියෝජිතයන් පිරිස පොරොන්දු වු බව වව්නියාව දිස්ත්‍රික්කයේ බලහත්කාරයෙන් අතුරුදහන් කළවුන්ගේ ඥාතීන්ගේ සංගමයේ ලේකම් සිවානන්දන් ජෙනීටා මාතාව පවසන්නීය.
“අපේ සාක්ෂි විනාශ වෙන්න කලින් යුක්තිය ඉටු කරන්න ඔන කියලා අපි අවධාරණය කළා. ඉදිරියේදී අපේ අරගල සමඟ සහයෝගයෙන් කටයුතු කරන බවට ඔවුන් පොරොන්දු උනා. ”
මන්නාරම දිස්ත්‍රික්කයේ අතුරුදහන් කළවුන්ගේ ඥාතීන්ගේ සංගමයේ සභාපතිනි මනුවෙල් උදයචන්ද්‍රා මාතාව විශ්වාස කරන්නේ තමන් ඉල්ලා සිටිය යුක්තිය වෙනුවෙන් විදේශිය යහපත් විසදුමක් ලබා දෙනු ඇති බවයි.
“අපේ ප්‍රශ්නය ජිනීවා දක්වා ගියත් සාධාරණ විසඳුමක් ලැබිිලා නෑ. අපි මේ ගැන ඔවුන්ව දැනුවත් කළා. අනාගතයේදී ඔවුන් මොනවා කරයිද අපි දන් නෑ. කොහොම උනත් ඔවුන් හොඳ විසඳුමක් ලබා දෙයි කියලා අපි විශ්වාසය කරනවා. ”
අතුරුදහන් කරනු ලැබුවන් සොයා දීම ඇතුළු මානව හිමිකම් රැකදීම සඳහා ගතයුතු පියවර යෝජනා කරමින් එක්සත් ජාතීන්ගේ මානව හිමිකම් මණ්ඩලය විසින් සම්මත කරගත් ‘ශ්‍රී ලංකාවේ සංහිඳියාව, වගවීම සහ මානව හිමිකම් ප්‍රවර්ධනය කිරීම’ යෝජනාවට විදේශ අමාත්‍ය අලි සබ්රි ජිනීවා සමුළුවේදී දැඩි ලෙස විරෝධය පල කර තිබුනි.
පසුගියදා කැනඩාවේ අමාත්‍යවරයකු බවට පත්වූ ගැරී ආනන්දසංගරී, ජාත්‍යන්තර මානව හිමිකම් නීතිය පිලිබඳ විශේෂඥතාවයක් දරන නීතීඥයෙකි.
එසේම, ශ්‍රී ලංකාවේ ආරක්ෂක අංශ සහ නෙරපා දැමූ හිටපු ජනාධිපති ගෝඨාභය රාජපක්ෂ ඇතුළු බලධාරීන්ගෙන් සිදු නොවුණු බව පවසන යුද අපරාධ චෝදනා සම්බන්ධයෙන් වගවීම ඉල්ලා සිටින ජාත්‍යන්තර දෙමළ ප්‍රජාව අතර ප්‍රමුඛයෙකි.
මෙරටට ඇතුල් වීමට අවස්ථාව වළක්වමින් ගැරී ආනන්දසංගරීට වීසා ලබා දීම රනිල් වික්‍රමසිංහ පාලනය විසින් පසුගියදා ප්‍රතික්ෂේප කර තිබුනි.
ශ්‍රී ලංකාවේ පිහිටි කැනඩා තානාපති කාර්යාලයේදී විදේශිය නියෝජිතයන් සමග අගෝස්තු 1 වැනිදා පැවැත්වු සාකච්ඡා සදහා බලහත්කාරයෙන් අතුරුදහන් කිරීමට ලක් වු උතුරු නැගෙනහිර දෙපලාතේ දිස්ත්‍රික්ක අටම නියෝජනය කරමින් සාමාජිකයන් සහභාගී වී තිබේ.
Facebook Comments
