හිටපු ජනපතිනි චන්ද්‍රිකා බණ්ඩාරනායක කුමාරතුංග දෙවනි වර ජනාධිපතිවරණයට ඉදිරිපත් වු අවස්ථාවේ “රනිල්ට බෑ” යනුවෙන් පෝස්ටර් ප්‍රහාරයක් එල්ල කරන ලද්දේ රනිල් වික්‍රමසිංහගෙන් එල්ල වු අභියෝගය නිසා බවට එවක එම ප්‍රචාරණය සංවිධානය කල මංගල සමරවීර ඇමැතිවරයා පවසයි.
“චන්ද්‍රිකා ජනාධිපතිනිය දෙවැනි වරට ජනාධිපති ධුරය වෙනුවෙන් තරඟ කරන කාලෙ මමයි රනිල්ට බෑ කියල පෝස්ටර් ගැහුවෙ ගමක් ගමක් ගානෙ. ඒ මොකද අපි දැක්ක රනිල්ට ඇත්තට ම පුළුවන්, අපට සිටින ලොකුම අභියෝගය එයා කියල. ඇත්තට ම එහෙම අභියෝගයක් නැත්තං ඇයි අපි බෑ කිය කිය පෝස්ටර් ගහන්නෙ. ” යි මුදල් හා ජනමාධ්‍ය අමාත්‍යවරයා මාතර දිස්ත්‍රික් එක්සත් ජාතික පක්ෂ පළාත් පාලන නියෝජිතයන් වෙනුවෙන් පැවැති වැඩසටහනක දී කියා සිටියේය.
අගමැති රනිල් වික්‍රමසිංහගෙන් අභියෝගයක් එල්ල නොවුනේ නම් එසේ පෝස්ටර් ප්‍රහාරයක් දියත් කිරිමට අනවශ්‍යව තිබු බව පෙන්වා දුන් අමාත්‍යවරයා අදත් උදා වී ඇත්තේ එවැනි තත්ත්වයක් බව ද ප්‍රකාශ කළේය.
මීළග ජනාධිපතිවරණට සුදුසුම අපේක්ෂකයා අගමැති රනිල් වික්‍රමසිංහ බව කී මංගල සමරවීර අමාත්‍යවරයා ගැලරිය පිනවන්නෙ නැතුව රට ගමන් කළ යුතු සැබෑ දිශාව දන්නා නායකයා ඔහු බවයි අවධාරණය කරන්නේ.
අසුව දශකයේ දී සිරිමාවෝ බණ්ඩාරනායගේ නායකත්වයට විරුද්ධව අනුර බණ්ඩාරනායක ගෙන යන වැඩපිලිවෙල හමුවේදී ඇය නායකත්වය හැර නොගිය බව සිහිකර දුන් ඇමැති මංගල සමරවීර “මැතිණිය නායකත්වය දාල ගියෙ නැත්තෙ ඒකට තියෙන ලෝබකම නිසා නෙවෙයි, හරි නායකත්වයක් නොමැතිව නායකත්වය හැර යාමෙන් පක්ෂය අරාජික වෙන්න පුළුවන් අවදානම තේරුම් අරගෙන” බවට වැඩි දුරටත් කියා සිටියේය.
Facebook Comments
