සාමය හා සංහිඳියාව ස්ථාපිත කරලීමේ අසීරු කාර්යභාරය සාර්ථක කර ගැනීම සම්බන්ධව ශ්‍රී ලංකාව මුළුමහත් ලෝකයටම ආදර්ශයක් සපයමින් සිටින බව නෝර්වේ විදේශ ඇමැතිනිය ප්‍රකාශ කර තිබේ.
ඔස්ලෝ නුවර රාජ්‍ය අමුත්තන්ගේ නිල නිවස්නයේ දී ශ්‍රී ලංකා අග්‍රාමාත්‍ය රනිල් වික්‍රමසිංහ ප්‍රධාන ලාංකේය දූත පිරිස හමු වූ අවස්ථාවේ ඉනෙ එරික්සන් එස්ඕරෙයිදේ ඇමැතිනී ශ්‍රී ලංකාවේ සාමය හා සංහිඳියා වැඩපිළිවෙළ සඳහා නෝර්වේ රාජ්‍ය පූර්ණ සහාය ලබාදෙන බවට සහතික වී ඇත.
ශ්‍රී ලංකාව සහ නෝර්වේ රාජ්‍ය අතර ආර්ථික හා දේශපාලන සබඳතා ශක්තිමත් කරලීමේ සැලසුම් හා උපාය මාර්ග පිළිබඳ ද, මෙතෙක් දෙරට අතර පැවැති ආධාර දීම හා ආධාර ලබාදීමේ සංකල්පයෙන් ඔබ්බට මේ සබඳතාවන් ගෙන යා යුතු බව ද මෙහි දී අවධානය යොමු කර තිබේ.
ශ්‍රී ලංකාවේ පිහිටුවීමට යෝජිත පොලිස් හා අපරාධ යුක්තිය පිළිබඳ විශ්වවිද්‍යාලය සඳහා තාක්ෂණික සහයෝගය ලබාදීමට ද නෝර්වේ රාජ්‍යය එකඟ වු බවයි රජය පවසන්නේ.
මහාචාර්ය මෛත්‍රී වික්‍රමසිංහ, පාර්ලිමේන්තු මන්ත්‍රීවරුන් වන හේෂා විතානගේ, කාවින්ද ජයවර්ධන, අග්‍රාමාත්‍ය ලේකම් සමන් ඒකනායක සහ නෝර්වේ හි ශ්‍රී ලංකා තානාපතිනී මහාචාර්ය අරූෂා කුරේ යන පිරිස ද මේ අවස්ථාවට එක්වූහ.
Facebook Comments
