එළඹෙන ජනාධිපතිවරණයට ඉදිරිපත්වීමට නියමිත දකුණේ නායකයන් කිසිවෙක් දෙමළ ජනයාගේ අයිතීන් ගැන ප්‍රසිද්ධියේ ප්‍රකාශ කිරීමට බියක් දක්වන බව උතුරේ දේශපාලන පක්‍ෂයක් පෙන්වා දී තිබේ.
ආණ්ඩුක්‍රම ව්‍යවස්ථාවට අනුව ලබන වසරේ ජනාධිපතිවරණය පවත්වා ඉන් අනතුරුව පාර්ලිමේන්තු මැතිවරණයද 2025 මුල් කාලයේ දි පළාත් සභා මැතිවරණයද පවත්වන බව ජනාධිපති රනිල් වික්‍රමසිංහ ඉකුත් සතියේ කොළඹ පැවති එක්සත් ජාතික පක්ෂයේ විශේෂ මහා සභා සම්මේලනයකදී ප්‍රකාශයට පත් කර තිබිඋනි.
“ලබන වසරේ නොවැම්බර් මාසය වන විට ජනාධිපතිවරණය පවත්වන්න ඕනා. දැනටමත් රනිල් වික්‍රමසිංහ, සජිත් ප්‍රේමදාස, අනුර කුමාර දිසානායක ඒ සඳහා තරඟ කරන බව කියනවා. මේ අය කවුරුවත් දෙමළ ජනයාගේ ගැටළුවලට විසදුම් දෙන්න එකඟතාවකට සුදානම් නැහැ. ඒ ගැන ප්‍රසිද්ධියේ කතා කරන්නවත් සුදානම් නැහැ. අඩුම ගානේ ආණ්ඩුක්‍රම ව්‍යවස්ථාවේ තියෙන 13 වැනි සංශෝධනය සම්පුර්ණයෙන් ක්‍රියාත්මක කරන්නවත් ලැහැස්ති නැහැ,” යැයි ප්‍රජාතන්ත්‍රවාදී දෙමළ ජාතික පෙරමුණේ මාධ්‍ය ප්‍රකාශක සුරේෂ් ප්‍රේමචන්ද්‍රන් පවසයි.
සති අන්ත “වීරකේසරී“ පුවත් පතට අදහස් දක්වමින් ඔහු කියා සිටියේ ජනාධිපති රනිල් වික්‍රමසිංහ බලය බෙදාහරින බව කියමින් 13 වැනි ව්‍යවස්ථා සංශෝධනය මුළුමනින් ක්‍රියාත්මක කිරීමට සාකච්ජා වට කිහිපයක් පැවැත්වුවත්, බෞද්ධ භික්ෂුන්ගේ විරෝධය හමුවේ එය අත්හැර දමා ඇති බවයි.
“යුද ගැටුම් අවසන් වීමෙන් පස්සේ 2009 අවුරුද්දේ ඉදන් පැවති සෑම ජනාධිපතිවරණයකම දෙමළ ජනයාගේ සහාය ලබා දුන්නේ දකුණෙන් ඉදිරිපත් කරපු සිංහල අපේක්ෂකයන්ට. සරත් ෆොන්සේකා, මෛත්‍රීපාල සිරිසේන, සජිත් ප්‍රේමදාස වගේ අයට දෙමළ පක්‍ෂ වල සහාය දුන්න. මෙයින් ජය ගත්තේ මෛත්‍රිපාල සිරිසේන විතරයි. ඒත් බලයට පත් වුනාම දෙමළ ජනතාවට දුන් පොරොන්දු ක්‍රියාත්මක කළේ නැහැ. මේවගේ දිගටම සිදුවුනේ දකුණේ සිංහල නායකයෝ අපිව දිගටම රැවටීමයි,” යැයි අවධාරණය කරන ප්‍රජාතන්ත්‍රවාදී දෙමළ ජාතික පෙරමුණේ මාධ්‍ය ප්‍රකාශක සඳහන් කරන්නේ දෙමළ ජනතාව වෙනුවෙන් පොදු අපේක්ෂකයකු පත් කිරීම ගැන ඉලංගෙයි තමිල් අරසු කච්චි හා සී.වී. විග්නේශ්වරන්ගේ නායකත්වයෙන් යුත් දෙමළ ජනතා ජාතික සන්ධානය සමග දැනමත් සාකච්චා අරඹා ඇති බවයි. ඉදිරියේදී සෙසු දෙමළ දේශපාලන පක්‍ෂ සමග ද මේ ගැන කතා කරන බව ද ඔහු පවසයි.
“පොදු දෙමළ අපේක්ෂකයෙක් ඉදිරිපත් කිරීමෙන් අපිට ඔහු හෝ ඇයව ජනාධිපති පුටුවේ වාඩි කරන්න නොහැකිවෙන්න පුළුවන්. ඒත් අපි පෙන්වන්න ඕනේ දිගින් දිගටම දෙමළ ජනතාව රවට්ටන්න දකුණේ නායකයන්ට බැරි බව.”
දැනට පවතින තත්වය අනුව දකුණේ ජනාධිපති අපේක්ෂකයන් වැඩි පිරිසක් තරඟ බිමට පිවිසියහොත් පළමු හා දෙවන අදියර වලදී කිසිදු අපේක්ෂකයකු සියයට පනස් එකක් ජන්ද ලබා ගැනීමට නොහැකි වනු බවට ප්‍රජාතන්ත්‍රවාදී දෙමළ ජාතික පෙරමුණේ මාධ්‍ය ප්‍රකාශක සුරේෂ් ප්‍රේමචන්ද්‍රන් අනුමාන කරයි.
“එම නිසා එළඹෙන ජනාධිපතිවරණයේදී දෙමළ ජනතාවගේ ජන්දය තීරණාත්මකයි. පොදු දෙමළ අපේක්ෂකයෙකු ඉදිරිපත් කිරීම තුල එය තවත් තීව්ර වෙනවා.”
Facebook Comments
