උතුර, නැගෙනහිර දෙපළාතේ සංඝනායක හිමිනමක් විසින් අසත්‍ය තොරතුරු ඔස්සේ මෙහෙයවනු ලැබූ පොලිසිය නැගෙනහිර පළාතේ මුස්ලිම් කාන්තාවකගේ භුමදාන කටයුතු වලට බාධා පමුණුවා තිබේ.
ප්‍රදේශිය ලේකම්වරයා විසින් පොලීසියට සත්‍ය කරුණු දැනුම් දීමෙන් පසුව ප්‍රමාද වී හෝ එම භුමදාන කටයුතු සිදු කිරීමට ප්‍රදේශවාසී මුස්ලිම් ජනයා කටයුතු කළ බවයි පළාත් බද වාර්කරුවන් පවසන්නේ.
ත්‍රිකුණාමලය දිස්ත්‍රික්කයේ කුච්චවේලි ප්‍රාදේශීය ලේකම් කොට්ඨාශයේ පුල්මෝට්ටෙයි, පොන්මලෙයිකුඩා ගම් වැසියන් මිය ගිය කාන්තාවකගේ සිරුර භුමදානය සඳහා ඔක්තෝබර් 12 වැනිදා උදය වරුවේ පොන්මලෙයිකුඩාහි පිහිටි සුසාන භුමියේ වලක් හාරමින් සිටියදී එම ස්ථානයට පැමිණි කුච්චවේලී පොලිස් නිලධාරීන් ඔවුන්ට දැනුම් දී ඇත්තේ එම භුමිය පුරා විද්‍යා දෙපාර්තමේන්තුවට අයත් බැවින් එහි සිරුර මිහිදන් නොකරන ලෙසයි.
එම භුමිය පුරා විද්‍යා දෙපාර්තමේන්තුවට අයත් බවට උතුර සහ නැගෙනහිර දෙපළාතේ සහ තමන්කඩුව දිසාවේ ප්‍රධාන සංඝනායක අරිසිමලේ ආරණ්‍ය සේනාසනාධිපති පනාමුරේ තිලකවංශ හිමියන් කළ පැමිණිල්ලක් පරිදි පැමිණි බවත් පොලිසිය එම ජනතාවට දැනුම් දී තිබේ.
පනාමුරේ තිලකවංශ හිමියෝ නැගෙනහිර පළාතේ පුරාවිද්‍යා උරුමයන් කළමනාකරණය සඳහා හිටපු ජනාධිපති ගෝඨාභය රාජපක්ෂ විසින් දේශීය හා ජාත්‍යන්තර විරෝධය මධ්‍යයේ ආරක්ෂක ලේකම් කමල් ගුණරත්නගේ නායකත්වයෙන් පත්කළ ජනාධිපති කාර්ය සාධක බලකායේ ඉදිරිපෙළ සාමාජික නමකි.
එම භුමිය මුස්ලිම් ජාතිකයන්ගේ සුසාන භුමියක් බවට පොලිස් නිලධාරීන්ට දැනුම් දෙමින් ප්‍රදේශවාසී මුස්ලිම් ජනයා පවසා තිබුනේ කුමන බාධා පැමිණියත් සියළු ගම් වැසියන් එක් වී ඉස්ලාමීය චාරිත්‍ර අනුව එම ස්ථානයේ මළ සිරුර භුමදානය කරන බවයි.
මළ සිරුර භුමදානයට පොලීසිය එල්ල කරන බාධා කිරීම් සම්බන්ධයෙන් ප්‍රදේශවාසීන් කුච්චවේලි ප්‍රාදේශිය ලේකම්වරයාට දැනුම් දී ඇති අතර එම ස්ථානයේ සිටි පොලිස් නිලධාරීන්ට දුරකතන ඇමතුමක් ලබා දෙමින් ප්‍රාදේශිය ලේකම්වරයා දැනුම් දී ඇත්තේ එම ස්ථානයේ පුරා විද්‍යා දෙපාර්තමේන්තුවට අයත් නොවන අක්කර දෙකක භුමිය ඉස්ලාම් භක්කිතයන්ගේ සුසාන භුමියක් බවයි.
මීට ඉහතදී එම සුසාන භුමියේ ඉස්ලාම් භක්තිකයන් කිහිප දෙනකුගේ සිරුරු මිහිදන් කර ඇති බවයි පළාත් බද වාර්තාකරුවන් පවසන්නේ.
ප්‍රාදේශිය ලේකම්වරයාගේ දැනුම් දීමෙන් පසුව එම සිරුර භුමදානයට ඉඩ සලසමින් පොලිසිය එම ස්ථානයෙන් පිටව ගිය බව පළාත් බද වාර්තාකරුවෝ වැඩි දුරටත් පවසති.
නැගෙනහිර පළාතේ දෙමළ හා මුස්ලිම් ජනයාගේ පාරම්පරික භුමිය බලහත්කාරයෙන් අත්පත්කරගන්නා බවට පසුගිය සමයේ දිගින් දිගටම චෝදනා එල්ල වී තිබෙන පනාමුරේ තිලකවංශ හිමියන් සම්බන්ධ ඉඩම් නඩු කිහිපයක්ම අධිකරණයේ විභාග වේ.
Facebook Comments
