සාමසාධක මෙහෙයුම් සඳහා පිටව ගිය ශ්‍රී ලංකා යුද හමුදා බලකායකට අණදීම සඳහා මැදපෙරදිග යාමට සැරසී සිටි ශ්‍රී ලංකාවේ යුද හමුදා සෙන්පතියාගේ ගමන එක්සත් ජාතීන් විසින් නවත්වා දමද්දි යුද හමුදාපතිවරයාගේ නියෝග මත බ්‍රිතාන්‍යයේ ශ්‍රී ලංකා මහ කොමසාරිස් කාර්යාලයේ ආරක්ෂක උපදේශක බ්‍රිගේඩියර්වරයා දිවයිනට කැඳවා තිබේ.
ශ්‍රී ලංකාවේ හැත්තෑ වන නිදහස් දිනය දා බ්‍රිතාන්‍යයේ ශ්‍රී ලංකා මහ කොමසාරිස් කාර්යාලය ඉදිරිපිට විරෝධතවක් පැවැත්වු දෙමළ උද්ඝෝෂකයන්ගේ “ගෙල සිඳින” බවට සංඥා කල බ්‍රිගේඩියර් ආඬිගේ ප්‍රියංක ඉඳුනිල් ප්‍රනාන්දු යුද හමුදාපති මහේෂ් සේනානායකගේ නියෝග මත දිවයිනට කැඳවු බව හමුදා මාධ්‍ය ප්‍රකාශකවරයා කියා සිටියේය.
බ්‍රිගේඩියර්වරයා සම්බන්ධයෙන් විනය පරික්ෂණයක් හෝ වෙන යම් කිසිඳු පරික්ෂණයක් සිදු නොවන බව සහතික කල හමුදා මාධ්‍ය ප්‍රකාශක බ්‍රිගේඩියර් සුමිත් අතපත්තු “ඒ ප්‍රශ්නය එතනදි ඉවර වුනා. අපි ඒ ප්‍රශ්නය ඉවර කෙරුවට මේ ප්‍රශ්නය නැවත නැවත මතු වෙන දෙයක් වුනා.ඒ නිසා ඒ ගැන විග්‍රහ කිරීමට, කතා කිරිමට හමුදාපති තුමා විසින් ඔහුව ගෙන්නවා” යැයි පැවසීය.
දෙමළ උද්ඝෝෂකයන් හ‍ට බ්‍රිගේඩියර්වරයා විසින් “ගෙල සිඳින” බවට මරණීය තර්ජනය කිරිම “හානිදායක දෙයක් නොවන” බව ශ්‍රී ලංකා යුද හමුදාවේ අදහස බවට කැබිනට් තීරණ දැනුම් දීමේ මාධ්‍ය හමුවට එක්වෙමින් කී හමුදා මාධ්‍ය ප්‍රකාශකවරයා යුද හමුදාව ඔහු වෙනුවෙන් පෙනි සිටි බව ද අවධාරණය කළේය.
“අපේ නායකයා ප්‍රභාකරන් අපේ රට ඊලම් කියල තමා එතන තිබුණේ ඇත්ත වශයෙන්ම කලබලකාරි තත්ත්වයක්. එයා යම්කිසි විදියකට ඒ ජනතාවට කොමිනිකේට් කෙරුවා. එක කොටසක් කියනවා ඒක හරි කියලා තව කොටසක් කියනවා ඒක වැරදි කියලා. අපේ තිරණේ එයා එච්චර හාම්ෆුල් (හානිදායක) දෙයක් කෙරුවෙ නැහැ. අපි එයා වෙනුවෙන් පෙනි හිටියා”
සාම සාධක ගමන නවතී
මේ අතර ලෙබනනයේ 12 වැනි සාම සාධක ආරක්ෂක කණ්ඩායමේ අණදෙන නිලධාරියා ලෙස ලුතිනන් කර්නල් රත්නප්පුලි වසන්ත කුමාර හේවගේ යැවීම එක්සත් ජාතීන් විසින් අත් හිටුවා ඇත්තේ ඔහු නිසි පූර්ව පරීක්ෂාවකට ලක් නොකරන ලද බවට දෝෂ දර්ශනයට ලක්වීමෙන් අනතුරුවයි.
යුද අපරාධ චෝදනා ලබන ප්‍රහාර දියත් කළ බලසේනා වල ක්‍රියාන්විත රාජකාරියේ යෙදී සිටි ලුතිනන් කර්නල් වසන්ත හේවගේ එක්සත් ජාතීන්ගේ රාජකාරියේ යෙදැවීම නුසුදුසු බවට මානව හිමිකම් සංව්ධාන සහ ඩයස්පෝරා සංවිධාන විසින් සාමසාධක මෙහෙයුම් ප්‍රධානී ජෝන් පියේ ලක්රුවා වෙත දැනුම් දී තිබුණි.
ලුතිනන් කර්නල් රත්නප්පුලි වසන්ත කුමාර හේවගේ සම්බන්ධයෙන් නැවති විමර්ශනයක් පැවැත්වෙන බව මෙන්ම විමර්ශනය අවසානයේ මේ නිලධාරියා සේවයේ යෙදවීම සම්බන්ධයෙන් තීරණයක් ගනු ඇතැයි එක්සත් ජාතීන්ගේ මහලේකම් වරයාගේ ප්‍රකාශක ෆර්හාන් හක් ගවේශනාත්මක මාධ්‍යවේදී මැතිව් රසල් ලී විසින් ප්‍රශ්න කරනු ලැබීමෙන් අනතුරුව 19 සඳුදා නිව්යෝර්ක් නුවරදී පවසා සිටියේය.
Facebook Comments
