මාලඹේ සයිටම් පෞද්ගලික වෛද්‍ය විද්‍යාලයේ වෛද්‍ය උපාධිධාරී සිසුන් ලියාපදිංචි කරන මෙන් ඉකුත් අභියාචනාධිකරණය මඟින් ශ්‍රී ලංකා වෛද්‍ය සභාවට දුන් නියෝගයක් නිවැරදි බවට ශ්‍රේෂ්ඨාධිකරණය තීරණය කර තිබේ.
තීන්දුව ප්‍රකාශයට පත් කරමින් විනිසුරන් අධිකරණය හමුවේ ප්‍රකාශ කළේ ශ්‍රී ලංකා වෛද්‍ය පනතේ 29 (2) වගන්තිය යටතේ සයිටම් ආයතනයේ පෙත්සම්කාර වෛද්‍ය සිසුවියට ශ්‍රී ලංකා වෛද්‍ය සභාවේ ලියාපදිංචි වීම සඳහා හිමිකම් පවතින බවයි.
සයිටම් විද්‍යාලයේ සිසුන් හට වෛද්‍ය සභාවේ ලියාපදිංචිය ලබා දිය යුතු බවට 2017. වසරේ ජනවාරි මස 31 වනදා අභියාචනාධිකරණය දුන් නියෝගය නීත්‍යානුකූල බව සඳහන් කළ ශ්‍රේෂ්ඨාධිකරණය අභියාචනාධිකරණ නියෝග ප්‍රකාරව අදාළ සිසුවිය ලියාපදිංචි කිරීම පමා කිරීම තුළින් සිදු වූ අගතිය වෙනුවෙන් ඇයට රුපියල් ලක්ෂයක වන්දියක් ගෙවන මෙන් ද ශ්‍රී ලංකා වෛද්‍ය සභාවට නියම කළේය.
මාලඹේ සයිටම් පෞද්ගලික වෛද්‍ය විද්‍යාලයෙන් වෛද්‍ය උපාධිය ලබාගත් තමන්ව සීමාවාසික පුහුණුව සඳහා ලියාපදිංචි කිරීම ශ්‍රී ලංකා වෛද්‍ය සභාව මගින් ප්‍රතික්ෂේප කර ඇති බවට චෝදනා කරමින් එම වෙද විදුහලේ සිසුවියක් විසින් අභියාචනාධිකරණයට පෙත්සමක් ඉදිරිපත් කර තිබුණි.
2017 වසරේ ජනවාරි මස 31 වනදා තීන්දුවක් ලබා දෙමින් මාලඹේ සයිටම් පෞද්ගලික වෛද්‍ය විද්‍යාලයෙන් වෛද්‍ය උපාධිය ලබාගත් අදාල සිසූවිය ලියාපදිංචි කරන මෙන් ශ්‍රී ලංකා වෛද්‍ය සභාවට නියෝගයක් නිකුත් කර තිබුණ අතර එම නියෝගය අහෝසි කරන මෙන් ඉල්ලා ශ්‍රී ලංකා වෛද්‍ය සභාව මඟින් ශ්‍රේෂ්ඨාධිකරණය වෙත අභියාචනයක් ඉදිරිපත් කළේය.
එම අභියාචනය මඟින් ශ්‍රී ලංකා වෛද්‍ය සභාව ශ්‍රේෂ්ඨාධිකරණය හමුවේ ප්‍රකාශ කර තිබුණේ මාලඹේ සයිටම් පෞද්ගලික වෛද්‍ය විද්‍යාලයේ වෛද්‍ය උපාධිය නිසි ප්‍රමිතියකින් යුක්ත නොවන බැවින් එම උපාධි ලබා ගන්නා සිසුන් ලියාපදිංචි කිරීමට තමන්ට නොහැකි බවයි.
ඒ අනුව අදාළ සිසුන් ලියාපදිංචි කරන මෙන් 2017 වසරේ ජනවාරි මස 31 වැනිදා අභියාචනාධිකරණය මඟින් දුන් තීන්දුව අහෝසි කිරීමේ නියෝගයක් නිකුත් කරන මෙන් ඉල්ලා ශ්‍රී ලංකා වෛද්‍ය සභාව මඟින් ශ්‍රේෂ්ඨාධිකරණයෙන් වෙත මෙම අභියාචනය තිබුණි.
Facebook Comments
