කළු සල්ලි සුදු කිරීම වැළැක්වීම, ත්‍රස්තවාදයට මුදල් සැපැයීම නැවැත්වීම ඇතුළු සියලු ආකාරයේ දූෂණයන්ගෙන් තොර රටක් බිහි කිරීම යහපාලන රජයේ අරමුණ යැයි මුදල් හා ජනමාධ්‍ය ඇමැතිවරයා පවසයි.
මුදල් විශුද්ධිකරණය පිළිබඳ ආසියා ශාන්තිකර කලාපීය කණ්ඩායමේ විසිවන වාර්ෂික සමුළුව 17 සඳුදා කොළඹ හිල්ටන් හෝටලයේදී ආරම්භ කළ අවස්ථාවට ප්‍රධාන ආරාධිතයා ලෙස එක්වෙමින් අමාත්‍ය මංගල සමරවීර ෙම් බව පැවසීය.
වංචාව, දූෂණය ඉහවහා ගිය අභියෝගාත්මක කාල පරිච්ඡේදයක් පසුකර ආ බව කී ඇමතිවරයා මෙරටින් සියලු ආකාරයේ දූෂණයන් බැහැර කිරීම දක්වා වූ අභීත ගමනක් යා යුතුම යැයි අවධාරණය කළේය.
ජනාධිපති මෛත්‍රීපාල සිරිසේන සහ අගමැති රනිල් වික්‍රමසිංහ එක්ව ඉදිරියට ගෙන යන සම්මුතිවාදී ජාතික රජය බලයට පැමිණීමෙන් රටේ දූෂණයට, වංචාවට තිත තැබීම සිදු කළා බව මෙන්ම ඉතා අභියෝගාත්මක යුගයක් පසු කර පැමිණි බවයි ඇමතිවරයා කියා සිටියේ.
“අපට දැන් කළු සල්ලි සුදු කිරීම වැළැක්වීම, අවි ආයුධ ගනුදෙනු හා ත්‍රස්තවාදයට මුදල් ලැබීම්ම වැළැක්වීම හා මත්ද්‍රව්‍ය ජාවාරම්වලින් මුදල් ඉපැයීම් වැළැක්වීමට අදාළව කටයුතු කළ යුතුව තිබෙනවා.” යි ඇමති මංගල පවසයි.
“සියලු ආකාරයේ දූෂණ වලින් තොර බිමක් බවට පත් කරන තුරු මේ ගමන් මගේ අප ගමන් කළ යුතුයි. ඒ සඳහා ජාත්‍යන්තර ප්‍රජාවගේ සහයෝගය උදව්ව අපට රටක් ලෙස ලැබිය යුතුමයි. ඔබේ උදව් මත අපට වඩාත් යුක්තිගරුක, විනයගරුක රටක් බිහි කර ගන්නට හැකි වෙනවා.” යැයි ඇමතිවරයා අවධාරණය කළේය.
ශ්‍රී ලංකාව මේ කණ්ඩායම් සමුවවේ සම සභාපති ධුරයට පත්වීම පිළිබඳව විශාල සතුටක් තිබෙන බව සහ මේ සියලු ශක්තීන් යොදා වඩාත් යුක්තිගරුක, විනයගරුක දියුණු රටක් බිහි කිරීමට කටයුතු කරන්න අවශ්‍ය බව මුදල් හා ජනමාධ්‍ය ඇමැති මංගල සමරවීර වැඩි දුරටත් පෙන්වා දුනි.
Facebook Comments
