බිතුසිතුවම් ඡායාරූප ගත කර සංරක්ෂණය කිරීමට පියවර

0

ශ්‍රී ලංකාවේ ඇති අග්‍රගණ්‍ය බිතුසිතුවම් නූතන තාක්ෂණයට අනුව ඡායාරුප මගින් වාර්තා ගත කොට සංරක්ෂණය කිරීමේ වැඩපිළිවෙළක් පුරාවිද්‍යා දෙපාර්තමේන්තුව විසින් ආරම්භ කොට තිබෙන බව අධ්‍යාපන අමාත්‍යාංශය සඳහන් කරයි.

පසුගිය කාලයේ බිතුසිතුවම් විනාශ වී යාමේ සිදුවීම් රැසක් වාර්තා වීමත් සමඟ එම සිතුවම් ස්ථානීය සංරක්ෂණයටත් ඊට අමතරව මෙලෙස ඡායාරූප ගත කොට සංරක්ෂණය කිරීමටත් අවශ්‍ය පියවර ගන්නා ලෙස අධ්‍යාපන අමාත්‍ය අකිල විරාජ් කාරියවසම් උපදෙස් ලබා දී ඇති බවයි එම අමාත්‍යංශය පවසන්නේ.

පුරාවිද්‍යා අධ්‍යක්ෂ ජනරාල් මහාචාර්ය සෙනරත් දිසානායක උපදේශකත්වය සහ අධීක්ෂණය යටතේ මෙම ව්‍යාපෘතිය ක්‍රියාවට නැංවෙන අතර ලංකාවේ විවිධ අවධීන්ට අයත් විශිෂ්ටතම බිතුසිතුවම් රැසක් මෙම ව්‍යාපෘතිය යටතේ ඡායාරූප මගින් වාර්තා ගත කිරීමට නියමිතව ඇත.

සීගිරිය, පොලොන්නරුව ප්‍රතිමා ගෘහය, මහනුවර දෙගල්දොරුව විහාරය සහ කැළණිය රජමහා විහාරයේ ඇති සිතුවම් මේ වන විටත් වාර්තාගත කිරීමට පියවර ගෙන ඇති අතර සීගිරි චිත්‍ර ඇසුරින් සිදුකළ මෙම ඡායාරූප වාර්තා කරන කටයුත්තේ දී ලබාගත් ක්ෂුද්‍ර ඡායාරූපයක් තුළ පියවි ඇසට නොපෙනෙන මිලිමීටර් 1/10 ක් තරම් වූ ලෝහ පතුරක් සහ නූල් කැබැල්ලක් සිතුවම් පෘෂ්ඨයෙන් හඳුනා ගැනීමට හැකි වී තිබේ.

සිතුවම් ඡායාරූප ගත කිරීමේ වැඩසටහන යටතේ ලබාගන්නා ඡායාරූප ඇතුළත් දුර්ලභ ගණයේ සිතුවම් සහිත ඡායාරූප එකතුවක් ග්‍රන්ථ මාලාවක් වශයෙන් මුද්‍රණය කිරීටම ද සැලසුම් කර ඇති බවයි අධ්‍යාපන අමාත්‍යංශය වැඩිදුරටත් පවසන්නේ.

Facebook Comments

wedding people