පාර්ලිමේන්තුවේ ආණ්ඩුක්‍රම ව්‍යවස්ථා සම්පාදක මණ්ඩලයෙන් ජාතික නිදහස් පෙරමුණේ මන්ත්‍රී කණ්ඩායම නිල වශයෙන් ඉවත් වී ඇත.
ජාතික නිදහස් පෙරමුණේ මන්ත්‍රීවරුන් පස්දෙනා ආණ්ඩුක්‍රම ව්‍යවස්ථා සම්පාදක මණ්ඩලයෙන් ඉවත්වීමට අවශ්‍ය බවට මීට පෙර කථානායකවරයාගෙන් ඉල්ලා තිබුණු අතර ඒ සඳහා අවසර ලැබීමත් සමඟ 19 බදාදා ඔවුන් ඉවත් වී තිබේ.
තමන්ගේ ඉවත් වීමේ තීරණය පිළිබඳ සකස් කළ පිටු තුනකින් සමන්විත නිල ලිපිය කථානායක කරු ජයසූරිය වෙත අද බාර දී ඇත.
ඒකාබද්ධය නොයයි
කෙසේ වෙතත් ව්‍යවස්ථා සම්පාදක මණ්ඩලයෙන් ඉවත්වීම සම්බන්ධයෙන් ඒකාබද්ධ විපක්ෂය මෙතෙක් තීරණයක් ගෙන නොමැති බව පර්ලිමේන්තු මන්ත්‍රී දිනේෂ් ගුණවර්ධන පවසයි.
ඒ පිළිබඳව මේ වන විටත් ඒකාබද්ධ විපක්ෂයේ පක්ෂ, සාකච්ඡා පවත්වමින් සිටින බවයි මන්ත්‍රීවරයා සඳහන් කරන්නේ.
කෙසේ වෙතත් තවමත් ඒකාබද්ධ විපක්ෂය ආණ්ඩුක්‍රම ව්‍යවස්ථා සම්පාදක මණ්ඩලයේ සහ මෙහෙයුම් කමිටුවේ කටයුතු කරන බව දිනේෂ් ගුණවර්ධන මන්ත්‍රීවරයා කියා සිටියි.
මන්ත්‍රීධුරයෙන් ඉවත්විය යුතුයි
මේ අතර කිසිදු මන්ත්‍රීවරයෙකු ආණඩුක්‍රම ව්‍යවස්ථා සම්පාදක මණ්ඩලයෙන් ඉවත්වීමට නොහැකි බව නියෝජ්‍ය අමාත්‍ය අජිත් පී පෙරේරා පවසයි.
එසේ ඉවත්වන්නේ නම් එම මන්ත්‍රීවරයා මන්ත්‍රීධුරයෙන් ඉවත්විය යුතු බව නියෝජ්‍ය අමාත්‍යවරයා වැඩි දුරටත් පෙන්වා දෙයි.
Facebook Comments
