මහා ගංවතුරින් අහිමි වු ජිවිත ගණන තවත් ඉහළට: නරඹන්න ආ අයත් මරුට

දිවයිනට බලපා ඇති මහා ගංවතුර සහ නායයාම් තත්ත්වය හේතුවෙන් මියගිය සංඛ්‍යාව 180 දක්වා ඉහළ ගොස් ඇති බව ආපදා කළමනාකරණ මධ්‍යස්ථානය නිවේදනය කරයි.

අයහපත් කාළගුණයෙන් පුද්ගලයින් 110 දෙනෙකු අතුරුදන්ව පුද්ගලයින් 109 දෙනෙකු තුවාල ලබා ඇති බව එම මධ්‍යස්ථානය අද සවස නිකුත් කල වාර්තාවේ සඳහන්.

මේ වන විට වර්ෂාපතනයත් සමග ඇති වූ ජල ගැලීම් සහ නායයාම් හේතුවෙන් පවුල් 153,303 ට අයත් පුද්ගලයින් 588,082 දෙනෙකු පීඩාවට පත්ව ඇති බවයි ආපදා කළමනාකරණ මධ්‍යස්ථානය වැඩිදුරටත් පවසන්නේ.

ගංවතුර බලන්න ආ පුද්ගලයින් මරුට

ගංවතුර සහ නායයාම් ඇතුලූ ආපදාවන් සහිත ප‍්‍රදේශ නැරඹීම සදහා පැමිණි පිටස්තර පුද්ගලයින් 06 දෙනෙකු ගතවු දින කිහිපය තුළ මියගොස් තවත් 16 දෙනකු තුවාල ලබා ඇති බව පොලිසිය පවසයි.

මෙම පිරිස ඇඳවැටීමෙන් , ගංවතුරේ ගසාගෙන යාමෙන් සහ දියේ ගිලීමෙන්, ආදි විවිධ අනතුරුවලින් මියගොස් ඇති බවට වාර්තා වී ඇති බවයි පොලිස් මාධ්‍ය ප‍්‍රකාශක ජ්‍යෙෂ්ඨ පොලිස් අධිකාරි ප්‍රියන්ත ජයකොඩි කියා සිටියේ.

ආපදවට ලක් වු ප්‍රදේශයන්ට නොපැමිණෙන ලෙසට පොලිසිය මාධ්‍ය හරහා ජනතාව දැනුවත් කර තිබියදී එම අවවාද පිළිනොගැනීම නිසා මෙම පිරිස අනතුරුවලට ලක්ව ඇතැයි පොලිස් මාධ්‍ය ප‍්‍රකාශකවරයා වැඩිදුරටත් පැවසුහ.