කුරුන්තුර්මලේ වගා බිම් නිදහස් කිරීම තවත් කල් යන ලකුණු

පුරාවිද්‍යා දෙපාර්තමේන්තුව විසින් සීමා මායිම් ලකුණු කර තිබෙන මුලතිව් කුරුන්තුර්මලේ තන්නිමුරිප්පු වැව් දියෙන් ගොවිතැන් කරන දෙමළ ගොවීන්ගේ වගා බිම් ද ඇතුළු ඉඩම් නිදහස් කිරීම තව දුරටත් ප්‍රමාද වනු ඇති බවට දෙමළ ජනතා නියෝජිතයෙක් සැක පළ කර තිබේ.

“තියෙන තත්වය දිහා බලන කොට මේ ඉඩම් වහාම නිදහස් කරන පාටක් නැහැ. නැවතත් ජනාධිපති එක්ක කතා කරන්න ඕනේ කියලා පැමිණ සිටි උසස් නිලධාරින් කියා සිටියා. ඒක නිසා ජනාධිපතිතුමාට මේ ගැන සඳහන් කරලා අපේ ජනතාවගේ ඉඩම් නිදහස් කරගන්න අපි උත්සාහ කරනවා. මෙය වහා සිදුවේද යන්න සැක සහිතයි.”

ටෙලෝ පක්ෂයේ නායක පාර්ලිමේන්තු මන්ත්‍රී සෙල්වම් අඩෙයික්කලනාදන් ඒ බව සඳහන් කළේ මුලතිව්, කුරුන්තුර්මලේ, තන්නිමුරිප්පු වැව් දියෙන් ගොවිතැන් කරන දෙමළ ගොවීන්ගේ කුඹුරු ඉඩම් පුරා විද්‍යා දෙපාර්තමේන්තුව විසින් අල්ලා ගෙන ඇති බවට එල්ල වන චෝදනා හමුවේ එම රාජ්‍ය නිලධාරීන්, ඉඩම් හිමියන් සහ ප්‍රදේශයේ දේශපාලනඥයන් එක්ව අගොස්තු 28 වැනි සඳුදා කළ නිරීක්ෂණ චාරිකාවකින් පසු මාධ්‍ය වෙත අදහස් දක්වමිනි.

මුලතිව් දිස්ත්‍රික් ලේකම් කාර්යාලයේ නිලධාරීන්, පුරා විද්‍යා දෙපාර්තමේන්තු, වන සංරක්ෂණ, වන ජීවී, මුහුදුබඩපත්තු ප්‍රාදේශීය ලේකම් කාර්යාලයේ නිලධාරීන් හා ප්‍රදේශයේ දෙමළ ජනතා නියෝජිතයන් අගෝස්තු 16 වැනිදා මුලතිව් දිස්ත්‍රික් ලේකම් කාර්යාලයේදී මුලතිව් දිස්ත්‍රිකයේ ඉඩම් ගැටළු සම්බන්ධයෙන් කළ සාකච්ඡාවේදී ගත් තීරණයකට අනුව මෙම නිරීක්ෂණ චාරිකාව සිදු කළ බවයි පළාත් බද වාර්තාකරුවන් පවසන්නේ.

කුරුන්තුර්මලේ පුරාවිද්‍යා රක්ෂිතය තවත් අක්කර සිය ගණනකින් පුළුල් කිරීමට සැලසුම් කිරීමත්, එම භුමියේ බෞද්ධ විහාරයක් අලුතින් ඉදි කිරීමත් කලක පටන් ගැටුම්කාරී තත්වයකට තුඩු දී තිබේ.

නිරීක්ෂණ චාරිකාවට එක්ව සිටි ප්‍රදේශයේ දෙමළ ජනයා පවසන්නේ 1933 වසරේ මැයි 12 වැනිදා බ්‍රිතාන්‍ය ජාතිකයන් විසින් නිකුත් කළ ගැසට් පත්‍රයක් පෙන්වු පුරා විද්‍යා දෙපාර්තමේන්තුවේ නිලධාරීන් අක්කර 78 ක ප්‍රදේශයක් කුරුන්තුර්මලේ භුමියට අයත් බවට කරුණු පැහැදිලි කළ බවයි.

