අවම පිරිවැයක් සහිත විදුලි ජනන සැලසුම ශ්‍රී ලංකා මහජන උපයෝගිතා කොමිසමෙන්

ඉහල යන විදුලි ඉල්ලුම සපුරාලීම සදහා ලංකා විදුලිබල මණ්ඩලය සකස් කර අනුමැතිය සදහා ඉදිරිපත් කර තිබු සැළැසුම් වලින් අවම පිරිවැයක් සහිත සැළැස්ම ලෙස ශ්‍රී ලංකා මහජන උපයෝගිතා කොමිෂන් සභාව ඉදිරිපත් කල සැලැස්මට අනුමැතිය ලබා දී ඇති බව එම කොමිෂන් සභාව පවසයි.

එම සැලසුමට අනුව මෙගා වොට් 4800 කින් යුත් ස්වභාවික වායු බලාගාර, මෙගා වොට් 457ක ධාරිතාවයකින් යුත් ජල බලාගාර, මෙගා වොට් 1389ක ධාරිතාවයක් සහිත සුර්යතාප බලාගාර, මෙගාවොට් 1205 ක ධාරිතාවයක් සහිත සුළං බලාගාර, මෙගාවොට් 85ක ජෛව ස්කන්ධ බලාගාර, මෙගාවොට් 330 ක ධාරිතාවයකින් යුත් දැවිතෙල් බලාගාර සහ මෙගාවොට් 105ක ධාරිතාවයකින් යුත් ගෑස් ටර්බයින් බලාගාර ජාතික පද්ධතියට එක් කිරීමට නියමිත ය.

මෙම සැලසුම හරහා ඉදිරි වසර 20 තුලදී වත්මන් විදුලිබල ධාරිතාවයට තවත් මෙගාවොට් 8371ක් එක් වීමට නියමිත බවයි ශ්‍රී ලංකා මහජන උපයෝගිතා කොමිෂන් සභාව පෙන්වා දෙන්නේ.

ඉදිරි 20 වසරක කාලය තුල වාර්ෂිකව විදුලිබල ඉල්ලුම සියයට 5කින් පමණ ඉහළ යනු ඇතැයි ඇස්තමේන්තු කර ඇති අතර එසේ ඉහල යන විදුලිබල ඉල්ලුම සපුරාලීමට අවශ්‍ය විදුලි ජනන ධාරිතාවය ගොඩනැගීමට මෙම සැළැසුම මගින් හැකියාව ලැබෙනු ඇති බව විශ්වාස කෙරේ.