දෙමළ විමුක්ති අරගලය වෙනුවෙන් අවිහිංසාවාදී ලෙස ජීවිතය පරිත්‍යාග කිරීම නිසා ත්‍යාගී දිලීපන් ලෙසින් ගෞරවයට පාත්‍ර වන එල්.ටී.ටී.ඊ සංවිධානයේ ලුතිතන් කර්නල් රාසයියා පාර්තිපන් උතුරු නැගෙනහිර ස්ථාන කිහිපයකදීම අනුස්මරණය කරද්දී, අධිකරණ නියෝගයක් ලබා ගනිමින් ත්‍රිකුණාමලයේ අනුස්මරණය නැවැත්වීමට පොලීසිය ක්‍රියා කර තිබේ.
ත්‍රිකුණාමලය වරාය පොලීසියේ ස්ථානාධිපති ප්‍රධාන පොලිස් පරීක්ෂක ආර්.ඒ.ජේ.එස් රණවීර විසින් අධිකරණයට කළ කරුණු දැක්වීමකින් පසුව සැප්තැම්බර් 26 වැනිදා ත්‍රිකුණාමලය ප්‍රධාන මහේස්ත්‍රාත් සිසින් කුලකොට්ටන් ශාලාවේ හා ගාන්ධි වටරවුම අසල පැවැත්වීමට නියමිතව තිබු තිලීපන් සමරු තහනම් කර ඇත.
ප්‍රධාන පොලිස් පරීක්ෂණ ආර්.ඒ.ජේ.එස් රණවීර විසින් අධිකරණයට අවධාරණය කර ඇත්තේ “එල්.ටී.ටී.ඊ සංවිධානය තහනම් සංවිධානයක් බැවින් එහි මිය ගිය සාමාජිකයන් සැමරීම සදහා සැමරුම් උත්සව පැවැත්වීම මගින් සිංහල, දෙමළ, මුස්ලිම් ජනවර්ගයා අතර වෛරය, ක්‍රෝධය, අසමගිය ඇති වී ඔවුන් අතර ඇති අනෝන්‍ය සම්බන්ධතාවය බිද වැටී එය රට පුරා ව්‍යාප්ත වීමට ඇති හැකියාව වැඩි” බවයි.
සැමරුම් තහනම් නියෝගයේ ත්‍රිකුණාමලය ප්‍රධාන මහේස්ත්‍රාත්වරයා සදහන් කර ඇත්තේ ස්ථානාධිපතිවරයා විසින් කර ඇති ඉල්ලීම “යුක්ති සහගත හා සාධාරණ” එකක් බවයි.
පළාත් බද වාර්තාකරුවන් පවසන්නේ තිලිපන් අනුස්මරණය සදහා ත්‍රිකුණාමලය කුලකොට්ටන් ශාලාවට රැස්ව සිටි දෙමළ ජනයා අධිකරණ නියෝගයෙන් පසුව තිලීපන්ගේ ඡායාරූප ඉවත් කර ඒ වෙනුවට පුටුවකට මල් මාලා පළඳා අනුස්මරණය සිදු කළ බවයි.
මාරාන්තික උපවාසයක යෙදී සිටියදී මිය ගිය තිලීපන් සැමරීම සඳහා යාපනය, නල්ලුර් කන්දසාමි කෝවිල අසල ඉදිකර තිබු 2010 දී රජයේ ආරක්ෂක අංශ විසින් කඩා බිඳ දමන ලද තිලීපන්ගේ ස්මාරකය ඉදිරිපිට දී ඔහුගේ 36 වැනි මරණ සංවත්සරය මහත් ජන සහභාගිත්වයකින් යුතු පුෂ්පදීප උපහාරයකින් සැප්තැම්බර් 26 වැනි අගහරුවාදා පැවැත්වුණු බව පළාත් බද වාර්තාකරුවෝ පවසති.
වැසි තත්වය මධ්‍යයේ පැවැති අනුස්මරණය උත්සවය එල්.ටී.ටී ඊ සංවිධානයට බැදී දෙමළ ඊලාම් විමුක්ති අරගලය වෙනුවෙන් ජීවිතය කැපකළ තිදරු මවක් විසින් උදෑසන 10.48 ට පහන් පත්තු කරමින් ආරම්භ කර තිබුනේ තිස් හය වසරකට පෙර තිලීපන් අවසන් හුස්ම පොද හෙලු වේලාව සිහිපත් කරමිනි.
