මන්නාරම මඩු දේවස්ථානයේ වාර්ෂික මංගල්‍යයට සහභාගී වෙමින් ජනාධිපතිවරයා සිදු කළ කතාව තැනට නොගැලපෙන බවට කතෝලික සභාවේ විරෝධය එල්ල වී තිබේ.
2048 වන විට දියුණු ශ්‍රී ලංකාවක් ගොඩනැඟීම ඉලක්ක කරගනිමින් සිදු කෙරෙන සංවර්ධන ව්‍යාපෘති කිහිපයක් සම්බන්ධයෙන්ද ජනාධිපතිවරයා මන්නාරම මඩු දේවස්ථානයේ වාර්ෂික මංගල්‍යයට අගෝස්තු 15 වැනිදා සහභාගී වෙමින් කතාවක් පවත්වා තිබුනි.
කතෝලික සභාව විසින් නිකුත් කරන ශ්‍රී ලංකාවේ පළවන ඉපැරණිතම සිංහල පුවත්පත වන ඥානාර්ථ ප්‍රදීපයේ මෙවර ඉරිදා කලාපයේ “මඩු පල්ලිය සහ ජනාධිපති කතාව” මැයෙන් ලියා ඇති කතු වැකිය හරහා ජනාධිපතිවරයාගේ කතාවට විරෝධය මතු කර ඇත.
මඩු සිද්ධස්ථානය මුළුමහත් ශ්‍රී ලාංකේය ජනතාවගේම ගෞරවාදරයට පාත්‍ර චී ඇත්තේ පූජනීය භූමියක් ලෙස බව පෙන්වා දෙන ඥානාර්ථ ප්‍රදීපයේ කතුවරයා අවධාරණය කරන්නේ කතෝලික මෙන්ම අන්‍යාගමික ජනතාව ද මංගල්‍යය සඳහා එහි යන්නේ, ‘මහත්වූ භක්තියෙන් ප්‍රාර්ථනා සහ දුක වේදනාව මරුද මඩු මෑණියන්‌ ඉදිරියේ තැබීමට මෙන්ම එතුමියගේ මැදිහත්කමින් දෙවිපියාණන්ගෙන් තමන් ලද සියලු වරප්‍රසාද චෙනුවෙන් තුති පිදීමට’ බවයි.
“එදා සිට මේ දක්වාම මරුද මඩු පුදබිම ශුද්ධවූ සහ පූජනීය බිමක්‌ ලෙස කතෝලික සැදැහැවත්හු සලකති. ඵ් බිමෙහි දී එම ශුද්ධවත් බවට අල්ප හෝ හානියක් වන වචනයන් පවා මුවින් පිට නොකිරීමට ඔවුහු පරෙස්සම් වෙති. මරුද මඩු මෑණියන්ගේ මංගල මහා පුජාවට ඔවුන් සහභාගි චන්නේ ඉමහත් භක්තියකිනි. දිව්‍ය පූජාවෙන් අනතුරුව ඔවුන් පුල පුලා භක්තියෙන් බලා සිටින්නේ මරුද මඩු මෑණියන්ගේ ප්‍රථිමාව රැගත් පෙරහැර දෙසය.”
ඒ අතරතුර සිදුවූ ජනාධිපතිවරයාගේ කථාව සිය ජනතාවගේ එම අධ්‍යාත්මික භාවනාව සහ ශීලය බ්ඳ දැමීමක් බව බොහෝ දෙනාගේ මතය වී ඇති බවයි ඥානාර්ථ ප්‍රදීපය පවසන්නේ.
ආගමික සිද්ධස්ථානයක ආගමික මෙහෙයන් අතරතුර දේශපාලකයන්ට විශේෂයෙන් මතුවන්නට හෝ කථා පැවැත්වීමට හෝ අවස්ථාව නො දිය යුතු බව ඥානාර්ථ ප්‍රදීපය අවධාරණය කරයි.
