රජයේ විශ්ව විද්‍යාල සිසුන්ගේ දැඩි විරෝධය එල්ලව ඇති මාලඹේ සයිටම් ආයතනයට වෛද්‍ය උපාධිය පිරිනැමීම සඳහා නීත්‍යනුකූල බලයක් තිබෙන අතර එයින් උපාධිය ලබා ගන්නා සිසුන් වෛද්‍ය සභාවේ වෘත්තිකයන් ලෙස ලියාපදිංචි කරන ලෙස අභියාචනාධිකරණය විසින් වෛද්‍ය සභාවට නියෝග කර තිබේ.
සයිටම් ආයතනයෙන් උපාධියක් ලබාගත් තමන් වෛද්‍ය වෘත්තිකයෙකු වශයෙන් ලියාපදිංචි කිරීම ශ්‍රී ලංකා වෛද්‍ය සභාව විසින් ප්‍රතික්ෂේප කරන බවට චෝදනා කරමින් එම ආයතනයේ සිසුවියක විසින් ගොනුකරනු ලැබූ පෙත්සමකට අදාළව 31 අගහරුවාදා දිනයේ අභියාචනාධිකරණය විසින් මෙම තීන්දුව ලබාදී ඇත.
සයිටම් ආයතනයේ වෛද්‍ය උපාධිය නීතියට පටහැණි බවට වගඋත්තරකාර ශ්‍රී ලංකා වෛද්‍ය සභාව විසින් විරෝධතා කිහිපයක් ගොනු කර තිබුණද එම විරෝධතා සියල්ල අධිකරණය විසින් ප්‍රතික්ෂේප කරන බව දැනුම් දුන් සභාපති විනිසුරුවරයා තීන්දුව ප්‍රකාශයට පත්කරමින් කියා සිටියේ උසස් අධ්‍යාපන අමාත්‍යවරයා විසින් නිකුත් කර ඇති ගැසට් නිවේදනයට අනුව සයිටම් ආයතනයට වෛද්‍ය උපාධිය පිරිනැමීම සඳහා නීත්‍යනුකූල බලයක් තිබෙන බවයි.
සයිටම් ආයතනයේ වෛද්‍ය උපාධිය පිළිගැනීමට ශ්‍රී ලංකා වෛද්‍ය සභාවට කිසිදු නීතිමය බාධාවක් නොමැති බව පෙන්වා දුන් අභියාචනාධිකරණය, සයිටම් ආයතනයෙන් වෛද්‍ය උපාධිය ලබාගන්නා සිසුන් ලියාපදිංචි කිරීමට පියවර ගන්නා ලෙස ද නියෝග කරන ලදී.
සිසු විරෝධය
සයිටම් ආයතනයේ වෛද්‍ය උපාධියට එරෙහි එම ආයතනය අහෝසි කරන ලෙස ඉල්ලා සටන් කල අන්තර් විශ්ව විද්‍යාල ශිෂ්‍ය සංගම් කැඳවුම්කරු ළහිරු වීරසේකර මේ වන විට රිමාන්ඩ් බන්ධනාගාර ගත කර ඇති අතර සයිටම් ආයතනයට එරෙහිව විරෝධතා පවත්වමින් මහජනයාට බාධා වන ලෙස කටයුතු කරමින් ඇප කොන්දේසි කඩකිරීම ඔහුට එරෙහිව එල්ල වී ඇති චෝදනාවයි.
මාලබේ සයිටම් පෞද්ගලික වෛද්‍ය විද්‍යාලය සම්බන්ධයෙන් පාර්ලිමේන්තුවේ “දැවැන්ත තීරණයක්” ගැනීමේ සුදානමක් පවතින මොහොතක සිදු නායකයන් එක්කෙනා බැගින් අල්ලා ගනිමින් දඟ ගෙවල් වල සිර කිරීමට ආණ්ඩුව කටයුතු කරමින් සිටින බවයි මීට පෙර විශ්ව විද්‍යාල සිසුන් චෝදනා කර සිටියේ.
සයිටම් ආයතන අහෝසි කරන ලෙස ඉල්ලා පසුගිය දින කිහිපය පුරාම රජරට විශ්වවිද්‍යාලය, පේරාදෙණිය විශ්වවිද්‍යාලය, රුහුණ විශ්වවිද්‍යාලය, කැලණිය විශ්වවිද්‍යාලය සහ ජයවර්ධනපුර විශ්වවිද්‍යාලය මෙන්ම යාපනයේ විශ්ව විද්‍යාල සිසුන්ද විරෝදතාවයන්හි නිරත විය.
අද පෙරවරුවේ කොළඹ කොටුව ශ්‍රේෂ්ඨාධිකරණය ඉදිරිපිට මාර්ගය අවට රැස්වූ සරසවි සිසුහු දහසකට ආසන්න පිරිසක් කළු පටි බැඳ, කළු කොඩි ඔසවා කළු රෙදි වලින් මුහුණු ආවරණය කරගෙන නිහඬ විරෝධතාවයක යෙදී සිටියහ.
නීතිමය වලංගු භාවයක් ලබා දීමේ සැලසුමක්
මාලබේ සයිටම් පෞද්ගලික වෛද්‍ය විද්‍යාලයට නීතිමය වලංගු භාවයක් ලබා දෙමින් දේශීය අධ්‍යාපනය පුද්ගලීකරණය දිසාවට තවත් පියවරක් තබන බවට ශිෂ්‍ය සංගම් විසින් රජයට දිගින් දිගටම චෝදනා කළේය.
රජය විසින් සකස් කරන ලද අනුකමිටු වාර්තාවකින් මාලබේ වෛද්‍ය විද්‍යාලය පවත්වාගෙන යාම යුක්ති සහගත කිරීමේ සැලැස්මක් ඇතැයි හෙළි කල සිසු සංගම් සයිටම් ආයතනය අනුමත කරන ආචාර්ය ආශු මාරසිංහ සහ චතුර සංදීප සේනාරත්න මන්ත්‍රීවරයා විසින් සකස් කරන ලද වාර්තාව පිළිගත නොහැකි බව අවධාරණය කර සිටියේය.
මේ අතර රජයේ වෛද්‍ය නිලධාරීන්ගේ සංගමය ජනාධිපතිවරයා වෙත ලිපියක් යොමු කරමින් මාලබේ පෞද්ගලික වෛද්‍ය විද්‍යාලය සම්බන්ධයෙන් අවධානය යොමුකර යුක්ති සහගත ක්‍රියාමාර්ගයක් ගන්නා ලෙස ඉල්ලා ඇත.
අභියාචනාධිකරණ විනිසුරුවරුන් වන විජිත් මළල්ගොඩ සහ එස්.තුරෙයිරාජා මෙම තීන්දුව ලබා දෙනු ලැබුවේ සයිටම් ආයතනයෙන් උපාධිය ලැබූ මල්ෂානි සුරවීරආරච්චි සහ දිලුම් සූරියආරච්චි යන සිසුන් දෙදෙනා විසින් වෛද්‍ය සභාව, උසස් අධ්‍යාපන ඇමැති, උසස් අධ්‍යාපන අමාත්‍යංශ ලේකම් ඇතුළු පිරිසක් වගඋත්තරකරුවන් කරමින් පෙත්සම ගොනු කරනු ලැබු පෙත්සමකටය.
Facebook Comments
