ජනතා අරගල මාධ්‍ය ඔස්සේ හෙළි වීම වැලක්වීමට වැඩ කරන බවට පොලිසියට චෝදනා

පුරවැසි රාජකාරිය ඉටු කළ රට වැසියන් සැකකරුවන් ලෙස අධිකරණයට ඉදිරිපත් කිරීම ඔවුන්ගේ මූලික අයිතිවාසිකම් කඩ කිරීමක් ලෙස, ජනතා නියෝජිතයකු ද වන ජනාධිපති නීතිඥයෙක් අධිකරණය හමුවේ කරුණු දක්වා තිබේ.

ජනාධිපති නීතිඥ පාර්ලිමේන්තු මන්ත්‍රී එම්. ඒ සුමන්තිරන් නොවැම්බර් 17 වැනිදා ඒ බව අධිකරණය හමුවේ අවධාරණය කර ඇත්තේ නැගෙනහිර සංචාරය අතරතුරදී ජනාධිපතිවරයාට විරෝධතා දැක්වු දෙමළ ජනතා නියෝජිතයෙක්ද ඇතුළු තිස් දෙනකුට එරෙහිව පොලීසිය එරාවුර් සංචාරක මහේස්ත්‍රාත් අධිකරණය හමුවේ ගොනු කළ නඩුව විභාගයට ගත් අවස්ථාවේදීය.

“අද නඩුව විභාගයට ගත් අවස්ථාවේදී රජයේ, ආණ්ඩුවේ ප්‍රතිපත්තිවලට සහ ආණ්ඩුවේ ක්‍රියාමාර්ග වලට විරෝධය පළ කරනවා කියන්නේ සෑම පුරවැසියකුගේ අයිතියක් පමණක් නොවෙයි ඒක යුතුකමක් කියන එක තමයි අපේ රටේ නීතියක් විදිහට තියෙන්නේ. ඒ නිසා පුරවැසියකු ලෙස තම රාජකාරිය ඉටු කිරීම නිසා ඔවුන් අධිකරණයේ සැකකරුවන් ලෙස පොලිසිය ඉදිරිපත් කිරීම එයාලගේ මූලික අයිතිවාසිකම් කඩ කිරීමක් බවත්, අධිකරණයේ බලය අයුතු ලෙස භාවිත කිරීමට අධිකරණය නොමග යවන ක්‍රියාවක් බවත් අපි අධිකරණයට කරුණු ඉදිරිපත් කළා.”

මඩකලපුව චෙන්කලඩි මධ්‍ය මහා විද්‍යාලයේ 149 වන සංවත්සර උත්සවයට ඔක්තෝබර් 8 වැනි දින ජනාධිපති රනිල් වික්‍රමසිංහ සහභාගී වන අවස්ථාවේ දී ජනාධිපතිවරයා ගමන් ගන්නා මාර්ගය අවහිර වන පරිදි මයිලත්තමඩු මාදවනෙයි කිරි ගොවීන්, අතුරුදහන්වු පවුල් වල සාමාජිකයන්, දේශපාලනඥයන් හා එක්ව විරෝධතා දියත් කළ 30 දෙනකුට එරෙහිව පොලිසිය නඩු ගොනු කර තිබේ.

අධිකරණ නියෝගය අභිබවා යමින් විරෝධතා පැවැත්වු බවට පොලිසිය චෝදනා නගන පිරිස අතරට පාර්ලිමේන්තු මන්ත්‍රී රාසමානික්‍යම් ශානක්‍යන්, හිටපු පාර්ලිමේන්තු මන්ත්‍රීවරුන් වන පී. අරියනේන්ද්‍රන්, ජී. ශ්‍රී නේෂන්, එස්. යෝගේෂ්වරන්, දෙමළ ජාතික ජනතා පෙරමුණේ ප්‍රකාශක කනගරත්නම් සුගාෂ්, එම පක්ෂයේ සංවිධායක ටී. සුරේෂ්, මාධ්‍යවේදීන් වන පුණ්‍යමුර්ති ශෂීකරන් හා වලසිංහම් ක්‍රිෂ්ණකුමාර් මෙන්ම මයිලත්තමඩු මාදවනෙයි කිරි ගොවීන් කිහිප දෙනකුද ඇතුලත්ය.

