ප්‍රජාතන්ත්‍රවාදය සඳහා අප කුමක් කළ යුතු ද? – විසාකේස

0
329
wedding people

පාර්ලිමේන්තුව විසිරුවා හැරීම අමු අමුවේ ආණ්ඩුක්‍රම ව්‍යවස්ථාව උල්ලංඝනය කිරීමක්. ලංකාවේ මධ්‍යස්ථ නීතිවේදීන් ඒ බව එක හඬින් කියා සිටිනවා. ව්‍යවස්ථාව උල්ලංඝනය කිරීමේ ප්‍රතිඵල ඉතා භයංකරයි. රටේ ඉහලම නීතිය උල්ලංඝනය වන විට නීතියේ ආධිපත්‍යය සහ ආණ්ඩුව කියන ආයතනය වෙත ඇති සමස්ථ විශ්වාසයම බිඳ වැටෙනව. එසේ ව්‍යවස්ථාව උල්ලංඝනය කිරීමට පක්ෂ වූ අයත්, ඊට එරෙහි වූ අයත් යන දෙපාර්ශවයම නීතිය තමන්ට රිසි සේ තම අතට ගෙන උග්‍ර හිංසාකාරී මාර්ගයකට අවතීර්ණ වෙන්න ඉඩ තියෙනවා.

1.ඉතින් අප විසින් නොපමාව කළ යුත්තේ කුමක්ද?

නොපමාව කළ යුතු දේ නම් ශ්‍රේෂ්ඨාධිකරණයට යෑමයි. මේ වන විට රේෂ්ඨාධිකරණ‌යේ මතය විමසෙමින් ඇති බවයි මගේ දැනීම. මා දන්නා හදාරා ඇති නීතියට අනුව විනිසුරැවන් ඉදිරියේ ඇති ගැටළුවේ පිළිතුර පළිඟුවක් සේ පැහැදිලි පිළිතුරක්.

කොන්දක් ඇති විනිසුරුවන් ශ්‍රේෂ්ඨාධිකරණ‌යේ සිටීනම් අනිවාර්යයෙන්ම පාර්ලිමේන්තුව විසුරුවීමේ නියෝගය බල රහිත වෙනවා ඇත. එහෙත් අප දන්නවා අද කාළයේ විනිසුරන්ගෙන් බොහොමයක් නොයෙකුත් බලපෑම් වලට යටත් වෙන ආත්ම ශක්තියක් නැති අය බව.

අනෙක් අතට ශ්‍රේෂ්ඨාධිකරණයෙන් තීන්දු දෙන තුරු බලා නොහිඳ අපි මෛත්‍රී ජනාධිපතිවරයා සහ රාජපක්ෂ කල්ලිය එක් ව සිදු කරන මේ නින්දිත නීති විරෝධී ක්‍රියාවන් දිගටම හෙළා දැකිය යුතුයි. අවිහිංසාවාදීව වි‌රෝධතා දැක්විය යතුයි.

2. අප ඊ ගාවට කළ යුත්තේ කුමක්ද?

ශ්‍රේෂ්ඨාධිකරණයෙන් තීන්දුවක් ලබා දුන්නොත් එය කුමක් වුවත් පිළි ගැනීමට අපට සිදු වෙනවා.

පාර්ලිමේන්තුව විසිරවීම නීත්‍යානුකූල නොවන බව ශ්‍රේෂ්ඨාධිකණය කියා සිටියහොත් අප අවිහිංසාවාදීව විරෝධය පා පාර්ලිමේන්තුව කැඳවීමට බල කළ යුතුයි. එවිට මන්ත්‍රී බහුතරකයට තම නායකයා තෝරා ගත හැකියි.