ඊට පසුව ප්‍රදේශයේ සිදු කළ අධ්‍යනයකින් අනතුරුව පුරා වස්තු පවතින බවට හදුනාගත් තවත් අක්කර 229 ක භුමියක් පුරා විද්‍යා දෙපාර්තමේන්තුව විසින් කුරුන්තුර්මලේ පුරා විද්‍යා රක්ෂිතය වෙනුවෙන් සීමා මායිම් කර ඇති බව ඔවුන් විසින් තවදුරටත් කරුණු දක්වා ඇත.

ප්‍රදේශයේ දෙමළ ජනයා පවසන්නේ එම සීමාවට අයත් භුමිය තුළ සිය ඥාතීන් වසර 100 ක ට අධික කාලයක සිට ගොවිතැන් කරන කුඹුරුද පවතින බවයි.

මෙම ඉඩම් ගැටළුව සම්බන්ධයෙන් ජුනි 8 වැනිදා දෙමළ ජාතික සන්ධානයේ නියෝජිතයන් ජනාධිපති රනිල් වික්‍රමසිංහ සමග පැවැත්වු සාකච්ඡාවකදී ඉඩම් සම්බන්ධ රාජ්‍ය ප්‍රතිපත්ති ක්‍රියාවට නංවන ලෙස පුරාවිද්‍යා දෙපාර්තමේන්තුවේ අධ්‍යක්ෂ ජෙනරාල් මහාචාර්ය අනුර මනතුංගට ජනාධිපති රනිල් වික්‍රමසිංහ දැඩි ස්වරයෙන් නියෝග කිරීමෙන් පසුව මහාචාර්යවරයා සිය ධුරයෙන් ඉල්ලා අස්වීමට කටයුතු කර තිබුනි.

මුලතිව් කුරුන්තුර්මලේ තන්නිමුරිප්පු වැව් දියෙන් ගොවිතැන් කරන ගොවීන්ගේ වගා බිම් ද ඇතුළුව ඉඩම් අක්කර 229 ක් මැනිමේ කටයුතු සිදු කරන ලෙස එවක පුරාවිද්‍යා දෙපාර්තමේන්තුවේ අධ්‍යක්ෂ ජෙනරාල් මහාචාර්ය අනුර මනතුංග නියෝග කර තිබෙන බව ඉලංකෙයි තමිල් අරසු කච්චි පාර්ලිමේන්තු මන්ත්‍රී චාල්ස් නිර්මලනාදන් ජනාධිපති හමුවේ අනාවරණය කළ අවස්ථාවේ මහාචාර්යවරයා පවසා තිබුනේ තමන් දුන් නියෝගය ඉල්ලා අස් කරගැනීම ‘ප්‍රශ්නයක්’ බවයි.

ජනාධිපති රනිල් වික්‍රමසිංහ එදින සඳහන් කළේ මුලතිව් කුරුන්තුර්මලේ තන්නිමුරිප්පුහි අතීතයේ තිබී ඇත්තේ දෙමළ බෞද්ධ විහාරයක් බවයි. එය පුරාවිද්‍යා ස්ථානයක් ලෙස සංරක්ෂණය කිරීම අත්‍යාවශ්‍ය බව අවධාරණය කළ ජනාධිපතිවරයා ‘පන්තියක් දමා’ ඉතිහාසය ඉගැන්වීමටද ඉදිරිපත් විය.