අධිකරණ කටයුතු නිමා වීමෙන් පසුව මාධ්‍ය වෙත අදහස් දක්වමින් එම්.ඒ සුමන්තිරන් මන්ත්‍රීවරයා වැඩි දුරටත් සදහන් කළේ ජනතා විරෝධතා මාධ්‍ය මගින් හෝ රටේ ජනතාවට දැක ගන්නට නොලැබෙන වාතාවරණයක් සකස් කරමින් පොලීසිය මාධ්‍යවේදීන් ද සැකකරුවන් කර ඇති බවයි.

“ජනාධිපතිවරයාගේ පැමිණීමට විරෝධය පළ කරමින් මාර්ගය අවහිර කළ බවට 30 දෙනකුට චෝදනා එල්ල වී තිබෙනවා. ඉන් දෙදෙනෙක් මාධ්‍යවේදීන්. ඉදිරියේදී මොන අරගලයක්ව්ත්, මාධ්‍ය හරහාවත් දැක ගන්න බැරි වෙන විදිහට පොලිසීය මාධ්‍යවේදීන්ද සැකකරුවන් ලෙස ඇතුලත් කරලා තියනවා. ”

ශ්‍රී ලංකාව තුළ රාජකාරියේ යෙදෙන මාධ්‍යවේදීන්ට පළිගැනීමේ බියෙන් සහ රාජ්‍ය මර්දනයෙන් තොරව කටයුතු කිරීමට ඉඩදිය යුතු බව සදහන් කරමින් නිව්යෝර්ක් නගරය මුලස්ථාන කොට ගත් මාධ්‍යවේදීන් සුරැකීම සඳහා වන කමිටුව (CPJ) නිවේදනයක් නිකුත් කරමින් ශ්‍රී ලංකා රජයට පසුගියදා අවධාරණය කර තිබුනේ වාර්තාකරණය හේතුවෙන් පරීක්ෂණ වලට ලක්වී සිටින දෙමළ මාධ්‍යවේදීන් දෙදෙනාට එරෙහි පරීක්ෂණ වහාම නවත්වන ලෙසයි.

“පුන්‍යමුර්ති සසිකරන් සහ වලසිංහම් ක්‍රිෂ්ණකුමාර් යන මාධ්‍යවේදීන් දෙදෙනාට එරෙහිව සිදුවන සියලුම ආකාරයේ පලිගැනීම් ශ්‍රී ලංකාවේ බලධාරීන් විසින් වහාම නැවැත්විය යුතු අතර, ඔවුන්ට නිදහසේ වාර්තාකරණයේ නියැලිය හැකි තත්වයක් තහවුරු කළ යුතුය. සිය ප්‍රජාවට බලපාන මානව හිමිකම් උල්ලංඝන වාර්තාකරණයේ නියැලී සිටින දෙමළ මාධ්‍යවේදීන් ඉලක්ක කොටගෙන සිදුවන දීර්ඝකාලීන හිංසා ශ්‍රී ලංකා රජය අවසන් කළ යුතුයැ,” යි CPJ සංවිධානයේ ආසියානු කලාපයේ වැඩසටහන් සම්බන්ධීකාරක බේ ලී යි පැවසුවාය.

මාධ්‍යවේදීන් දෙදෙනකු ද ඇතුළු 30 ට එරෙහිව පොලිසිය චෝදනා ගොනු කර ඇත්තේ පදනම් විරහිත ආකාරයෙන් බවට එම්. ඒ සුමන්තිරන් නීතිඥයා නොවැම්බර් 17 වැනිදා අධිකරණය හමුවේ කරුණු දක්වද්දි, පොලිසිය සදහන් කර ඇත්තේ සිය චෝදනා සනාථ කිරීම සදහා සාක්ෂිකරුවන් ඉදිරිපත් කිරීමට දිනයක් ලබා දෙන ලෙසයි.