පාර්ලිමේන්තුව විසිරවීම නීත්‍යානුකූලයි කියා ශ්‍රේෂ්ඨාධිකණය කියා සිටියහොත් අපි හැකි අයුරින් සංවිධානය විය යුතුයි හොර මැර කම් නොකළ හා කිරීමට ඉඩ නැති නියෝජිතයන් පත් කිරීමට. රටේ ප්‍රසිද්ධ ක්‍රීඩකයින් හා කලා කරුවන් එවැනි උගත්, අවංක යයි පිළිගත හැකි අපේක්ෂකයින්ව අනුමත කරමින් ප්‍රකාශ කළ යුතුයි. අපි ප්‍රාදේශීය කණ්ඩායම් ලෙස සංවිධානය වෙලා තමන්ගේ ප්‍රාදේශීය දේශපාලඥයන් සතු සෘජු හා වක්‍ර වත්කම් සමාජ මාධ්‍ය හා අනෙකුත් මාධ්‌ය හරහා ප්‍රකාශයට පත් කරමින් ජනතාව දැනුවත් කළ යුතුයි. මාස 6 ක් අතැළත විධායක ජනාධිපති ක්‍රමය අහෝසි කිරීමේ ජනමත විචාරණය ලබා දෙන බවට ලිඛිත පොරොන්දු සියළුම පක්ෂ වලින් ඉල්ලා සිටිය යුතුයි.

හැබැයි නියම තීරණයක් නොදී ශ්‍රේෂ්ඨාධිකරණ‌යේ විනිසුරන් ඇඟ බේරා ගත්තොත් අපට සිදු වෙනවා පිළි ගන්න පාර්ලිමේන්තුව විසිරවීමේ ගැසට් නිවේදනය බල විරහිත බව. ඒ අනුව මගේ මතය නම් ඡන්දය කැඳවීමත්, ඡන්දය ඉල්ලීමත්, ඡන්දය දීමත් ඉතා භයානක විහිළුවක් බව. නීති විරෝධි ඡන්දය මම වර්ජනය කරනවා. නැවත දිනයක මේ සිදු වූ වරද නිවැරදි කරන තාක් කල් (නිදසුනක් හැටියට අග විනිසුරු ශිරානි නැවත පත් කිරීම වැනි නිවැරදි කිරීමක් කරන තාක් කල්) මම හැකි හැම විටම සිවිල් නීතියට අවනත නොවී ඉන්න උත්සාහ කරනවා.

3. අප දිගු කාලීනව කළ යුත්තේ කුමක්ද?

ශ්‍රේෂ්ඨාධිකරණයෙන් තීන්දුව කුමක් වුවත් ඊලඟ මැතිවරණ වල තීරණ කුමක් වුවත් මේ රටේ ප්‍රජාතන්ත්‍රවාදය නැවත තහවුරු කරන්නනම් අප විසින් අවම වශයෙන් පහත සිව් වැදෑරුම් ප්‍රතිශෝධන දිනා ගත යුතුයි.

විධායක ජනාධිපතිගේ බලතල පාර්ලිමේන්තුවට සර්ව සම්පූර්ණ ලෙස වග කියන අගමැති ප්‍රමුඛ ඇමති මණ්ඩලයට ලබා දීම.

සමානුපාතික ඡන්ද ක්‍රමය අහෝසි කොට – තමන්ගේ කොට්ඨාශ නියෝජිතයින් කවුදැයි හඳුනා ගත හැකි මිශ්‍ර ක්‍රමයක් හඳුන්වා දීම. (නිදසුන් ලෙස ඔස්ට්‍රේලියා, නවසීලන්ත හෝ මුරුසිය වැනි රටවල ඇති)

රජයේ සංස්ථා, මණ්ඩල, දෙපාර්තුමේන්තු ඇතුලු හැම ආයතනයකම කම්කරුවා සිට විධායක අධ්‍යක්ෂක දක්වා හැම තනතුරක්ම නිපුණතා පදනමකින් ස්වාධීන ලෙස – රාජ්‍ය‌ සේවා කොමිසම වැනි ආයතනයක් හරහා පත් කිරීම.

නීතිපති, විගනකාධිපති වැනි අපරාධ, දූශණ, වංචා හා මහජන පැමිණිලි ආදිය බාර සියළුම තනතුරුත්, සියළු අධිකරන විනිසුරු පදවිත් පාර්ලිමේන්තුවේ ආරක්ෂාවය යටතට ගෙනවිත් ශක්තිමත් කිරීම.

ආචාර්ය විසාකේස චන්ද්‍රසේකරම්

Facebook Comments