සයිටම් ආයතනයට පුහුණුව සදහා වෛද්‍ය සිසුන් ඇතුළත් කර ගැනීම මාස 6ක කාලසීමාවක් සඳහා අත්හිටුවන ලෙස සයිටම් පරිපාලනයට යෝජනා කිරීමට තීරණය කළ බව උසස් අධ්‍යාපන අමාත්‍යාංශය පවසයි.
අමාත්‍ය ලක්ෂ්මන් කිරිඇල්ල, රාජ්‍ය අමාත්‍ය මොහාන් ලාල් ග්‍රේරූ, අමාත්‍යාංශ ලේකම් ඩි.සි.දිසානායක, විශ්ව විද්‍යාල ප්‍රතිපාදන කොමිෂන් සභාවේ සභාපති මහාචාර්ය පී.එස්.එම්.ගුණරත්න සහ සමස්ත වෛද්‍ය පීඨ අටෙහිම පීඨාධිපතිවරුන් ඇතුළු නිලධාරීන් පිරිසක් ඊයේ(13) අමාත්‍යාංශයේ දී සයිටම් ආයතනය සම්බන්ධව සාකච්ඡාවක නිරත වී තිබේ.
එහිදී මාලබේ පෞද්ගලික වෛද්‍ය විද්‍යාලය සම්බන්ධයෙන් යෝජනා කිහිපයකට එකඟතාව පළ වු බවයි උසස් අධ්‍යාපන අමාත්‍යාංශය සඳහන් කළේය.
ඒ අනුව අවසන් එම්.බි.බි.එස්.විභාගය සමත් සහ සයිටම් ශිෂ්‍යයන්, ශල්‍ය වෛද්‍ය විද්‍යාව, වෛද්‍ය විද්‍යාව, නාරිවේදය, ප්‍රසව විද්‍යාව සහ ළමා වෛද්‍යවේදය පිළිබද එක් එක් ක්ෂේත්‍රය සඳහා මාසයක් බැගින් රජයේ රෝහලක වැඩිදුර සායනික පුහුණුවක් ලබාගත යුතු බව ද යෝජනා කිරීමට තීරණය කර තිබේ.
මාසය හයක කාලයක් තුලදී ආයතනය විධිමත් ලෙස ප්‍රමිතියකට ලක් කිරීමටද වෛද්‍ය උපාධිය සමත් වන සිසුන් රජයේ වෛද්‍ය සභාව විසින් පවත්වන විභාගයකට වාඩි කරවීමටද එහිදි එකගතාවයට පැමිණ ඇති අතර මෙම යෝජනා සදහා සයිටම් ආයතනයද සිය එකගතාව පල කර ඇති බවයි වාර්තා වන්නේ.
Facebook Comments
