වාග් සංග්‍රාම මැද ඇමරිකානු හමුදාපති දකුණු කොරියාවට

උතුරු කොරියාවෙන් එල්ල වන න්‍යෂ්ටික සහ මිසයිල තර්ජනය පිළිබඳව සාකච්ඡා කිරීම සඳහා එක්සත් ජනපද හමුදාපති ජෙනරාල් ජෝසෆ් ඩන්ෆොර්ඩ් දකුණු කොරියාවට ගොස් තිබේ.

දකුණු කොරියානු ජනාධිපතිවරයා සහ එරට ආරක්ෂක ඇමතිවරයා හමුවී දෙරට අතර පවතින ඒකාබද්ධ ආරක්ෂක වැඩපිළිවෙල සාකච්ඡා කිරිමට නියමිතය.

එම සාකච්ඡාවලින් අනතුරුව ඇමරිකානු හමුදාපතිවරයා චීනය සහ ජපානය බලා පිටත්ව යන බව විදෙස් මාධ්‍ය වාර්තා කරයි.

එක්සත් ජනපද හමුදාපතිවරයා දකුණු කොරියාවට පැමිණියේ උතුරු කොරියාව සහ ජනාධිපති ට්‍රම්ප් අතර වාග් සංග්‍රාමයක් ඇතිවී තිබෙන අතරතුර වීම විශේෂයකි.

එහි දිගුවක් ලෙස උතුරු කොරියාව අනතුරු ඇඟවීමක් කරමින් කියා සිටියේ ඇමරිකානු හමුදා රඳවා ඇති ගුවාම් දූපත දෙසට මිසයිල ප්‍රහාරයක් එල්ල කිරීමට සැලසුමක් ඇති බවය.

නමුත් උතුරු කොරියාවේ එකම බලවත් මිත්‍ර රාජ්‍යය වන චීනය, දෙපාර්ශවයෙන්ම සංවරය සහ හික්මීම ඉල්ලා සිටී.