“අනෙක් අතට, තමා සිටින්නේ කොතැනකද, තමන් කථා කරන්නේ කවුරුන්ටද, ඒ අනුව තමා කථා කළ යුත්තේ සහ නොකළ යුත්තේ මොනවාද යන කාරණා පිළිබඳව රටේ ප්‍රධාන පුරවැසියා ලෙස, ජනාධිපතිවරයාට හැඟීමක් තිබිය යුතුය යන්න ද නො කියාම බැරිය. පොරොන්දුවලින් පිරුණ දේශපාලන කථා ඒ අවස්ථාවට කෙසේවත් නො ගැලපෙන බව ඔහු තේරුම්ගත යුතුව තිබිණි.”
මෙවර මඩු මංගල්‍යයේ උදෑසන දේව මෙහෙයට ද ජනාධිපති රනිල් වික්‍රමසිංහ එක්ව තිබු අතර මඩු දේවස්ථානයේ වාර්ෂික මංගල්‍ය දේශීය සංස්කෘතියේ කොටසක් බැවින් මෙම උත්සවය ජාතික උත්සවයක් ලෙස සලකා එය ආරක්ෂා කිරීමත්, අඛණ්ඩව පවත්වාගෙන යාමට අවශ්‍ය සහාය ලබාදීමත් රජයේ වගකීමක් බව ඔහු පවසා තිබුනි.
මන්නාරම බලශක්ති කේන්ද්‍රස්ථානයක් ලෙස සංවර්ධනය කිරීමට පියවර ගන්නා අතර, සැප්තැම්බර් 15 වනදා සිට තලෛයිමන්නාරම සිට කොළඹ දක්වා නගරාන්තර සීග්‍රගාමී දුම්රිය සේවාවක් ආරම්භ කරන බවත් ජනාධිපති රනිල් වික්‍රමසිංහ එහිදී සදහන් කර තිබේ.
“මඩු මාතාව වැඩ සිටින මෙම මන්නාරම ප්‍රදේශය පුනර්ජනනීය බලශක්තිය බහුලව ඇති ප්‍රදේශයක්. මෙහි ඇති සූර්ය ශක්තිය, සුළං ශක්තිය සහ හරිත ශක්තිය සමඟ මන්නාරම දිස්ත්‍රික්කය බලශක්ති කේන්ද්‍රස්ථානයක් ලෙස ගොඩනැඟිය හැකියි. එසේම පූනරීන් බලශක්ති නගරයක් බවට පත් කිරීමටත් අප සැලසුම් කර තිබෙනවා. මෙම සෑම සංවර්ධන කටයුත්තක්ම සිදු කරන්නෙ මේ ශුද්ධ භූමිය හා වනාන්තර ආරක්ෂා වන අන්දමින් බව මම කියන්න කැමතියි. එමෙන්ම මෙම ප්‍රදේශවල සංවර්ධන කටයුතුවලදී මෙහි පියතුමන්ලාගේ අවවාද අනුශාසනා ලබාගන්නා ලෙස මම නිලධාරීන්ට දැනුම් දී තිබෙනවා ”
ජාතික සමගිය හා සංහිඳියාව ඇති කිරීම පිළිබඳ ජනාධිපති රනිල් වික්‍රමසිංහ පාර්ලිමේන්තුවේ සිදුකළ ප්‍රකාශය ප්‍රශංසනීය බවත් ඊට වතිකානුවේ හා කතෝලික සභාවේ ආශීර්වාදය හිමිවන බවත් ප්‍රධාන දේව මෙහෙයට එක් වූ ශ්‍රී ලංකාවේ වතිකානු තානාපති හිමිපාණන් පැවසූ බව ජනාධිපති මාධ්‍ය එකකය නිවේදනය කර තිබේ.
“රටේ සාමය හා සංහිඳියාව පවත්වා ගැනීමට ආගමික නායකයන්ට විශාල වගකීමක් ඇති බව පෙන්වා දුන් බ්‍රයන් උඩෙයිග්වේ හිමිපාණන් රට බෙදා වෙන්කරන ආගමික ඒජන්තවරයෙක් වෙනවාද, නැත්නම් රටම එකතු කරන ආගමික නායකයෙක් වෙනවාද යන්න තීරණය වන්නේ තමන් කරන ක්‍රියාව අනුව බවද අවධාරණය කළහ.” එහි වැඩි දුරටත් සදහන්ය.
Facebook Comments