අගෝස්තු 28 වැනිදා තන්නිමුරිප්පු ප්‍රදේශයේ රාජ්‍ය නිලධාරීන් සිදු කළ ක්ෂේත්‍ර නිරීක්ෂණ චාරිකාවට එක්ව සිටි එම ප්‍රදේශයේ කුඹුරු ඉඩමකට හිමිකම් කියන දෙමළ මාතාවක් සදහන් කලේ සිය ඉඩම් ගැටළුව විසදීමට ජනාධිපතිවරයා පොරොන්දු වූවත් එය තව දුරටත් දික්ගැස්සෙමින් පවතින බවයි.

” කුඹුර මැද ගල් ටික හිටවලා ගොවිතැන් කරන්න එපා කියලා තහනම් කරලා තියනවා. කොළඹදීත් අපි ජනාධිපතිතුමා හමුවෙලා මේ ගැන කතා කරා. එයා කිව්වා අම්මේ ඔයාගේ ඉඩම් ඔයාලට තමයි. ඒක අපි නිදහස් කරලා දෙනවා. ඒ ගැන හිතන්න එපා. ඔයා යන්න කියලා. අද ඇවිල්ලා අවුල් කරලා ගිහිල්ලා. අපි මේකට මොනවද කරන්නේ. අපිට මේකට විසදුමක් දෙන්න.”

ක්ෂේත්‍ර නිරීක්ෂණ චාරිකාව අතරතුර දී වව්නියාව, මන්නාරම, මුලතිව් ප්‍රාදේශිය පුරාවිද්‍යා සහකාර අධ්‍යක්ෂ ආර්.ජී ජයතිලක සදහන් කළේ සිය ඉල්ලීම වන සංරක්ෂණ දෙපාර්තමේන්තුව හරහා ලිඛිතව පුරා විද්‍යා දෙපාර්තමේන්තුවට ඉදිරිපත් කරන ලෙස ඉඩම් හිමියන්ගෙන් ඉල්ලා සිටි බවයි.

“අපි පුරා විද්‍යා රක්ෂිතයක් විදිහට වෙන් කරන්න ඉල්ලන්නේ පුරා වස්තු තියනවානං. එතකොට මේ කොටස තුල බැලුවම තැන් තැන් වල කුඩා සහ සාමාන්‍ය ප්‍රමාණවල පුරා වස්තු තියන නිසා තමයි අපි යම් බිම් කොටසක් වෙන් කර ගත්තේ අක්කර 229 ක කොටසක්. නමුත් දැන් මේකෙදී අපි හරියටම දන් නෑ මේ මැනුම් කරන්නේ අපි ජී.අයි.එස් තාක්ෂණය හරහා. හරියටම නිවැරදි භුමි ප්‍රමාණය කියන්න බැහැ. දැන් අපි කිව්වේ ඒ ගොල්ලන්ගේ ඉල්ලීම ලිඛිතව අපේ දෙපාර්තමේන්තුවට ඉදිරිපත් කරන්න. වන සංරක්ෂණ දෙපාර්තමේන්තුව හරහා. මොකද වන සංරක්ෂණ දෙපාර්තමේන්තුවට තමයි මේ සමස්ත ඉඩම් භුමියම අයිති වෙන්නේ. එතකොට ඔවුන් හරහා අපිට ඉල්ලීමක් කරහම අපි එක පිලිබදව සලකා බලලා නැවත අපිට පුළුවන් අවශ්‍යතාවයක් පවතීනම් මායිම් පිළිබදව සහ මොන පුරා වස්තු නිසාද මේ කොටස වෙන් වෙලා තියෙන්නේ කියලා බලලා අතිරේකව යම් ඉඩම් කොටසක් තියනවානම්, පුරා වස්තු නැති කොටසක් ඒ කොටස උනත් අපිට නැවත ලබා දීමේ හැකියාවක් තියනවා.”

ඉඩම් අත්පත්කරගැනීමේ අවශ්‍යතාවයක් පුරා විද්‍යා දෙපාර්තමේන්තුවට නොමැති බවටත් ප්‍රාදේශිය පුරාවිද්‍යා සහකාර අධ්‍යක්ෂවරයා එහිදී මාධ්‍යවේදීන් වෙත පවසා තිබුනි.