ශ්‍රී ලංකා වෛද්‍ය සභා පනත සංශෝධනය කිරීමේ කාලීන අවශ්‍යතාව ඉටුකර ගැනීමට නොහැකි වීම තමන් ධුරයෙන් ඉවත් වු බව එහි සභාපතිවරයා පවසයි.
ඒ සඳහා පෞද්ගලික හෝ දේශපාලන හෝ හේතු නොතිබු බවයි හාචාර්ය කොල්වින් ගුණරත්න 03 සිකරාදා මාධ්‍ය හමුවක් පවත්වමින් කියා සිටියේ.
“ශ්‍රී ලංකා වෛද්‍ය සභා පනත අවුරුදු අසූවකට වඩා පැරැණියි. මෙය හොඳ පනතකැයි දැන් කියන්න බැහැ. මා මේ තනතුරට පත්වන විට අපේක්ෂා කළේ පනත සංශෝධනය කිරීමයි. එය මට කළ හැකි කාර්යයක් නොවේ. ඒ ගැන ඇමැතිවරයා ප්‍රමුඛ අදාළ අයට ප්‍රකාශ කළා. වෛද්‍ය සභා සාමාජිකයන්ට කරුණු ඉදිරිපත් කළා. පනතක් සංශෝධනය කිරීම සඳහා ක්‍රම සහ විධි නිසි පරිදි අනුගමනය කළ යුතුයි.” හිටපු සභාපතිවරයා පැවසීය.
තමන්ගේ ඉල්ලා අස්වීමෙන් හෝ වෛද්‍ය සභා පනත් කෙටුම්පත සංශෝධනය කිරීමට අවධානය යොමු වනවා නම් එය ඉතා යහපත් යැයි මහාචාර්යවරයා අවධාරණය කළේය.
“මාස නවයකට පෙර ඇමැතිතුමා බලාපොරොත්තු සහගතව මේ තනතුරට මා පත්කළා. මගේ ඉල්ලා අස්වීමේ ලිපියෙන් එතුමාට එම බලාපොරොත්තුව මතකයට නැඟෙන්න ඇති” යනුවෙන් මහාචාර්ය කොල්වින් ගුණරත්න වැඩි දුරටත් කියා සිටියේය.
මහාචාර්ය කොල්වින් ගුණරත්න 2017 ඔක්තෝබර් මස 02 වැනිදා ශ්‍රී ලංකා වෛද්‍ය සභා සභාපති ධුරයට පත් කෙරුණේ එතෙක් සභාපති ධුරයේ කටයුතු කළ මහාචාර්ය කාලෝ ෆොන්සේකාගේ සේවා කාලය අවසන් වීම හේතු කොටගෙනය.
Facebook Comments
