යෝජිත නව ව්‍යවස්ථාව හරහා රට පාවා දීමක් සිදු නොවන බවට අගමැතිවරයා පාර්ලිමේන්තුවේදී අවධාරණය කර තිබේ.
බුදු දහමට ඇති ප්‍රමුඛස්ථානයට හෝ රටේ ඒකීය භාවය නව ව්‍යවස්ථා මඟින් වෙනස් වීමක් නොවන බවට යෝජිත නව ආණ්ඩුක්‍රම ව්‍යවස්ථාවට අදාළ විද්වත් කමිටු වාර්තා පහක් පාර්ලිමේන්තුව හමුවේ තබමින් 11 සිකුරාදා රනිල් වික්‍රමසිංහ අගමැතිවරයා පෙන්වා දුනි.
“කිසි අවස්ථාවක මේ රටට ව්‍යවස්ථා කෙටුම් පතක් දෙන්න, රට බෙදන්න මොකක්වත් තිබුනෙ නැහැ. දේශපාලන වශයෙන් බංකොලොත් වෙලා තියෙන අයට අවශ්‍ය මේක අරගෙන ඉදිරියට දුවන්න. වෙනත් කරුණු නැති නිසා තමයි බලන්නෙ හැමදාම පුලුවන්ද රට බෙදනවා කියල කියන්න, බුද්ධාගම නැති කරනවා කියන්න.”
විධායක ජනාධිපති ක්‍රමය අහෝසි කිරිමේ යෝජනා සම්බන්ධව තවදුරටත් සාකච්ඡා කල යුතු බව ද අගමැතිවරයා ප්‍රකාශ කළේය.
ආණ්ඩුක්‍රම ව්‍යවස්ථාවක් ගෙන ඒමට වත්මන් පාර්ලිමේන්තුවට සුජාත භාවයක් නොමැති බවට විවාදයට එක්වු විපක්ෂනායක මහින්ද රාජපක්ෂ කියා සිටියේය.
පළාත් පාලන මැතිවරණයේ තීන්දුව අනුව වත්මන් රජයට නව ව්‍යවස්ථාවක් ගෙන ඒමේ බලයක් නොමැති බව කී විපක්ෂ නායකවරයා පාර්ලිමේන්තු මැතිවරණයකට ගොස් ආණ්ඩුක්‍රම ව්‍යවස්ථා යෝජනා ඉදිරිපත් කර ජනතාවගේ බලයක් ලබාගත යුතු බවට පැවසීය.
සිංහල ජාතියට වෙනත් ජාතියක් පගා දැමීමට අයිතියක් නැතුවා මෙන්ම වෙනත් ජාතියකට එසේ කිරීමට අයිතියක් නැති බව කී මහින්ද රාජපක්ෂ විපක්ෂ නායකවරයා එක් ජාතියක් තරහ කර ගනිමින් ගෙන එන ව්‍යවස්ථාවක් හරහා වෛරයක් ඇති වන බැවින් එසේ නොකරන ලෙස ඉල්ලා සිටියේය.
විපක්ෂ නායකවරයාගේ ප්‍රකාශය අනුමත කල අගමැති රනිල් වික්‍රමසිංහ ඒ ඔස්සේ නව ව්‍යවස්ථාව පිළිබඳව විවාදයක් කල හැකි බව වැඩි දුරටත් සඳහන් කළේය.
Facebook Comments
