ඔස්ට්‍රේලියාවේ ඩීකින් විශ්ව විද්‍යාලය (Deakin University) විසින් අගමැතිවරයා වෙත ලබා දෙන ලද ගෞරව ආචාර්ය උපාධිය කිසි විටෙකත් භාවිතයට නොගන්නා ලෙස අගමැති රනිල් වික්‍රමසිංහ සිය ලේකම්වරයාට උපදෙස් ලබා දී ඇති බව සිලෝන් ජර්නල්ස් වෙත වාර්තා වේ.
උපාධි උත්සවයෙන් අනතුරුව අග්‍රාමාත්‍ය ලේකම් සමන් ඒකනායක කැඳවූ අගමැතිවරයා මේ ගෞරව උපාධි නාමය කිසි විටෙක තමාගේ රාජකාරි හෝ පුද්ගලික කාර්යයන් සඳහා භාවිත නොකරන ලෙසට උපදෙස් දී ඇත.
‘ආචාර්ය’ යනුවෙන් නමට මුලින් යොදා ගැනීමේ වරප්‍රසාදය හිමි වන්නේ එම උපාධිය අධ්‍යාපනයෙන් උපයා ගත් අයකුට පමණක්’යැයි අගමැතිවරයා තමා සමග කියා සිටි බව ඔහු සමග ඔස්ට්‍රේලියාවට ගොස් සිටින ආචාර්ය හර්ෂ ද සිල්වා ෆේස් බුක් සටහනක් තබමින් පවසා තිබුණී.
අගමැතිවරයාට ආචාර්ය උපාධියක් පිරිනමා ඇත්තේ පාර්ලිමේන්තු මන්ත්‍රීවරයෙකු, ඇමතිවරයකු හා අගමැතිවරයකු වශයෙන් සිදු කළ දීර්ඝ කාලීන සේවාව සහ ආර්ථික, අධ්‍යාපන හා මානව හිමිකම් ක්ෂේත්‍රයන් ඉහළට ඔසවා තැබීමට සිදු කළ මෙහෙවර අගයමින් බව අග්‍රාමාත්‍ය කාර්යාලය නිවේදනයක් නිකුත් කරමින් පවසයි.
කොටි සංවිධානය සාකච්ඡා මේසයට කැඳවා ගැනීමට උපායශිලී වීම, ශ්‍රී ලංකාවේ නාමය අන්තර් ජාතික වශයෙන් ඔසවා තැබීම, ජාත්‍යන්තර ප්‍රජාව වෙතින් මුල්‍ය සහය ලබා ගැනීමට පදනම සැකසීම සහ යහ පාලනය ස්ථාපිත කරලීමට කැපවීම ආදී කරුණු ගණනාවක් ද අගමැති රනිල් වික්‍රමසිංහට සම්මාන ආචාර්ය උපාධිය පිරිනැමීමේ දී සැලකිල්ලට ගන්නා ලදැයි ඔස්ට්‍රේලියාවේ ඩීකින් (Deakin University) විශ්ව විද්‍යාලයේ උපකුලපතිනි මහාචාරිණී ජේන් ඩෙන් හොලැන්ඩර් උපාධි ප්‍රදානෝත්සවයේදී හේතුපාඨ වශයෙන් දක්වන ලද බව අග්‍රාමාත්‍ය කාර්යාලය 14 අඟහරුවාදා නිකුත් කළ නිවේදනයේ දැක්වේ.
Facebook Comments