තිලීපන් අනුස්මරණ සතියට සමගාමීව විදි සංචාරය කළ රථ පෙළපාලි හයක් අද පෙරවරුවේ තිලීපන් ස්මාරකය අසලට ලගා වු බව පළාත් බද වාර්තාකරුවෝ වැඩි දුරටත් පවසති.
මේ වන විට දකුණේ අරගලකරුවන් ද පෙළීමට යොදාගෙන තිබෙන ත්‍රස්තවාදය වැළක්වීමේ පනතට එරෙහිව 36 වසරකට ඉහතදී දිලීපන් සටන් වැදී තිබුණි.
සිංහල හමුදා කඳවුරු දෙමළ පළාත් වලින් ඉවත් කර ගැනීම, දෙමළ ජනතාවගේ පළාත්වල තාවකාලික දෙමළ ආණ්ඩුවක් පිහිටුවන තෙක් පුනරුත්ථාපන වැඩ තාවකාලිකව අත්හිටුවීම, දෙමළ ජනතාවට අයිති ගම් පළාත්වල සිංහලයන් පදිංචි කරවීම කරගෙන යාම නැවැත්වීම, දෙමළ පළාත්වල සිංහල පොලිස් ස්ථාන පිහිටුවීම නතර කිරීම සහ ත්‍රස්තවාදය වැලැක්වීමේ පනත යටතේ පොලිස් ආරක්ෂක මූලස්ථාන වල සිටින දේශපාලන රැඳවුම්කරුවන් වහා නිදහස් කිරීම ආදී ඉල්ලිම් ඉදිරිපත් කරමින් 1987 සැප්තැම්බර් 15 වනදා තීලිපන් උපවාසයක් ආරම්භ කළේය.
යාපනය විශ්ව විද්‍යාලය ඉදිරිපිට උපවාසයක යෙදී සිටියදී තිලීපන් මිය ගියේ 1987 සැප්තැම්බර් 26 වෙනිදා ය. යාපනයේ සරසවි සිසුන් ද අද උදැසන සරසවි භුමිය තුලදී ත්‍යාගී තිලීපන් අනුස්මරණය කිරීමට කටයුතු කර තිබුනි.
යාපනයේ තවත් ස්ථාන කිහිපයකම තිලීපන් සමරු පැවැති අතර පළාත් බද වාර්තාකරුවන් වැඩි දුරටත් පවසන්නේ ප්‍රධාන අනුස්මරණය පැවැති නල්ලූර් කෝවිල අසල පිහිටි තිලීපන් ස්මාරකය අභියස දී තිලීපන්ගේ ජීවිත කථාව හා ඔහු පිළිබදව ලියවුණ පුවත්පත්, සඟරා ලිපි හා අනෙකුත් ලේඛන ඇතුළත් ප්‍රදර්ශනයක් ද පැවැත්වුන බවයි.
මුලතිව්, පුදුකුඩිඉරිප්පු වෙළෙඳ සංගමයේ සංවිධානත්වයෙන් පුදුකුඩිඉරිප්පු නගරයේද තිලීපන් අනුස්මරණයක් පැවැති අතර ඉලංකෙයි තමිල් අරසු කච්චි කිලිනොච්චි කාර්යාලයේදී පාර්ලිමේන්තු මන්ත්‍රී සිවඥානම් ශ්‍රීධරන් ඇතුළු පිරිසකගේ සහභාගීත්වයෙන් ද තිලීපන් අනුස්මරණයක් පවත්වා තිබේ.
දෙමළ ජාතික ජනතා පෙරමුණේ (TNPF) සංවිධානයෙන් මඩකලපුව ගාන්ධි උද්‍යානය අසලදී තිලීපන් අනුස්මරණයක් පැවැති අතර ඊට මාධ්‍යවේදීන් සහ සිවිල් සංවිධාන ක්‍රියාධරයන්ද එක්ව සිටි බවයි පළාත් බද වාර්තාකරුවන් පවසන්නේ.
සිවිල් සංවිධාන ක්‍රියාධරයන් පිරිසක් මන්නාරමේදී ද ත්‍යාගී තිලීපන් අනුස්මරණයක් පැවැත් වු බව පළාත් බද වාර්තාකරුවෝ වැඩි දුරටත් පවසති.
සතියකට ඉහතදී කොළඹ පැවැත්වීමට සැලසුම් කර තිබු සමරුවක් ද උසාවි නියෝගයෙන් තහනම් කිරීමට පොලිසියට හැකි විය.
Facebook Comments
