මහින්ද රාජපක්ෂ ජනාධිපති ධුරය දරන සමයේදී විදෙස් රට වලට පත් කරන ලද තනාපතිවරුන් දේශපාලන ඥාතී සංග්‍රහයන්ට යටත් වු බවට ජනතා විමුක්ති පෙරමුණේ නායකයා චෝදනා කරයි.
විධායක ජනාධිපතිවරයාට තානාපතිවරුන් පත් කිරිමේ ඇති අධිකාරි බලය උපයෝගි කර ගනිමින් හිටපු ජනාධිපතිවරයා මෙම කටයුතු සිදු කරන ලද බවට 26 සෙනසුරාදා “ශිෂ්ටත්වය වෙනුවෙන් සම්මත කළ යුතු 20” තේමාව යටතේ ගම්පහ පැවති ජන හමුවක දී අනුර කුමාර දිසානායක මන්ත්‍රීවරයා කියා සිටියේය.
“මහින්ද රාජපක්ෂ මහත්තයගේ එක ඥාති සොහොයුරෙක් තමයි ඇමරිකාවේ තානාපති හිටියෙ ජාලිය වික්‍රමසිංහ. ඇමරිකාවේ ශ්‍රී ලංකා තානාපති කාර්යාලයට තිබුණ ගේ හොරෙන් විකුණුවේ ජාලිය වික්‍රමසිංහ. දැන් නඩුව යනවා මෑන් හොයා ගන්න නැහැ පැනලා. තව එක්කෙනෙක් තමයි රුසියාවේ හිටපු තානාපති. සාමාන්‍යයෙන් අපේ රටේ තානාපති සේවයේ තිබ්බ නිර්දේශයක් ඹ්නෑම රටක යම් කෙනෙකුට තානාපති ධුරය දැරිය හැක්කේ අවුරුදු තුනයි කියල. හැබැයි අපි දන්නවා මහින්ද මහත්තයගේ මුලු ධුර කාලයේම රුසියාවේ තානාපති තමයි උදයංග වීරතුංග.”යැයි මන්ත්‍රීවරයා ප්‍රකාශ කළේය.
විධායක ජනාධිපතිවරයා හට විදෙස් දූත මණ්ඩල පත් කිරිමේ අධිකාරි බලය තිබිම හේතුවෙන් එම සේවාව දේශපාලනී කරණයට හා ඥාතී සංග්‍රහයන්ට යටත් වු බව පෙන්වා දෙන ජවිපෙ නායකයා එම නිසාවෙන් විදෙස් රටවල් සමඟ පැවති රාජ තාන්ත්‍රික බැඳීම් ගණුදෙනු දක්වා පරිවර්තනය වු බවටයි චෝදනා කරන්නේ.
කෙසේ වෙතත් විධායක ජනාධිපතිවරයාට විදෙස් දූත මණ්ඩල පත් කිරිමට ඇති අධිකාරි බලය 20 වන ව්‍යවස්ථා සංශෝධනය හරහා කැබිනට් මණ්ඩලයට පැවරීමට යෝජනා කර ඇති බව ජනතා විමුක්ති පෙරමුණේ නායකයා අනුර කුමාර දිසානායක වැඩි දුරටත් කියා සිටියේය.
Facebook Comments
